Xo̱jo̱n Salmoo̱ 104
104
Só xi ndaa̱ Néná
1Ini̱ma̱na tsꞌentsjaà Néná.
¡Ji Ne, Ji xi Néna Ji, achichí je Ji!
Kó xikoó tsi ngo ńjño xi tjiín kjo̱a̱je ko̱jo xi ꞌna̱ kichejé Ji.
2Jí boá xi tindyinjin Ji ngo ndiꞌí xí xikoó tsi ngo ńjñobichitjé,
Jí boá xi jmi Ji nkꞌajmii̱ xikoó tsi ngo ńjñokortina̱.
3Jí boá xi ikꞌíjñí Ji ngi̱ndie nínga nkꞌaa̱, ki̱a̱ nga̱soón ndáfoa xi tikón nkꞌajmii̱,
Jí boá xi ikꞌíjñí Ji karroo̱ kjo̱a̱xcháa̱n ki̱a̱ nga̱són ṉdi̱i̱,
kó xikoó tsi ki̱a̱ ꞌmisén Ji nga̱a̱ tjo̱o̱.
4Jí boá xi tjo̱o̱ boá xi kiniꞌín Ji chji̱ni̱e̱ꞌée̱n,
kó ndiꞌí xí tjítíngaá boá xi kiniꞌín Ji mosòo̱.
5ꞌNiú íjñá nínga tikónsón tꞌanangii̱,
tsi̱ꞌe̱ nga jmíni̱xtjin si̱ꞌantíyaá.
6Xikoó tsi ngo chi̱ngandio akjaꞌmeni Ji ti̱xa̱na̱nga̱a̱ tꞌanangii̱,
kó ki̱a̱ nga̱soón na̱xi̱i̱ kisꞌijña ndáfoaa̱.
7Ta̱nga kjiꞌanga kiniꞌínxchínje̱ Ji tsangaboaꞌá,
nga tsintꞌieé nda̱a̱, kui xi xikoó maá cho̱ꞌo̱o̱n, tsanga má nga kijíboaꞌá.
8Na̱xi̱i̱ kijínijíngí, kó nangi soón kijíjaya,
ngaskande nga jachó ki̱a̱ ngi̱ndie nínga Ji ikꞌíjñíchi̱bo̱e̱e̱.
9Jí boá xi ikꞌíjñíchi̱bo̱e̱ Ji ngo tsindió nínga ka̱májín kjo̱a̱ꞌatjoón,
tsi̱ꞌe̱ nga nginijánjín ku̱i̱ꞌíngandá nginí tꞌanangii̱.
10Ji Ne, Jí boá xi nangiye Ji ndáńchꞌi̱ ki̱a̱ nangi soón, kó kui ndáfoaa̱ xi mongajin na̱xi̱i̱,
11kó ki̱a̱ ꞌbi ndáfoa ngayeje cho̱ tamá xí tjín ngi̱jin kꞌijñaá,
kó tsꞌénkꞌíxió xíndaá bórró kꞌijñaá nga,
12kó ki̱a̱ nga̱ndee̱, ki̱a̱ ꞌbíndo ni̱sie xi tjín nkꞌa jàn,
kó ki̱a̱ tjiaa̱ yaá ndaꞌyaá nga sie.
13Jí boá xi nangiye Ji stsé xí ꞌbi kꞌijñaá, ndeskande nínga tindyin Ji,
kó tꞌanangii̱ tsꞌéntsienii̱ to xi maxchaá ni xi kiniꞌínde Ji.
14Jí boá xi niꞌíntjé Ji kꞌijñaá, tsi̱ꞌe̱ nga ka̱ma skji̱ni̱e̱ cho̱ tjieé,
kó ti̱ Jí boá xi niꞌín Ji nga maxchá xka̱a̱, nganda tsi̱ꞌe̱ ngayeje xotaa̱,
tsi̱ꞌe̱ nga ki̱a̱ kꞌo̱xiéni tꞌanangii̱ pan xi skji̱ni̱e̱,
15ko̱jo kui bino̱ xi tsjaá kjo̱a̱tsja ini̱ma̱a̱ xota̱ nga̱sondiee̱,
ko̱jo kui isti̱ xi tsꞌénꞌna̱ kje̱n,
ko̱jo kui nichinie xi tsjangaꞌniuú ini̱ma̱a̱ xota̱ nga̱sondiee̱.
16Sꞌikitsie maá tsje̱n yá xí tsi̱ꞌe̱ Néná,
kui yákón xi chji̱a̱ni nangi Líbanoo̱ xi Kui ítji̱e̱,
17ki̱a̱ boá nínga tsꞌénda ndo̱bo̱a̱ ni̱siee̱,
kó ki̱a̱ tjiaa̱ yá sipree̱, ꞌbíndo cho̱ singeñaa̱.
18Ki̱a̱ nínga síndo na̱xi̱ xi ꞌniú nkꞌaá, ki̱a̱ ꞌbíndo tindso̱ xi ꞌbé na̱xi̱i̱,
kó ki̱a̱ ngi̱jin ndi̱jo̱ yiꞌii̱, ki̱a̱ ꞌbíndo ndo̱bo̱a̱a̱ chińtsi̱e̱é.
19Jí boá xi kiniꞌínde Ji saá, tsi̱ꞌe̱ nga xcha̱ ni̱xtjin xi tjiín ngo sá,
kó tsꞌueé, be mí chi̱bo̱a̱a̱ nga chjiéngá kꞌo̱sꞌien.
20Jí boá xi ndibéje̱ Ji jñoó, kó ma jñó ngijee̱,
kó kjiꞌa boá nga ꞌbítso̱ma ngayeje cho̱ tamá xí ꞌbé ngi̱jin kꞌijñaá.
21Kuí boá chi̱bo̱a̱a̱ nga kjandayà xandi̱je̱e̱,
kó mongase nichinie xi Ji boeꞌée̱.
22Ta̱nga ngije fotjo nginí tsꞌueé,
monga má nga fí nginí ti̱xa̱na̱xi̱i̱, kó ki̱a̱ foyojofé ngijee̱.
23Kósꞌe̱ kjiꞌá boá nga xota̱ nga̱sondiee̱ fítsꞌénxá,
ngaskande nga mangixón nginí.
24¡Ji Ne, ꞌyá xí ka̱maxki̱i̱ ni xi kiniꞌínde Ji!
Ngayejee̱ nga kiniꞌínde Ji, nga kiniꞌínkjìn Jí kjo̱a̱kjíntakóo̱n.
Jè tjikítsieni nga̱sondiee̱ ngayeje ni xi Ji kiniꞌínde Ji.
25Ki̱a̱ tikón ki̱a̱a̱ ndáchíkón je ko̱jo xi tiyaá,
nínga achichí má cho̱ ko̱jo ni xi tjín ngi̱jii̱n, xi xi̱xi̱ ko̱jo xi yiꞌi.
26Ki̱a̱ boá nínga tjimájin tjotso yiꞌii̱,
kó ki̱a̱ boá nínga tikón lebiataa̱n, kui cho̱ xi Ji kiniꞌínde Ji,
tsi̱ꞌe̱ nga ki̱a̱ ko̱óńtenje̱ Ji.
27Ngayejee̱ nga Ji ndyi̱koyaa,
tsi̱ꞌe̱ nga kjo̱chó chi̱bo̱a̱a̱ nga Ji ko̱e̱ꞌée̱ nichinie.
28Ji boeꞌée̱, kó kui kjíbé,
chjéxꞌé Jí ndse̱, kó ni xi nda ngasee̱ xi tsꞌéntsiee̱ nga kjinie kui.
29Kjiꞌanga ꞌbíꞌmíi̱ kje̱n Ji, ma tsobéjii̱n,
tsi chje̱ꞌéxíi̱n tjo̱ xi kjiendáni, fesón, kó chojo má nginí,
30ta̱nga tsi ko̱na̱ngíyée̱ A̱si̱énni̱xtjìi̱n, manda,
kó ngayeje nga̱sondiee̱ nga matja̱tsi̱e̱ya nginí.
31¡Ji Ne, ngatsjéni̱xtjin ngatꞌíjñá kjo̱a̱jèe̱!
¡Tsjá ngatamaa̱ Néná kjo̱a̱a̱ ngayeje ni xi katsꞌénda Kui!
32Kjiꞌanga Néná kotsijee̱n nga̱sondiee̱, fotsié má,
kó kjiꞌanga tsꞌenjo̱ na̱xi̱i̱, fotjo maá ṉdi̱.
33Néná boá xi sièe̱, nga kotíjña̱ an nga̱sondie,
Néna boá xi siée̱ salmo̱, tji̱e̱nga tikón an nga̱sondie.
34Mejénna nga tsja ngatamaa̱ Néná ni xi tsꞌenkjó án,
kó an achichí tsjá mana kjo̱a̱a̱ Néná.
35¡Ngatjieni xota̱ xi ndyi̱tsꞌènjeé kui nga̱sondiee̱,
kó ngiti̱ ꞌbéjín ngase xota̱ xi ndyi̱tsꞌèn ni xi ꞌniú ndajiín!
¡Ini̱ma̱na tsꞌentsjaà Néná!
¡Nganiꞌántsjaá Néná!
Currently Selected:
Xo̱jo̱n Salmoo̱ 104: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
