Ni xi akakoo̱ 2

Én xí Jesukristoo̱ katsangiyaa̱ xota̱ na̱ngo̱xi̱i̱ Éfeso̱

1Bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Éfesoo̱: “Kui nii̱ xi tsó kui xi tikoón nga yito ńñoo ngi̱ya tsja kixi̱, ko̱jo xi tsoꞌbá ngamasiee̱n nga yito ni xi ꞌbítíyá ndiꞌí xí tsꞌentsíjen xi to̱nsinieé: 2Jè be yeje an ngayeje ni xi niꞌín ji, be án xá ꞌniú xí niꞌín, ko̱jo nga tjiín kjo̱a̱chiyákón, kó be án nga niꞌínchíkjo̱e̱jíi̱n xota̱ xi ndajiín, kó ti̱ be án nga kachjatꞌeyékín ji kui xi apostro̱ tsoó yojoo̱, kó kuijín bo̱a̱, kó jè kasakoseé nga xota̱ xi ndiso boá, 3kó tjiín kjo̱a̱chiyákón, kó tjíchikjoáa̱ ta̱ngatꞌanii̱ jaꞌénna, kó kjiꞌmeyájín ji. 4Ta̱nga ngo ni tikónna kondra̱ tse̱: nga je ikꞌíjñímasin ji kui xi kiniꞌíntjé ji nga tjón tjón. 5Kuíni nga, ngatjaꞌátsjiee̱n kótsꞌèn kixindyin ji ngasꞌe̱, ti̱ꞌinkꞌoyé ji yojòo̱ kjo̱a̱a̱ ni xi ndajín xi tiniꞌín, kó ti̱ꞌin ji ni xi tjón kiniꞌín ji, ngatꞌa̱ tsi jmí, tsá kjuinkoón nínga tindyin ji, kó kjo̱a̱ꞌáxiín ni xi ꞌbítíyá ndiꞌí xí tsꞌentsíjee̱n xi tse̱, tsi kji̱e̱ niꞌínkꞌoyejín ji yojòo̱. 6Ta̱nga ndakjíꞌí nga chꞌoo̱ ni xi ndyi̱tsꞌèn xota̱ nikolaitaa̱, kui xi ko̱jo an chꞌóna nga. 7Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱. Kui xi sa̱ꞌiín, tsjàa̱ nga skji̱ni̱e̱ too̱ yá xí tsjá kjo̱a̱mindyion xi tikón ngi̱ndie tsjachoo̱n Néná.”

Én xí Jesukristoo̱ katsangiyaa̱ xota̱ na̱ngo̱xi̱i̱ Esmirnaa̱

8Bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Esmirnaa̱: “Kui nii̱ xi tsó kui xi tjoón ko̱jo kui xi fetꞌanii̱, kui xi je kꞌiee̱n, kó ti̱ jaꞌáꞌyá nginií: 9Be án kjo̱a̱ni̱ma̱ xi tibitjatí ji, ko̱jo kjo̱a̱ni̱ma̱ xi tindyinjin ji, ndatsi nga ja̱koxi̱ cho̱n ji, kó ti̱ be án kótsꞌèn chꞌo chji̱a̱ kjo̱a̱a̱ ji kui xi xota̱ jundío̱ tsoó yojoo̱, ta̱nga xota̱ jundío̱jín bo̱a̱, ta̱sá kuí boá xi xota̱ xi chji̱a̱ni ndiꞌa nínga ndokjo̱a̱ eén xindajín Satanaa̱. 10Ngata̱ ndakinjín má kjo̱a̱a̱ kjo̱a̱ni̱ma̱ xi ku̱i̱tje̱tí ji. Tsitsíjin ngatꞌa̱ xindajín ndiabloo̱ ndo̱bo̱a̱yà sa̱ngísꞌién chiboajnú, tsi̱ꞌe̱ nga xchítꞌayákónjnú jún, kó bo̱a̱ tsꞌén ku̱i̱tja̱tiójnú kjo̱a̱ni̱ma̱ tie ni̱xtjin. ꞌNiú tindyin ji ngaskande ndatsi ko̱yè jí, kó an tsjaa ngo chjí, kó kuí boá xi kjo̱a̱mindyioo̱n. 11Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱. Kui xi sa̱ꞌiín, jmí ni ka̱májiín nga kji̱ndi̱bá kjo̱a̱bo̱ya xi ma joó.”

Én xí Jesukristoo̱ katsangiyaa̱ xota̱ na̱ngo̱xi̱i̱ Pérngamoo̱

12Bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Pérngamo̱: “Kui nii̱ tsó xi tikoón ki̱cha̱ xi yojó nga jó ngoboaá: 13Jè be an nga ki̱a̱ tindyin ji nínga tikón ngi̱ndie nínga botixómá xindajín Satanaa̱, ta̱nga ta̱kó ꞌniú tiꞌmitji̱ngi ji jaꞌénna, kó jmíni̱xtjin nga sꞌijinjínna kase ji kjo̱a̱a̱ nga sꞌijii̱n an, ti̱nde bo̱a̱jín kase ni̱xtjin nga Antipaa̱, kui nda̱ xi chistiko̱ xi ꞌniátakón an kiniꞌánkꞌién ngi̱jinjnú, ki̱a̱ na̱xi̱ńdáꞌniú nínga tikón xindajín Satanaa̱. 14Ta̱nga tikón chiboana ni kondra̱ tse̱: nga ki̱a̱ síndoo̱ chiboa xota̱ xi mejénjiín nga kjo̱ta̱xi̱ín kjo̱a̱bokoyaá Balaa̱n, kui xi atíxomaa̱ Balaa̱k tsi̱ꞌe̱ nga katsꞌénjé xota̱ xi chji̱a̱ni Israee̱l, tsi̱ꞌe̱ nga iskjinie ni xi je kiniꞌánkꞌasꞌiee̱n ngo a̱sie̱én ngo ne xi tsꞌénda xotaa̱, ko̱jo kjo̱a̱a̱ nga katsꞌén kjo̱a̱tondo̱. 15Ti̱ bo̱a̱ ti̱ tsꞌén ki̱a̱ síndoo̱ ji, chiboa xota̱ xi mejénjiín sa̱ꞌínkjii̱n yojoo̱ ni xi akóyá xota̱ nikolaitaa̱, ni xi chꞌóna an nga. 16Kuíni nga ti̱ꞌinkꞌoyé ji yojòo̱, ngatꞌa̱ tsi jmí, tsá kjuinkoón ji, kó kui ki̱cha̱ xi fotjoni ndso̱ꞌba án, kuí xí sa̱ꞌinkjièn án nga skjanjo̱ an kui xotaa̱. 17Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱. Kui xi sa̱ꞌiín, tsjàa̱ nga skji̱ni̱e̱ ni xi ꞌmí manaa̱ xi tikónꞌmaá, kó ti̱ tsjàa̱ ngo ndí ndi̱jo̱ tiboa, kui xi kjitꞌaa̱ ngo jaꞌén tja̱tsi̱e̱ xi nde kji̱e̱ ngo xi be, ta̱kuítsí xota̱ xi kjíbé kuí ndí ndi̱jo̱o̱.”

