Nendiꞌamasien 7
7
Jendeoo̱n katsꞌeén xota̱ Mandiaa̱n
1Ngo ndi̱yà Jerobaa̱l, kui xi Jendeoo̱n kiꞌmií, achichí ta̱jñó jastjíe̱n, kó ngayeje xota̱ na̱xi̱ńdaá ki̱a̱ nijan síndojo̱, kó ki̱a̱ katsꞌénkjaꞌyá ki̱a̱ tiñaa̱ ndáńchꞌi̱ Aroo̱nd, kó ngi̱ndie nínga síndo ndiꞌaa̱ xota̱ Mandiaa̱n ki̱a̱ kisꞌijñanii̱ xtji̱e̱e̱n ta̱ꞌin, kjin ngasenii̱ na̱xi̱ Moree̱, ki̱a̱ nangi soón.
2Kó Néná, bi̱ katsoó Jendeoo̱n:
Xota̱ na̱xi̱ńdá xí kꞌi̱e̱ síndojoo̱ achichí kjín má, tsi̱ꞌe̱ nga ngi̱ya tsja kui sa̱ꞌínkꞌasꞌien an xota̱ Mandiaa̱n, kó tsi ndajín ni̱xtjin ka̱ma nkꞌakon nga kondra̱na ka̱ma, kósꞌe̱ bi̱ ka̱tso̱: Ji̱n boá xi kaꞌnaxiéꞌá so̱bo̱a̱jne̱ yojojne̱. 3Kuíni nga ꞌniú ndókjo̱e̱je ji xota̱ na̱xi̱ńdaá, nga bo̱a̱ tꞌíi̱n nga kui xi tsiendikoón, ngatjastjíe̱n, kó ngatjíꞌoyá nginí ndiꞌaa̱ ki̱a̱ na̱xi̱ Ngalaa̱nd.
Kó kan jó mi̱ ma jáxíꞌín xi kijíꞌoyá nginí, kó ngi tie mi̱ ma xi kisꞌińdo ngase. 4Sꞌe̱ Néná, bi̱ katsoó Jendeoo̱n: To̱kó achichí kjín má ngase xota̱ na̱xi̱ńdaá, tꞌenje̱ ji ki̱a̱ tꞌa ndaá, tsi̱ꞌe̱ nga ki̱a̱ skotꞌayákón an, kó tsi an bi̱ xiaán: Ngatjíjoo̱ kui xi̱ꞌbi̱, ja̱ kjo̱joo̱ kui xi̱ꞌba̱, kó tsi ko̱e̱je̱jojiín kui xi̱ꞌbi̱ xiaán, ja̱ ko̱e̱je̱jín xi̱ꞌba̱.
5Kósꞌe̱ Jendeoo̱n kijíjo̱ xota̱ na̱xi̱ńdaá ki̱a̱ tꞌa ndaá, kósꞌe̱ Néná bi̱ katsoó: Xín tꞌínde ji ta̱ꞌya xota̱ní xi skjíbé ndáfoa ngi̱ya tsja kó xto̱mójón xikótsꞌèn ńñaá, ko̱jo xín tꞌínde ji ta̱ꞌyaní xi ko̱siéntikoó nga kꞌuí ndáfoaa̱.
6Kó ján úchán kamá xota̱ xi iskjíbé ndáfoaa̱ ngi̱ya tsja kó katomájón, kó ngayeje xota̱ xi ngasee̱ tikoó indyiá nga katsꞌe. 7Kósꞌe̱ Néná, bi̱ katsoó Jendeoo̱n: Kui xi ján úchán xota̱ xi katomájón ndáfoaa̱ xi kꞌoxiéꞌánijnú an. Kó ngi̱ya ndse̱ ji sa̱ꞌinkꞌasꞌien an xota̱ Mandiaa̱n. Ngayeje xota̱ xi ngasee̱ ngatjí nginí ndiꞌaa̱.
8Kó ngije Jendeoo̱n tsíꞌaá nisaa̱ ko̱jo tjio xi ndi̱ja̱a̱ cho̱tsa̱nga̱a̱ kui xotaa̱, katsangiya ngayeje xota̱ Israee̱l tsi̱ꞌe̱ nga ko̱e̱je̱ nga ngo nga ngo ndiꞌaa̱, kó kisꞌińdora xi ján úchán jáxíꞌiín, kó ndiꞌańjñoo̱ xota̱ Mandiaa̱n ki̱a̱ kisꞌińdo xtji̱e̱e̱n nangi soón.
