Ni xi akakoo̱ 3

Én xí Jesukristoo̱ katsangiyaa̱ xota̱ na̱ngo̱xi̱i̱ Sarndii̱

1Bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Sarndii̱: “Kuí nii̱ xi tsó kui xi tikoón nga yito A̱si̱énni̱xtjii̱n Néná, ko̱jo xi tikoón nga yito ńñoo: An jè be an ngayeje ni xi niꞌín ji, kó jè be an nga tikoón jaꞌén nga tindyin ji, ta̱nga jè kꞌien ji. 2Ti̱ꞌinkjeꞌée̱ yojòo̱, kó te̱ꞌée̱ ngaꞌniú ni xi je mején tjichájaá, ngatꞌa̱ jè kamábe an nga ndajínkjiꞌi ni xi niꞌín ji ngindyi̱ko̱n Néná, 3ngatjaꞌátsjiee̱n, kui kjo̱a̱bokoyá xi je katseꞌeé, ko̱jo ni xi je kandaꞌyé ji, ti̱ꞌinkjatjosén ji, kó ti̱ꞌinkꞌoyé ji yojòo̱. Tsi tsjáfé ji, tsá kjuinkoón jí, xikoó ngo chejé, kó nde xchi̱e̱jín ji chi̱bo̱a̱ nga kjóchó an. 4Ta̱nga ki̱a̱ Sarndii̱ tjiín chiboa xota̱ xi kji̱e̱ tsꞌéndándíjín ńjñoo̱, kuí boá kui xotaa̱ xi kjótsoꞌbájo̱na nga ko̱a̱ja̱ ńjño tiboaa̱, ngatꞌa̱ tsoboárií nga bo̱a̱ sa̱ꞌín. 5Kui xi sa̱ꞌiín, ńjño tiboa ko̱a̱ja̱, kó sa̱ꞌinkjiéjín an jaꞌeén nga kjitꞌa ki̱a̱ xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjii̱n, ta̱sá xiyà an nga be án kuí, ngindyi̱ko̱n Na̱ꞌmina ko̱jo ngindyi̱ko̱n ndítsjiee̱. 6¡Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱!”

Én xí Jesukristoo̱ katsangiyaa̱ xota̱ na̱ngo̱xi̱i̱ Filandelfiaa̱

7Bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Filandelfiaa̱: “Kui nii̱ xi tsó kui xi tsjie ko̱jo xi ja̱koxi̱i̱, kui xi tikoón yibii̱ nda̱ re Ndabii̱, kui xi kjiꞌanga tjín xi kjíxꞌá, ta̱ꞌyajín xi ka̱maa̱ ku̱i̱ꞌíchjá, kó kjiꞌanga tjín xi ꞌbíchjá, ta̱ꞌyajín xi ka̱maa̱ skjíxꞌá: 8An jè be an ngayeje ni xi niꞌín ji, tsitsíjin ji, ngindyikin je íjñá an ngo nga̱ntjo̱a̱ xi tji̱e̱nti̱xa̱, xi ta̱ꞌyajín xi maa̱ ꞌbíchjá, kó ndatsi chiboa tsí ngaꞌniú tjiín ji, kiniꞌín ji xki̱ énna, kó tiniꞌínkie ji yojòo̱ nga yení. 9Án boá xi sa̱ꞌin an, nga kui xota̱ xi chji̱a̱ni ndiꞌa nínga ndokjo̱a̱ eén xindajín Satanaa̱, kui xi xota̱ jundío̱ tsoó yojoo̱, kó kuijín bo̱a̱, nga ko̱e̱je̱kasiéntꞌaatikoó ji ngindie ndsa̱ki, tsi̱ꞌe̱ nga sku̱i̱e̱ nga tjóna ji. 10Ngatꞌa̱ nga jè kiniꞌínkjatjosén ji eén kjo̱a̱chiyákjo̱a̱na, ti̱ bo̱a̱ ti̱ tsꞌén an skoon ji nga kjo̱chó chi̱bo̱a̱a̱ kjo̱a̱chjatꞌayákón xi kji̱ndi̱bánié ngayeje nga̱sondiee̱, tsi̱ꞌe̱ nga xchítꞌayákón ngayeje xota̱ xi síndo tꞌanangii̱. 11Tsá kji̱ndi̱bá an, ꞌniú chje̱ꞌétjé ni xi tikoón tsi̱ꞌe̱ nga ta̱ꞌyajín xi kjo̱a̱ꞌáxiín kui chjí xí je kiniꞌín ji. 12Kui xi sa̱ꞌiín, kuí xí tsjàa̱ nga kui xi ka̱ma yáseé na̱ngo̱xi̱i̱ Ne xi tsa̱ꞌa̱n, kó jmíni̱xtjin kjo̱tjo kui ngi̱ndiee̱, kó nga̱són yojoo̱ sa̱ꞌinꞌindó an jaꞌeén Ne xi tsa̱ꞌa̱n, ko̱jo jaꞌeén na̱xi̱ńdaá Ne xi tsa̱ꞌa̱n, kui xi na̱xi̱ńdáꞌniú Jerusale̱n xi tja̱tsi̱e̱e̱ xi ndibání ndiꞌakꞌajmii̱ Ne xi tsa̱ꞌa̱n, kó ti̱ bo̱a̱ ti̱ tsꞌén kꞌuijñáa̱ yojoo̱ jaꞌén tja̱tsi̱e̱na. 13Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱.”

