Ni xi akakoo̱ 4
4
Bi̱ tsꞌén kiniꞌántsjaá Néná ndiꞌakꞌajmii̱
1Ngije kamá kui nii̱, askotsijen an kó kamábe an ngo nga̱ntjo̱a̱ xi tji̱e̱nti̱xa̱ ki̱a̱ ndiꞌakꞌajmii̱, kó kui nda̱ xi tjón tsintꞌie an, kui xi xikó maá ngo tjio, bi̱ katsóna:
–Ndibénijíngí ji kꞌi̱e̱e̱, kó an kokòo̱ ni xi jaskan ka̱ma.
2Ti̱ kjiꞌaa̱ kisꞌijñajinna A̱si̱énni̱xtjii̱n, kó kamábe an ndiꞌakꞌajmi jàn ngo nínga botíxoma, kó ngo xi tikónsón kui ngi̱ndiee̱, 3kó nínga tikón xi botixómaá ꞌna̱ xikó maá ngo ndi̱jo̱ xi ꞌmí jaspe̱, ko̱jo tsi xikó maá ngo ndi̱jo̱ xi ꞌmí kornalina̱, kó nga ngo foaꞌatjiyajoo̱n kui xi botixómaá tikón ngo ndi̱ꞌya̱ xi ꞌna̱ xikó maá ngo ndi̱jo̱ xi ꞌmí esmeralnda̱. 4Kó nga ngo foaꞌatjiyajoo̱n kui xi botixómaá kamábe an ngi kan nijón ngi̱ndie nínga botíxoma, nínga síndosón kan nijón xota̱ xi xchá, xi ndyi̱yajá ńjño tiboa, kó ngo korona̱ to̱nsinié síndoꞌá to̱ko̱, 5kó nínga tikón kui xi botixómaá jatjoni nda̱, ko̱jo cho̱ꞌo̱n, ko̱jo jaꞌatꞌe, kó kje̱n kui xi botixómaá tjítí yito ndiꞌíxò, kó kuí boá xi nga yito A̱si̱énni̱xtjii̱n Néná. 6Kó kje̱n nínga tikón kui xi botixómaá, ti̱ tikón ngo ni xi ja̱kjiꞌi ndáchíkón má kjiꞌi, xi tikón ꞌna̱ ꞌna̱ xikó maá ngo chi̱tsen, kó ngamasiee̱n kui ngi̱ndiee̱, ko̱jo nga ngo foaꞌatjiyajoo̱n, kisꞌińdo nijón xi síndo, xi tjikítsie maá ndyi̱ko̱n yojoo̱, xtji̱e̱e̱n kje̱n ko̱jo xtji̱e̱e̱n nga̱xto̱n. 7Kui xi tjoón mején ja̱kjiꞌi xandi̱je̱ má kjiꞌi, kó xi ma joó ja̱kjiꞌi cho̱yojo chichí má kjiꞌi, kó xi ma jaán kje̱n mejeén ja̱kjiꞌi kje̱n xota̱ má kjiꞌi, kó xi ma nijoón ja̱kjiꞌi ngo ja̱ xi tsꞌénfítji̱e̱n má kjiꞌi. 8Kó nga ngo nga ngo nga nijón kui xi síndoo̱, jun nga̱ kisꞌiee̱, kó xtji̱e̱e̱n ndi̱tsen ko̱jo xtji̱e̱e̱n ngi̱yaa̱ kui nga̱a̱ kisꞌiee̱ ndyi̱ko̱n, kó nga ni̱xtjin ni̱xtji̱e̱n nga bi̱ katsó:
¡Tsjie, tsjie, tsjie Ndi̱a̱ná,
kui Néná xí tjiín ngaꞌniuú,
kui xi ta̱kó kui ngasꞌe̱,
kui xi kui ngotꞌe̱, ko̱jo kui xi sꞌe̱ ndibaá!
9Kó xki̱ nga kui xi síndoo̱ tsjaá kjo̱a̱je, ko̱jo bendikón, ko̱jo tsjaá ndokꞌóchjì kui xi botixómaá, kui xi tikón ngatsjéni̱xtjii̱n, 10nga kan nijón xota̱ xi xchaá bosiéntꞌaa̱tikoó kje̱n nínga tikón xi botixómaá, kó tsꞌéndíkón xí tikón ngatsjéni̱xtjii̱n, kó kje̱n nínga tikón xi botixómaá botitsójó koronaa̱ nga bi̱ tsó:
11Ndi̱a̱ xi tsa̱ji̱n, jí xí sa̱ko̱ó nga chjábé jí
ngayeje kjo̱a̱je, kjo̱a̱yandikón ko̱jo ngaꞌniú,
ngatꞌa̱ jí xi kiniꞌínde ji ngayeje nii̱,
ngatꞌa̱ ta̱ngatꞌanií nga ji xi bo̱a̱ tsꞌén mejeén
nga tjínní kui nii̱, ko̱jo nga kamánda.
Currently Selected:
Ni xi akakoo̱ 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