9Sꞌe̱ kui ni̱xtji̱e̱e̱n, Néná bi̱ katsoó Jendeoo̱n: Ti̱sítji̱n ji, kó tꞌenja̱ye nga ku̱i̱xkénje̱ ji xota̱ Mandiaa̱n, ngatꞌa̱ jè ngi̱ya ndse̱ ji katsꞌenkꞌasꞌien an. 10Kó tsi ndakin má nga kꞌuinjáyé ji, ta̱sá tꞌenje̱ ji nda̱ mosòo̱ xi ꞌmí Furaa̱, 11kó ndaꞌyée̱ ni xi ndyi̱chji̱a̱ xota̱ Mandiaa̱n, sꞌe̱ chjábé jí ngaꞌniú jí, kó tꞌenja̱ye ji nínga síndo ndiꞌaa̱, sꞌe̱ ti̱xkénje̱ ji.
Kó Jendeoo̱n ko̱jo nda̱ moso̱ Furaa̱, kijíjaya ngaskande nínga síndo xota̱ xi ndyi̱konda ndiꞌaa̱. 12Xota̱ Mandiaa̱n, ko̱jo xota̱ Amalee̱k, ko̱jo xota̱ xi síndo xtji̱e̱e̱n nínga fotjo tsꞌueé, ki̱a̱ kisꞌińdo nangi soón nga achichí kamá xikó maá chjo̱bo̱a̱a̱, kó cho̱toꞌoyitsꞌeèn achichí kjín kamá xikó maá tsomí xí tjín nga̱ndee̱ ndáchíkoón nga. 13Kó nga jachó Jendeoo̱n nínga síndo ndiꞌańjñoo̱, tsintꞌié nga ngo nda̱ tsꞌéntsóyaà kje̱ꞌe nda̱ ni xi tseꞌéchi̱nii̱, nga bi̱ katsoó:
—Ngo chi̱ni tseꞌéna xi bi̱ tsó: Kamábe an ngo pan sebanda̱ xi tsangatjíkjayà ngaskande nínga síndo ndiꞌańjñoo̱ xota̱ Mandiaa̱n, kó ki̱a̱ kastietꞌaa̱, sꞌe̱ katsꞌénkjatsón ndeskande ngindiee̱, ngaskande nkꞌaa̱ kui ndiꞌańjñoo̱, kó kui ndiꞌańjñoo̱ ixó.
14Kó kui nda̱ xi ingoo̱, bi̱ katsoó:
—Kui chi̱nii̱, kuí ni xi mejeén tsó nga ki̱cha̱ndojoó Jendeoo̱n boá, kui xi ndií Joaa̱, nda̱ xi chji̱a̱ni Israee̱l, ngatꞌa̱ Néná boá xi je ngi̱ya tsja katsꞌénkꞌasꞌien xota̱ Mandiaa̱n, ko̱jo ngayeje ngi̱ndie nínga síndo ndiꞌaa̱.
15Kó nga tsintꞌié Jendeoo̱n ni xi katsoó chi̱ni kui nda̱a̱, katsꞌéntsjaà Néná, kósꞌe̱ kijí nginí nínga síndo jájuún, kó bi̱ katsó nga katsjákjo̱a̱: ¡Ti̱sítji̱e̱njnú! Ngatꞌa̱ Néná jè katsꞌénkꞌasꞌienná ndiꞌańjñoo̱ xota̱ Mandiaa̱n ngi̱ya ndsa̱.
16Kó ján tjín katsꞌén xi ján úchán jáxíꞌiín, kó ngayejee̱ nga katsjaá ngo tjio, ko̱jo ngo ti̱ji̱í xí tjiyá ngi̱yaa̱ ngo to̱ko̱yándíꞌí xi tjítí. 17Kó bi̱ katsoó: An tsitsíjenjnúꞌun, kó bo̱a̱ ti̱ꞌánjnú xikó tjítsꞌen an, kó ngije kjóchó an xi ingoboaá nínga síndo ndiꞌańjñoo̱, ti̱ bo̱a̱ ti̱ ti̱ꞌánjnú ndatsa jún nga. 18An ko̱jo ngayeje xota̱ xi síndojo̱na si̱ꞌankjaniéjne̱ tjioo̱, kósꞌe̱ jún ti̱ si̱ꞌankjaniéjnú nga ngo foaꞌatjiyajoo̱n nínga síndo ndiꞌańjñoo̱ nga, kó bi̱ kꞌuínjnú: ¡Ta̱ngatꞌanii̱ Néná, ko̱jo ta̱ngatꞌanii̱ Jendeoo̱n!
19Kó jachó Jendeoo̱n, ko̱jo kui xi úchán jáxíꞌín xi tji̱e̱njo ki̱a̱ nínga fetꞌanii̱ nínga síndo ndiꞌańjñoo̱, mejeén nga ꞌbítsi̱yanii̱ xaá nda̱ xi konda nga ma masien ni̱xtji̱e̱e̱n, kjiꞌanga sasíkjo xi kondaa̱, kó katsꞌénkjanie tjioo̱, kósꞌe̱ akján ti̱ji̱í xí ndyi̱yaꞌa, 20kó nga ján kui xtín xotaa̱, katsꞌénkjanie tjioo̱, kó ti̱ akján ti̱ji̱í nga, sꞌe̱ tsja xi skoón iskjíbéní kui to̱ko̱yándíꞌií, kó tsja xi kixi̱i̱ katsꞌénkjanieni tjioo̱, kósꞌe̱ bi̱ katsó nga askjandáyà: ¡Ta̱ngatꞌanii̱ ki̱cha̱ndojoó Néná, ko̱jo ta̱ngatꞌanii̱ ki̱cha̱ndojoó Jendeoo̱n!
21Kó nga ngo nga ngo xota̱ Israee̱l ꞌniú kixindyia ki̱a̱ ngi̱ndie xi kasakoo̱ nga kꞌuíndo, nga ngo foaꞌatjiyajoo̱n nínga síndo ndiꞌaa̱, kósꞌe̱ ngayeje jájuún katsakjónní, kó askjandáyà má tsanga. 22Kó kjiꞌanga kui xi ján úchán jáxíꞌiín katsꞌénkjanie tjioo̱, Néná katsꞌén nga xota̱ Mandiaa̱n, ti̱kuii askjanjo̱ xkjín ngayeje nínga síndo ndiꞌańjñoo̱. Kó jájuún tsanga ngaskande Bee̱t-Sitaa̱, xtji̱e̱e̱n nangi Serera̱, ko̱jo ngaskande tsindioó nangi Abee̱-Meolaa̱, tiñaa̱ nangi Tabaa̱t.
23Kósꞌe̱ ngayeje xota̱ Israee̱l xi chji̱a̱ni xota̱ tji̱e̱e̱ Neftalii̱ kamátikó, ko̱jo xi chji̱a̱ni xota̱ tji̱e̱e̱ Asee̱r, ko̱jo xi chji̱a̱ni xota̱ tji̱e̱e̱ Manasee̱, kó kijítji̱ngii̱ xota̱ Mandiaa̱n, 24kósꞌe̱ Jendeoo̱n, ti̱ katsangiya chji̱ni̱e̱ꞌén ngayeje na̱xi̱ xi chji̱a̱ni xota̱ tji̱e̱e̱ Efraii̱n, tsi̱ꞌe̱ nga bi̱ ka̱tso̱: ¡Ndibajáyájnú, kó ti̱xkánjo̱jnú xota̱ Mandiaa̱n, kó ti̱ndyionxtíkjájnú nínga ma bitjatioó xo̱ngàndántꞌié Bee̱t-Baraa̱ ko̱jo ndejèꞌ Jorndaa̱n, ngindiee̱ nga kjo̱chó kui xotaa̱ ki̱a̱a̱!
Kósꞌe̱ xota̱ tji̱e̱e̱ Efraii̱n ki̱a̱ kamátikó, kó kisꞌińdoxtíkjá ki̱a̱ nínga ma bitjatioó xo̱ngàndántꞌié Bee̱t-Baraa̱ ko̱jo ndejèꞌ Jorndaa̱n, 25kó ki̱a̱ katsoboá Oree̱b, ko̱jo See̱b, jó já xí tjiín xá, xí chji̱a̱ni xota̱ Mandiaa̱n, kó ki̱a̱ Ndi̱jo̱jee̱ Oree̱b katsꞌénkꞌién Oree̱b, kó See̱b ki̱a̱ katsꞌénkꞌién nínga ꞌnaxié ndaá tostsi̱je̱è See̱b, kósꞌe̱ ngije kijítji̱ngii̱ xota̱ Mandiaa̱n, tsangínjoo̱ Jendeoo̱n ki̱a̱ xi ingoboá ndejèꞌ Jorndaa̱n to̱ko̱ Oree̱b, ko̱jo to̱ko̱ See̱b.
Currently Selected:
Nendiꞌamasien 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
