Xo̱jo̱n Salmoo̱ 103
103
¡Ngayeje ngaꞌniúna nga Ji sa̱ꞌintsjaà!
Só xi katsꞌénda Ndabii̱.
1Ini̱ma̱na ngatsꞌèntsjaà Néná,
kó ngayeje yojona ngatsꞌèntsjaà Jaꞌeén Kui.
2Ini̱ma̱na ngatsꞌèntsjaà Néná,
kó nga ngojín kjo̱a̱ndaa̱ xi niꞌínchíyé Ji.
3Kuí boá xi tsꞌénjétakón ngayeje ni xi ꞌniú ndajín niꞌín ji.
Kuí boá xi tsꞌéndàyà ngayeje nínga oo̱n.
4Kuí boá xi ꞌboxiéꞌaá ki̱a̱ ngi̱ya ti̱xa̱ nínga tindyin ji.
Kuí boá xi achichí kjo̱a̱nda ko̱jo kjo̱a̱ni̱ma̱takón tsjaá.
5Kuí boá xi tsjaá ni nda xi mejeén jí,
tsi̱ꞌe̱ nga ka̱matja̱tsi̱e̱ya ji xikoó ja̱a̱.
6Néna boá xi tsꞌénkjién kjo̱a̱kixi̱i̱,
kó tsjaá kjo̱a̱nda ngayeje xota̱ xi ndyi̱foaꞌatio kjo̱a̱ni̱ma̱a̱.
7Néná akoó Moisee̱ ndi̱ya̱à, kó xota̱ tji̱e̱e̱ Israee̱l akoó ni xi fíndikónná xi katsꞌén.
8Achichí kjo̱a̱ni̱ma̱takón, ko̱jo kjo̱a̱tsiekon tjiín Néna,
tsájín tsꞌénxchán, kó achichí tsie kjo̱a̱ni̱ma̱takón tjiín.
9Jmí tsi ngatsjéni̱xtjin tsꞌénxchánjo̱ná,
ti̱nde jmí tsi ngatsjéni̱xtjin nga on ko̱a̱ꞌa̱ná.
10Jmí tsi bo̱a̱ tsꞌén atíjéná, xikó tsꞌén tsoboaá jé xí kiniꞌán,
ko̱jo jmí tsi bo̱a̱ tsꞌén íchjíná, kjo̱a̱a̱ ni xi ꞌniú ndajín xi kiniꞌán.
11Ngatꞌa̱ xikó kjiꞌi nga nkꞌa nkꞌajmii̱, ndeskande ki̱a̱ nga̱soón tꞌanangii̱,
bo̱a̱ kjiꞌi je katsꞌén kjo̱a̱ni̱ma̱takoón, kjo̱a̱a̱ xota̱ xi bendikón Kuí.
12Xikótsꞌèn kjin tikónnii̱ xkjín nínga fotjo tsꞌueé, ko̱jo nínga ꞌbosꞌien,
bo̱a̱ má kjiꞌi kjin katsꞌénkjinnii̱ ni xi ꞌniú ndajín xi kiniꞌán.
13Xikótsꞌèn ngo na̱ꞌmi, ni̱ma̱ maa̱ ndií,
bo̱a̱ má tsꞌén Néná, ni̱ma̱ maa̱ xota̱ xi bendikón.
14Ngatꞌa̱ Néná jè be kui kótsꞌèn tindyión,
kó foaꞌátsjienrií nga ta̱ chojo tsí bo̱a̱ ñá.
15Kjo̱a̱mindyioo̱n xota̱ nga̱sondiee̱, xikónií kꞌijñaá,
ꞌbeé naxó, xikoó naxó xí ꞌbé ngi̱jin kꞌijñaá,
16kui xi ngije foaꞌatꞌaa̱ tjo̱o̱, chaja tji̱ꞌni̱u̱,
kó ngiti̱ ingojín xi be ngi̱ndie nínga kisꞌijña,
17ta̱nga kjo̱a̱ni̱ma̱takoón Néná tikón boá ndeskande koó ngasꞌe̱,
kó to̱kó kꞌuijñára ta̱kjiꞌání, tsi̱ꞌe̱ xota̱ xi bendikón Kuí,
kó kjo̱a̱kixi̱i̱ kꞌuijñára, kjo̱a̱a̱ ndií xota̱ tji̱e̱ xi jaskan ndibaá,
18kui xota̱ xi tsꞌénkjátjosón ni xi índa,
ko̱jo xi foaꞌátsjiee̱n kjo̱a̱botíxomaa̱, tsi̱ꞌe̱ nga sa̱ꞌínkjatjosón.
19Néna boá ꞌniú íjñá nkꞌajmii̱, nínga botixómá Kuí,
kó Kuí boá xi botixómaá ngayeje ni xi tjiín.
20Ti̱ꞌantsjàjnúu̱ Néná, jún xi ndítsjiee̱ Kui,
jún xi tjínjnú ngaꞌniú, ko̱jo xi niꞌánkjatjosónjnú eén,
nga ndaꞌyáꞌénjnúu̱ nga tsjá ngo kjo̱a̱.
21Ti̱ꞌantsjàjnúu̱ Néná, jún xi ngayeje jájuún,
jún xi ki̱a̱ ndyi̱niꞌánxátꞌajnúu̱, nga niꞌánjnú ni xi mejeén Kui.
22Ti̱ꞌantsjàjnúu̱ Néná, jún xi ndií Kui májnú,
xi tindyiónjnú ngayeje ngi̱ndie nínga botixómá Kuí.
¡Ini̱ma̱na ngatsꞌèntsjaà Néná!
Currently Selected:
Xo̱jo̱n Salmoo̱ 103: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
