Nendiꞌamasien 6
6
Jendeoo̱n
1Ta̱nga xota̱ Israee̱l ti̱ katsꞌén nginí ni xi ndajín ngindyi̱ko̱n Néná, kuíni nga Néná yito nó katsꞌénkꞌasꞌien ngi̱ya tsja xota̱ Mandiaa̱n. 2Kó xota̱ Mandiaa̱n achichí nga ndajín katsꞌénjo̱ xota̱ Israee̱l, kó ta̱ngatꞌanii̱ kui nii̱ nga kui xotaa̱ ti̱xa̱na̱xi̱ katsꞌénda, ko̱jo ngi̱ndie nínga ma mindyionꞌmá xi ꞌniú tikón. 3Ngatsjéni̱xtjin nga ngije xota̱ Israee̱l ítji̱e̱ ni tjié, xota̱ Mandiaa̱n, ko̱jo xota̱ Amalee̱k, ko̱jo xota̱ xi kisꞌińdo xtji̱e̱e̱n nínga tjo tsꞌueé kijínijíngí, kó kijíkjánjo̱ kui xotaa̱. 4Kó ki̱a̱ kisꞌińdotꞌa tiñaa̱ nga katsꞌénkjié ni tjieé, ngaskande nangi Ngasa̱, kó nde ngiti̱ índojiín ni xi ka̱ma skji̱ni̱e̱ ngase xota̱ Israee̱l, ti̱nde ngiti̱ índojiín cho̱tsa̱nga̱, ko̱jo cho̱yojo xi̱ꞌin, ko̱jo bórró. 5Ngatꞌa̱ kjiꞌanga kijínijíngí kuí ko̱jo cho̱ tji̱e̱é nga ndyi̱yaꞌa ndiꞌańjñoo̱, achichí kjín kamá xikó maá chjo̱bo̱a̱ nga jachó, kó kui ko̱jo cho̱toꞌoyitsꞌeèn nde kamájín ikꞌíxki̱, bo̱a̱ tsꞌén tsꞌasꞌien ngo nangi nga katsꞌénkjié ngayeje ni xi tjiín. 6Kó ta̱ngatꞌanii̱ xota̱ Mandiaa̱n nga kamá ni̱ma̱ xota̱ Israee̱l, kósꞌe̱ kui xotaa̱, ni̱ma̱ katsó nga tsíchji̱a̱a̱ Néná. 7Kó ngije xota̱ Israee̱l ni̱ma̱ katsó nga tsíchji̱a̱a̱ Néná, ta̱ngatꞌanii̱ xota̱ Mandiaa̱n, 8Néná katsangiyaa̱ xota̱ Israee̱l ngo nda̱chji̱ni̱e̱ꞌén, kui xi bi̱ katsoó nga tsíchji̱a̱jo:
Bi̱ tsó Néná, kui xi Nee̱ xota̱ Israee̱l: Án boá xi tsꞌaxiéjnúꞌun ki̱a̱ nangi Ejipto̱, kó tsꞌaxiéjnúꞌun nínga moso̱ xi kastiñá kamájnú, 9katsꞌendéjnúꞌun ngi̱ya tsja xota̱ Ejiptoo̱, ko̱jo ngi̱ya tsja ngayeje xota̱ xi kjo̱a̱ni̱ma̱ katsꞌénkjaꞌájnú, kui xi tsangatji̱ngíi̱ ngindiee̱ nga kjóchójnú, kósꞌe̱ jún katsjajnúꞌun tꞌanangii̱, 10kó bi̱ kixian an: Án boá xi Nejnú án, ngata̱ ndakonjínmájnúu̱ ne xi tjiín xota̱ Amoo̱r, kui xi síndo ki̱a̱ tꞌanangi nínga tindyiónjnú, ta̱nga jún kandaꞌyáꞌénjínjnúu̱ ni xi kixian an.
11Kósꞌe̱ kjindibá ndítsjie xi Néná, kó ki̱a̱ kisꞌijña ngindie yáꞌáxka̱ xi tikón ki̱a̱ Ofraa̱, kui xi tsi̱ꞌe̱ nda̱ xi ꞌmí Joaa̱, nda̱ xi chji̱a̱ni xota̱ tji̱e̱e̱ Abiesee̱r. Ndií kui nda̱a̱ xi ꞌmí Jendeoo̱n ki̱a̱ kisꞌijña nga tsꞌénbotsieé to ndso̱ko̱a̱n ṉño̱paa̱n, ki̱a̱ ngi̱ndie nínga kaꞌnaxié ndaá tostsi̱je̱è tsi̱ꞌe̱ nga ku̱i̱ꞌíjñaꞌmaa̱ xota̱ Mandiaa̱n. 12Kó ndítsjie xi Néná jatjokjàtꞌaa̱ Jendeoo̱n, kó bi̱ katsoó:
—¡Néná tikónjoo̱, ji nda̱ xi tjingáꞌniuú, ko̱jo xi chꞌokon!