Én xí Jesukristoo̱ katsangiyaa̱ xota̱ na̱ngo̱xi̱i̱ Tiatiraa̱

18Bi̱ tsꞌén ti̱ꞌinꞌindée̱ ndítsjiee̱ xota̱ na̱ngo̱xi̱i̱ Tiatiraa̱: “Kui nii̱ xi tsó ndií Néná, kui xi ndyi̱ko̱n xikó maá ndiꞌií, kó se xikó maá ki̱cha̱ bronse̱ xi tjíniꞌánńdaá: 19An, jè be an ngayeje ni xi tiniꞌín ji, be án kjo̱a̱tjóo̱, kjo̱a̱sꞌijìi̱n, xáa̱, ko̱jo kjo̱a̱chiyákóo̱n, kó be án nga ngotꞌe̱ tsie ngase ni xi tiniꞌín ji ta̱bo̱a̱jiín nga ikꞌítjatsꞌée̱n. 20Ta̱nga tikónna ngo ni kjo̱a̱a̱ kondra̱ tse̱: nga tiniꞌínchíkjoée̱ kui xota̱chjo̱on xí ꞌmí na̱ Jesabee̱, kui xi na̱ chji̱ni̱e̱ꞌe̱én Néná tjítsoó yojoo̱, ta̱nga tsꞌénꞌboṉcha̱jo moso̱na tsi̱ꞌe̱ nga sa̱ꞌín kjo̱a̱tondo̱, ko̱jo nga skji̱ni̱e̱ nichinie xi je kiniꞌánkꞌasꞌiee̱n a̱sie̱én ngo ne xi tsꞌénda xotaa̱. 21An, jè katsjandièe̱ tsi̱ꞌe̱ nga sa̱ꞌínkꞌoyà yojoo̱, ta̱nga kui kamámejénjiín nga sa̱ꞌínkꞌoyà yojoo̱ kjo̱a̱a̱ xá xi tsꞌén nga na̱masien tjítsꞌén yojoo̱. 22Kuíni nga, án xí sa̱ꞌinꞌóo̱n kui, kó kui xota̱ xi ndyi̱tsꞌèntꞌaa̱kjo̱a̱ Néná, tsie kjo̱a̱ndasen tsjàa̱, ta̱nga jmí ni sa̱ꞌínjáa̱n tsi sa̱ꞌínkꞌoyà yojoo̱ kjo̱a̱a̱ ni xi katsꞌén, 23kó sa̱ꞌínkꞌién an ndií, kó ngayeje xota̱ na̱ngo̱xi̱i̱ sku̱i̱e̱ nga an be án kókjiꞌi ngi̱jii̱n kjo̱a̱kjíntakoón, ko̱jo ngi̱jin ini̱ma̱a̱ xotaa̱, kó nga ngo nga ngo xotaa̱ tsjàa̱ ta̱ xikó kjíꞌí ni xi katsꞌén. 24Kjo̱a̱ ngaá jún, xota̱ xi tindyiónjnú ki̱a̱ Tiatiraa̱ ta̱nga nga ki̱a̱jín ndyi̱mongíntji̱ngíjnú kui kjo̱a̱bokoyaá, ti̱nde kji̱e̱ yàjínjnú ni xi tjiꞌmaá xindajín Satanaa̱, xikó tsó xotaa̱, xiyàjnúꞌun nga kꞌuiniéjínjnúꞌun ingo ni xi é, 25ta̱nga chónjnú ni xi je tikónjnú, ngaskande nga kjoéꞌe̱ ngiñá an. 26Kó kui xi sa̱ꞌiín, kó sa̱ꞌínkjatjosón ngaskande nga kju̱i̱e̱tꞌa ni xi mejénna nga sa̱ꞌín, tsjàa̱ xá, tsi̱ꞌe̱ nga kui ko̱tíxomaa̱ na̱xi̱ńdaá, 27kó tajá tsꞌén ko̱tíxomaa̱ na̱xi̱ńdaá, kó bo̱a̱ ka̱maa̱ xotaa̱ xikó ma maá nga bokjan ngo ti̱jì xí ńdie kamándani, xikótsꞌèn Na̱ꞌmina je katsjána kui nii̱, 28kó tsjàa̱ ńño tsie xi sꞌijña nga ndibáꞌásie̱én. 29Xi tjín tji̱bo̱a̱nijon nga ku̱i̱ntꞌiè, ngatintꞌiè ni xi A̱si̱énni̱xtjii̱n tsoó xota̱ na̱ngo̱xi̱i̱.”

Currently Selected:

Ni xi akakoo̱ 2: MAIX

Highlight

Compare

Copy