Én xí Jesukristoo̱ katsangiyaa̱ xota̱ na̱ngo̱xi̱i̱ Laondiseaa̱

14Kó ti̱ bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Laondiseaa̱: “Bi̱ tsó kui xi ꞌmí Bo̱a̱ kjiꞌii̱, kui xi chistiko̱ xi ꞌniátakón ko̱jo xi ja̱koxi̱i̱, kui xi ta̱ngatꞌanii̱ kui nga Néná ítsꞌi̱yanii̱ nga katsꞌénda ngayeje nii̱: 15Jè be an ngayeje ni xi niꞌín ji, nga ti̱nde nchꞌànjín ji, ti̱nde sibéjín ji. ¡Achichíra̱ ndakjiꞌi tsi nchꞌàn jí ko̱jo tsi sibé ji katsaki! 16Ta̱nga nga ta̱ asontꞌé jí, kó nga jmí tsi nchꞌàn jí, ti̱nde jmí tsi sibé ji, kuíni nga sa̱ꞌinkjasóñaa̱ ndso̱ꞌba án. 17Ngatꞌa̱ bi̱ tꞌísé ji: Cho̱n án, kó jè kamácho̱n an, kó nde ngojín ni chajana, kó nde yejín ji nga ta̱soboá ni xi ndajín xí kjimaa̱, nga ni̱ma̱ ji, nga jmíjiín to̱n, nga ti̱ka̱ ji, ko̱jo nga tindyin kjiꞌixtí ji. 18Kuíni nga bo̱a̱ tꞌíxiaán nga an tsꞌi̱tsiéní to̱nsinié xi je kiniꞌánchoo̱n ngi̱jin ndiꞌií, tsi̱ꞌe̱ nga ja̱koxi̱ nga cho̱n ka̱ma ji, kó an tsꞌi̱tsiéní ńjño tiboa xi xchi̱e̱je, kó kjoꞌmá kjo̱a̱soboáa̱ nga titsjaxtí, ko̱jo ndiki kolirio̱ tindyiée̱ ndyikin tsi̱ꞌe̱ nga ka̱matsijeen. 19An tsꞌénxchánjo̱ an, kó tsꞌenchjíni̱e̱ an ngayeje xi tjóna, kuíni nga che̱ndikín ji ni xi tsi̱ꞌe̱ Néná, kó ti̱ꞌinkꞌoyé ji yojòo̱ kjo̱a̱a̱ ni xi ndajínkjiꞌi xi tiniꞌín ji. 20Tsitsíjin, kꞌi̱e̱ tikòn an tꞌa nga̱ntjo̱a̱a̱ kó tsꞌénchji̱a̱ an, tsi tjín xí ku̱i̱ntꞌiè nda̱na, kó tsi skjíxꞌá nga̱ntjo̱a̱a̱, kꞌosꞌi̱e̱n an ndiꞌaa̱, kó an skjíni̱e̱jo an ṉño̱, kó kui skji̱ni̱e̱jona an. 21Kui xi sa̱ꞌiín, ngo ngi̱ndie tsjàa̱ nínga tsꞌénbotixoma an, kó ki̱a̱ kꞌuijñátꞌana, xikótsꞌèn je katsꞌen an, kó kꞌi̱e̱ tikóntꞌáa̱ an Na̱ꞌmina nínga tsꞌénbotixómá. 22Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱.”

Currently Selected:

Ni xi akakoo̱ 3: MAIX

Highlight

Compare

Copy