Xo̱jo̱n Salmoo̱ 102
102
¡Ji Ne, ngatsjéni̱xtjin nga ku̱i̱ndyin ji!
Én xí katsoó Néná ngo nda̱ xi ndasen kisꞌijña, kó ki̱a̱ kijítsóyà ngindyi̱ko̱n Néná ni xi kamaá.
1¡Ji Ne, ndaꞌyéní nga kuichjiaá,
kó ki̱a̱ ngatjachótꞌaa ni xi xiaán nga ni̱ma̱ kuichjiá an!
2¡Ngata̱ ꞌbíꞌmíjínní kje̱n Ji, ni̱xtjin nga nda̱ ka̱mana!
¡Ti̱ꞌinsénní kjiꞌanga kuichjiájoo!
¡Tsá ti̱ꞌinsén chiíní ni̱xtjin nga Ji kuichjiáa̱!
3Ngatꞌa̱ ni̱xtjinna achichí tsá tsꞌénfí, xikó maá ṉdi̱i̱,
kó ńdana achichí ndakjàn kjima, xikó maá tsi chikín kixí xi tjítíngá.
4Achichí oón ini̱ma̱na, kó xikó maá tsi kꞌijñá xi je kixíꞌniú kjima an.
Kó ngaskande chíyá mána nga nichinie skjíni̱e̱ an.
5Ta̱ngatꞌanii̱ nga achichí askjandá an,
nga ngaskande je ya má ńdana.
6Jè xikoó ngo ni̱sie pelíkano̱ xi fotsoꞌbá nangi kixií kamá an,
jè xikoó ngo jnó xí fotsoꞌbá soboá je kamá an.
7Achichí ńjñána, kó bo̱a̱ kjimana xikó maá ngo ni̱sie
xi tikón soboá ki̱a̱ nkꞌaa̱ ngo ndiꞌa.
8Ndyiojón ndyiojón ndyi̱kjánjo̱na kondra̱na,
kó xota̱ xi mojnókiena, mejeén nga ni xi ndajín ka̱mana.
9Ngaskande ndiso je iskjíni̱e̱ an, xi pan kixiáa̱n,
kó ndándyíkón án je katsꞌenkꞌájìi̱n ni xi katsꞌè an,
10ta̱ngatꞌanii̱ nga achichí ꞌniú kiniꞌínxchín Jí,
ngatꞌa̱ tjón mára kachjaninkꞌéní, sꞌe̱ jaskan akjatéjení.
11Ni̱xtjinna jè bo̱a̱ kjimaa̱ xikó maá ngo tji̱nkꞌi̱én xí tsꞌénfoaꞌa,
kó jè tjíxíꞌniú án xikó maá kꞌijñaá.
12Ta̱nga Ji Ne, ngatsjéni̱xtjin nga tindyin Ji,
kó Jaꞌée̱n ta̱kjiꞌání nga si̱ꞌankjaꞌátsjien.
13Kó Jí ku̱i̱stji̱n Ji, kó ni̱ma̱ ka̱maa̱ na̱xi̱ńdáꞌniú Sioo̱n,
ngatꞌa̱ jè jachó ni̱xtjin nga ni̱ma̱ka̱maa̱ kui,
ngatꞌa̱ jè jachó kui ni̱xtjin xi ikꞌíndaa̱.
14Ngatꞌa̱ mosòo̱ achichí tjoó ndi̱jo̱o̱ na̱xi̱ńdáꞌniú Sioo̱n,
kó ni̱ma̱ maa̱ ngaskande xa̱a̱ nga je ixóndó kuí na̱xi̱ńdáꞌniuú.
15Xota̱ na̱xi̱ńdaá sku̱i̱e̱ndikón Jaꞌeén Néná,
kó ngayeje já ree̱ nga̱sondiee̱, sku̱i̱e̱ndikón kjo̱a̱je xi tjiín.
16Ngatꞌa̱ Néná boá xi sa̱ꞌíndaya nginí na̱xi̱ńdáꞌniú Sioo̱n,
kó xotaa̱ sku̱i̱e̱ nginí kjo̱a̱jee̱.
17Sa̱ꞌínsénríi̱ nga ꞌniú ku̱i̱chji̱a̱a̱ xota̱ xi ni̱ma̱ síndoo̱,
kó sa̱ꞌínchꞌójín kjiꞌanga ku̱i̱chji̱a̱a̱.
18Ngo xo̱jo̱n si̱tꞌa kui nii̱, tsi̱ꞌe̱ nga sku̱i̱e̱ xota̱ xi jaskan kꞌuieé,
tsi̱ꞌe̱ nga sa̱ꞌíntsjaà Néná, kui xota̱ na̱xi̱ńdá xí sꞌe̱ tsí kꞌuieé.
19Ngatꞌa̱ Néná askotsijenjáyani ndeskande Ndiꞌandikoón xí jee̱,
Néná ndeskande nkꞌajmii̱ askotsijen ndá ndaá tꞌanangii̱,
20tsi̱ꞌe̱ nga tsintꞌieé nga ni̱ma̱ ndyi̱tsó xota̱ xi síndoꞌniuú,
ko̱jo tsi̱ꞌe̱ nga ku̱i̱ꞌíndondé xota̱ xi je katseꞌékjo̱a̱ nga si̱ꞌankꞌiee̱n.
21Kó bo̱a̱ tsꞌén kꞌuiyá ki̱a̱ na̱xi̱ńdáꞌniú Sioo̱n Jaꞌeén Néná,
ko̱jo kꞌuiyá ki̱a̱ na̱xi̱ńdáꞌniú Jerusalee̱n kjo̱a̱niꞌántsjaà.
22Kjiꞌanga ngayeje xota̱ na̱xi̱ńdaá, ko̱jo ngi̱ndie nínga botíxomaa̱,
ta̱ ngo tsí ka̱ma nga ka̱matikó, tsi̱ꞌe̱ nga sa̱ꞌínxátꞌaa̱ Néná.
23Tji̱e̱nga tikón an nga̱sondie, Néná jaꞌáxín ngaꞌniúna,
kó chiboa tsí ni̱xtjin katsꞌénkꞌijñána.
24Kósꞌe̱ bi̱ kixiáa̱n:
¡Ji Ne, ngata̱ chjeꞌéxínjíi̱n masien ni̱xtjin nga kotíjña̱ an nga̱sondie!
Ngata̱ Ji, ta̱kjiꞌání bo̱a̱ nga tindyin Ji.
25Jí boá xi kiniꞌínde Ji nga̱sondiee̱ ndeskande nga ítjatsꞌennii̱,
kó nkꞌajmii̱, ni xi katsꞌenda ndse̱ boá.
26Nga ja̱koxi̱ kju̱i̱e̱ kuí xotaa̱, ta̱nga Ji, ngatsjéni̱xtjin nga tindyin Ji,
ngayejee̱ nga kju̱i̱e̱ xikótsꞌèn fe nga maxchá ngo ńjño,
kó xikoó ngo ńjño xi bosíkjo, bo̱a̱ tsꞌén ko̱si̱kje Ji, kósꞌe̱ xcha̱ja ngijee̱.
27Ta̱nga Ji, ti̱ Jíní bo̱a̱, kó jmíni̱xtjin kju̱i̱e̱ nó nga ku̱i̱ndyin Ji.
28Ndií mosoo̱ nda kꞌuíndora,
kó xota̱ tji̱e̱e̱ ꞌniú kꞌuíndora ngindyikin Ji.
Currently Selected:
Xo̱jo̱n Salmoo̱ 102: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