13Kó Jendeoo̱n, bi̱ katsoó:
—Ann a bo̱a̱ ji ndi̱a̱, ja̱ tsi Néná tikónjo̱jne̱, míkjo̱a̱a̱ nga bi̱ kjiꞌi ni xi kjindibániéjne̱. Ñá síndo ngayeje ni xi fíndikónná xi katsꞌén Néná, kui ni xi íni̱jmìjne̱ xota̱ xi xcháná, nga bi̱ katsó: Néná boá xi tsꞌaxiéná ki̱a̱ nangi Ejiptoo̱. Ta̱nga ngotꞌe̱ ꞌne̱, Néná jè íjñámasienjne̱, kósꞌe̱ ki̱a̱ katsꞌénkꞌasꞌienjne̱ ngi̱ya tsja xota̱ Mandiaa̱n.
14Kósꞌe̱ Néná askoꞌá kui nda̱a̱, kó bi̱ katsoó:
—Tꞌen ji, kó ti̱ꞌinkjìn jí ngaꞌniú xí tjiín, kó ka̱maa̱ ko̱ꞌna̱xiéꞌé ji xota̱ Israee̱l ngi̱ya tsja xota̱ Mandiaa̱n. Ngatꞌa̱ án boá xi tsꞌéntsangiyaa.
15Kó Jendeoo̱n, bi̱ katsoó:
—Ann Ndi̱a̱, ta̱nga mí xí sa̱ꞌinkjièn án nga kꞌoxiéꞌá an xota̱ Israee̱l, xi án boá xi ꞌniú chichí ngase an, ngi̱jii̱n xota̱ ndiꞌa xi ꞌniú ni̱ma̱ ngasee̱, xi chji̱a̱ni xota̱ tji̱e̱e̱ Manasee̱.
16Ta̱nga Néná, bi̱ katsó nginií:
—Án boá xi kosiko̱joo, kó ka̱maári si̱ꞌíi̱n xota̱ Mandiaa̱n, xikó maá tsi ta̱ ngo tsí nda̱ xi si̱ꞌíi̱n.
17Kó Jendeoo̱n, bi̱ katsoó:
—ꞌNiú míꞌaá nga tsi nda kasasiee̱n an, te̱ꞌéní ngo chi̱bo̱a̱ nga jí boá xi kandokjo̱e̱jení, 18ngo kjo̱a̱nda, ti̱ndyinra ji kꞌi̱e̱e̱, ngaskande nga kjoéꞌe̱ ngiñá an, nga kjoéꞌe̱joo ngo kjo̱a̱tjó xi kꞌuijñá an ngindyikin ji.
Kó Néná, bi̱ katsoó:
—Nda kjíꞌí, ja̱ kꞌi̱e̱ skoyara an, ngaskande nga kjoéꞌe̱ nginí ji.
19Kósꞌe̱ kijí Jendeoo̱n ngi̱ya ndiꞌaa̱ nga katsꞌénkꞌién ngo ndií tindso̱ xi katsꞌéndani nichinie, kó iskjíbé tie kilo̱ to ndso̱ko̱a̱n ṉño̱pan xi katsꞌéndani pan xi jmí nisanjiín, kósꞌe̱ ngo ni̱se̱nyá indyiá yojoo̱, kó ngo ti̱ji̱í indyiá ndájñaá, sꞌe̱ jataxie, kó ki̱a̱ katsꞌénkꞌasꞌien kui nii̱ ngindie kui yáꞌáxka̱a̱. 20Kó kui ndítsjie xi Néná, bi̱ katsoó:
—Chjábé jí yojoo̱, ko̱jo kui pan xi jmí nisanjiín, kó ki̱a̱ tꞌíjñí ji nga̱són kui ndi̱jo̱jee̱, sꞌe̱ chjatjájìn ji ndájñaá.
Kó Jendeoo̱n bo̱a̱ katsꞌén.
21Kósꞌe̱ ndítsjie xi Néná yején yánísié xi kjiyatsja, sꞌe̱ ítꞌaa̱ ndyi̱ko̱n yánísieé kui yojoo̱, ko̱jo kui pan xi jmí nisanjiín, kó ndiꞌí jatjoni kui ndi̱jo̱o̱, kó kui ndiꞌií ítí kui yojoo̱, ko̱jo kui pan xi jmí nisanjiín. Kósꞌe̱ kui ndítsjie xi Néná kichajá ngi̱jinꞌa̱sièn. 22Kó nga kamábe Jendeoo̱n nga ndítsjie xi Néná boá xi̱ꞌba̱, bi̱ katsó:
—¡Ai xi̱xꞌi̱a̱n xò án Ndi̱a̱, ngatꞌa̱ je kamábe tíkje̱n tíkje̱n an Ndítsjie xi Néná!
23Ta̱nga Néná, bi̱ katsoó:
—¡Ngatꞌieé kjo̱a̱xió! Ngata̱ ndakinjín má ji, ko̱yàjín ji.
24Kó Jendeoo̱n ki̱a̱ katsꞌéndaa̱ ngo ṉchandikón Néná, kó Néná boá xi kjo̱a̱xioó ítꞌajaꞌén, kó ngaskande ngotꞌe̱, to̱kó ki̱a̱ tikón kui ṉchaa̱n ki̱a̱ Ofraa̱, nangii̱ xota̱ tji̱e̱e̱ Abiesee̱r.
25Kó ti̱kuii ni̱xtji̱e̱n Néná, bi̱ katsoó Jendeoo̱n:
Chjábé jí cho̱yojo xi̱ꞌin xi ma joó xi síndoo̱ tsi̱ꞌe̱ na̱ꞌmíi̱, kui xi je tjiín yito nó, kó kuí ti̱ꞌinkjìn jí nga ti̱ꞌinkjatsén jí ṉchaa̱n ne Baa̱l xi tikoón na̱ꞌmíi̱, kó ti̱ꞌinkjatsén jí a̱sie̱én na̱ ne Aseraa̱ xi tikóntꞌaa̱ kui ṉchaa̱n nga. 26Kó ti̱ꞌinde ji ngo ṉchan xi tsa̱ꞌa̱n ki̱a̱ nínga nda kꞌuié, ki̱a̱ nga̱són nkꞌaá kui ndi̱jo̱jee̱, kósꞌe̱ kachjábé jí kui cho̱yojo xi̱ꞌii̱n, kó ti̱ꞌinkꞌasꞌinní ngo kjo̱a̱tjó xi kui cho̱yojoo̱, nga chikín si̱ꞌin jí yaá a̱sie̱én na̱ ne Asera̱ xi je kiniꞌínkjatsén jí.
27Kósꞌe̱ Jendeoo̱n tsíchji̱a̱a̱ tie já xí mosoo̱, kó bo̱a̱ katsꞌén xikó katsoó Néná. Ta̱nga katsakjónnií xtín xota̱ ndiꞌaa̱ na̱ꞌmii̱, ko̱jo já xí chji̱a̱ni na̱xi̱ńdáꞌniuú, kuíni nga ta̱sá nga kamájñoó nga katsꞌén kui nii̱.
28Nga kamángindyiojón, nga jastjíe̱n xota̱a̱ na̱xi̱ńdáꞌniuú, kamábe nga ṉchaa̱n ne Baa̱l je kiniꞌánkjatsón, kó nga ti̱ kiniꞌánkjatsón a̱sie̱én na̱ ne Asera̱ xi tikóntꞌaa̱ kui ṉchaa̱n, ko̱jo nga kui cho̱yojo xi̱ꞌii̱n je kjo̱a̱tjó kiniꞌán nga kiniꞌánkꞌasꞌien ki̱a̱ nga̱soón ṉchan xi kamándaa̱. 29Kó xota̱ xi chji̱a̱ni na̱xi̱ńdáꞌniuú, ja̱kꞌi̱e̱ ja̱ngaján bi̱ katsoó xkjín: ꞌYá xí katsꞌén kui nii̱.
Kó ngije tsangaseya, bi̱ kiꞌmií: Jendeoo̱n ndií Joaa̱ boá xi bo̱a̱ katsꞌén.
