Nendiꞌamasien 5
5
Só xi kisie na̱ Ndéboraa̱ ko̱jo Baraa̱k
1Kui ni̱xtjin jàn kisie ngo só na̱ Ndéboraa̱ ko̱jo Baraa̱k, ndií Abinoaa̱n, kó bi̱ tsó kui soó:
2¡Ti̱ꞌantsjàjnúu̱ Néná!
Ngatꞌa̱ índoo̱ ngito̱ko̱ xota̱ na̱xi̱ńdá Israee̱l,
ko̱jo ta̱ngatꞌanii̱ nga ngayeje kon xota̱ na̱xi̱ńdaá nga kijí kjo̱a̱xcha̱án.
3Ndaꞌyájnú jún re, tasiénijónjnúꞌun jún xota̱ xí tjiín xá,
nga án boá xi siée̱, xi siée̱ ngo só Néná,
siée̱ salmo̱ Néná, kui xi Nee̱ xota̱ Israee̱l.
4Ji Ne, kjiꞌanga akjatje ji na̱xi̱ńdáꞌniú Seii̱r,
ko̱jo kjiꞌanga kꞌin ji xtji̱e̱e̱n kