Ni xi akakoo̱ 6

Nga nijón seyo̱ xi tjoón

1Kó kamábe an cho̱tsa̱nga̱a̱ nga iskjíndiyá seyo̱ xi tjoón nga yito kui seyoo̱, kó tsintꞌie an nga ngo kui xi síndoo̱, kui xi xikó maá cho̱ꞌo̱n nda̱a̱, nga bi̱ katsó:

–¡Ja̱bíꞌi̱n!

2Kó kamábe an, ngo ndi̱je̱ tiboa, kó kui xi tikónsoón ngo yáchjonyá tjiyátsjà, kó kui katseꞌeé ngo korona̱, kó jatjo nga kui xi katsꞌén, ko̱jo nga sa̱ꞌín.

3Kó kjiꞌanga kui cho̱tsa̱nga̱a̱ iskjíndiyá xi ma jó seyoo̱, tsintꞌie an xi ma jó kui xi síndoo̱, nga bi̱ katsó:

–¡Ja̱bíꞌi̱n!

4Kó jatjo ngo ndi̱je̱ iní, kó kui xi tikónsoón, katseꞌeé ngaꞌniú tsi̱ꞌe̱ nga kui xi kjo̱a̱ꞌáxín kjo̱a̱xioó tꞌanangii̱, ko̱jo tsi̱ꞌe̱ nga sa̱ꞌín nga ngayeje xotaa̱ kui nga̱sondiee̱ sa̱ꞌínkꞌién ja̱kꞌi̱e̱ ja̱ngaján xkjín, kó katseꞌeé ngo ki̱cha̱ xi ta̱nisién je.

5Kó kjiꞌanga cho̱tsa̱nga̱a̱ iskjíndiyá xi ma ján seyoo̱, tsintꞌie an xi ma ján kui xi síndoo̱, nga bi̱ katsó:

–¡Ja̱bíꞌi̱n!

Kó kamábe an ngo ndi̱je̱ jmá, kó kui xi tikónsoón, ngo nisochi̱bo̱a̱ tjiyátsjà. 6Kó ngamasiee̱n nga nijón kui xi síndoo̱ tsintꞌie an ngo nda̱ xi bi̱ katsó:

–Ta̱ ngo tsi kilo̱ to ndso̱ko̱a̱n ṉño̱pan, ko̱jo tsi ján kilo̱ sebanda̱ xi ku̱i̱e̱nje̱nnii̱ to̱n xi niꞌán nga ngo ni̱xtjii̱n, ta̱nga nga niꞌínkjatsénjín ji istii̱ ko̱jo binoo̱.

7Kó kjiꞌanga cho̱tsa̱nga̱a̱ iskjíndiyá xi ma nijón seyoo̱, tsintꞌie an xi ma nijón kui xi síndoo̱, nga bi̱ katsó:

–¡Ja̱bíꞌi̱n!

8Kó kamábe an ngo ndi̱je̱ sinié, kó kui xi tikónsoón kuí xí kiꞌmí kjo̱a̱bo̱ya, kó nga̱xto̱n kui, kjindibá kui xi botixómaá ngi̱ndiee̱ kjo̱a̱bo̱yaa̱, kó kuí xí katseꞌeé ngaꞌniú tsi̱ꞌe̱ nga ko̱tíxoma ngo nga nijón tjiín tꞌanangii̱, tsi̱ꞌe̱ nga ki̱cha̱, ko̱jo kjindiá, ko̱jo chiꞌin, ko̱jo cho̱ tamá xí tjín nga̱sondiee̱ sa̱ꞌínkꞌiénni xotaa̱.

9Kó kjiꞌanga cho̱tsa̱nga̱a̱ iskjíndiyá xi ma ún seyoo̱, kamábe an ngindie ṉchandikoón ngayeje xota̱ xi kiniꞌánkꞌién ta̱ngatꞌanii̱ nga tsíchji̱a̱ eén Néná, ko̱jo kjo̱a̱a̱ nga chistiko̱ kamá kjo̱a̱a̱ nii̱ Néná. 10Kó kui xotaa̱, bi̱ katsó nga ꞌniú askjandáyà:

–Ngaskande kjiꞌání Ndi̱a̱ xi tsjie ko̱jo xi ja̱koxi̱, nga si̱ꞌinjée̱ xotaa̱ kui tꞌanangii̱, ko̱jo nga si̱ꞌingojo ji nga kiniꞌánkꞌiénjne̱.

11Kó katseꞌeé ńjño tiboa, kó bo̱a̱ kiꞌmií nga sa̱ꞌínkjaꞌyá ngi chiboa ni̱xtjin, ngaskande nga ka̱mando̱jo xi kótjín moso̱, ko̱jo ntsꞌie xi ta̱ngatꞌanii̱ xaá Néná nga si̱ꞌankꞌien xikoó kui xotaa̱.

12Kó kamábe an nga kachjándiyá xi ma jun seyoo̱, kó kjindibá ngo kjo̱a̱ndi̱ko̱n ꞌniú, kó ndoboaá kamájñó, xikoó ngo ńjño xa̱ꞌya̱, ngayeje saá kamáꞌiní xikoó jín, 13kó ńñoo ixóngíni ndiꞌakꞌajmi jàn nga ixó tꞌanangii̱, xikó má tsꞌén bixóngí toꞌingo̱ xi taá kjiꞌa ngo tjo̱ꞌniú ꞌbítsanie yaá, 14kó ndiꞌakꞌajmii̱ kichajá ngi̱jinꞌa̱sie̱èn xikoó ngo xo̱jo̱n xi fochꞌo̱, kó ngayeje na̱xi̱i̱, ko̱jo ngayeje tji̱ngi̱i̱ kamátíyaá ngi̱ndie nínga síndo. 15Kó ree̱ tꞌanangii̱ kisꞌińdoꞌmá nga kijí ngi̱ya ti̱xa̱na̱xi̱i̱, ko̱jo nínga síndo ndi̱jo̱ yiꞌii̱ na̱xi̱i̱, ko̱jo xota̱ xi nkꞌa xaá, ko̱jo ngito̱ko̱o̱ jájuún, ko̱jo xota̱ xi cho̱n, ko̱jo xota̱ xi tjiín ngaꞌniú, ko̱jo ngayeje moso̱, ko̱jo ngayeje xota̱ xi tjimándé, ti̱ bo̱a̱ ti̱ tsꞌén kisꞌińdoꞌmá nga, 16kó bi̱ katsoó na̱xi̱i̱ ko̱jo ndi̱jo̱o̱:

Ti̱chíjminiéjne̱ yojojnú, kó tꞌíjñaꞌmajne̱ tsi̱ꞌe̱ nga sku̱i̱e̱jínjne̱ kui xi botixómaá, ko̱jo nga xcha̱jínjne̱ ji̱n kjo̱a̱xcha̱án cho̱tsa̱nga̱a̱, 17ngatꞌa̱ jè jachó kui ni̱xtjin je nga ka̱majeé, kó ꞌyá xi kjo̱chíkjo̱a̱a̱ kui nii̱.

Currently Selected:

Ni xi akakoo̱ 6: MAIX

Highlight

Compare

Copy