Kósꞌe̱ já xí chji̱a̱ni na̱xi̱ńdáꞌniuú, bi̱ katsoó Joaa̱:
30—ꞌNa̱xié jí ndíi̱ tsi̱ꞌe̱ nga si̱ꞌankꞌienjne̱, ngatꞌa̱ kuí boá xi katsꞌénkjatsón ṉchaa̱n ne Baa̱l, kó ti̱ katsꞌénkjatsón a̱sie̱én ne Asera̱ xi tikóntꞌa ki̱a̱a̱ nga. 31Ta̱nga Joaa̱, bi̱ katsoó ngayeje kui xotaa̱:
—A ndyi̱niꞌánxchánjnú jún kjo̱a̱a̱ nganda tsi̱ꞌe̱ Baa̱l. Axa̱ mejénjnú nga jún kongínjindajo̱jnú. Ta̱ꞌyaní xi sa̱ꞌínxchán ngatꞌaa̱ Baa̱l, kui ndibáꞌásie̱én ko̱yà. Tsi kui xi ne, ja̱ ti̱kuii nga tsꞌénxchánjo̱ kui xi katsꞌénkjatsón ṉchaa̱n.
32Kó kui ni̱xtjii̱n Jendeoo̱n, Jerobaa̱l ikítꞌa jaꞌén, Baa̱l nga kjánjo̱ kjo̱a̱a̱ xi katsꞌénkjatsón ṉchaa̱n, tsó kui jaꞌeén.
33Ta̱nga ngayeje xota̱ Mandiaa̱n, ko̱jo xota̱ Amalee̱k, ko̱jo xota̱ xi síndo xtji̱e̱e̱n nínga fotjo tsꞌueé ngo tjín katsꞌén yojoo̱, sꞌe̱ ngije jaꞌaxtikjá ndejeèꞌ, ki̱a̱ índo ndiꞌańjñoo̱ ki̱a̱ nangi soón Jesree̱l. 34Kósꞌe̱ A̱si̱énni̱xtjii̱n Néná kjindibánié Jendeoo̱n, kó katsꞌénkjanie ndi̱ja̱a̱ cho̱tsa̱nga̱a̱, sꞌe̱ xota̱ tji̱e̱e̱ Abiesee̱r kamátikójo̱. 35Kó ti̱ katsangiya xota̱ chji̱ni̱e̱ꞌén ngayeje nangii̱ xota̱ tji̱e̱e̱ Manasee̱, kó ti̱ ki̱a̱ nijan kamátikójo̱ kui xotaa̱ nga, kó ti̱ katsangiyaa̱ xota̱ chji̱ni̱e̱ꞌén xota̱ tji̱e̱e̱ Asee̱r, ko̱jo xota̱ tji̱e̱e̱ Sabuloo̱n, ko̱jo xota̱ tji̱e̱e̱ Neftalii̱, kó ki̱a̱ kijíkjaꞌáyíndi̱yà xkjín.
36Sꞌe̱ Jendeoo̱n, bi̱ katsoó Néná:
Tsi ja̱koxi̱ nga an si̱ꞌinkjìnní, tsi̱ꞌe̱ nga kꞌoxiéꞌá an xota̱ Israee̱l xikó kase ji, 37te̱ꞌéndièní nga kꞌuijñá an ngo tji̱xi̱ín xí tjiín tsa̱nga̱ ki̱a̱ ngi̱ndie nínga niꞌántsjie to ndso̱ko̱a̱n ṉño̱paa̱n. Tsi nga ta̱jño̱ó kui tsa̱nga̱a̱ katsꞌénkꞌandyi̱ xoñoo̱, ta̱nga tsi tikón kixí tꞌanangii̱, kjiꞌá boá nga skuie an nga ja̱koxi̱ boá nga an si̱ꞌinkjìnní, tsi̱ꞌe̱ nga kꞌoxiéꞌá an xota̱ Israee̱l, xikó má kase ji.
38Kó bo̱a̱ kamá, ngatꞌa̱ kjiꞌanga jastjíe̱n Jendeoo̱n nga ta̱jñóyaà, katsꞌéntsꞌingí kui tji̱xi̱ín, kó ngo tasa̱ kamá ndáfoaa̱ xoñoo̱ xi tsꞌaxié. 39Kósꞌe̱ Jendeoo̱n, bi̱ katsoó Néná: Ngata̱ ánjín niꞌínxchínje̱ní tsi ingo ndi̱yà kuichjiá ngase an. ꞌNiú míꞌaá nga ko̱e̱ꞌéndièní nga skotꞌa ngiñá an kui tji̱xi̱ín. Kó míꞌaá nga kui tji̱xi̱ín kꞌuijñá kixí, kó xoñoo̱ ngatsꞌénkꞌándyi̱ tꞌanangii̱.
40Kó kui ni̱xtji̱e̱e̱n, bo̱a̱ katsꞌén Néná, ta̱kuítsí kui tji̱xi̱ín xi kisꞌijña kixí, kó ngayeje tꞌanangii̱ nga xoñoo̱ xi katsꞌénkꞌandyi̱.
Currently Selected:
Nendiꞌamasien 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
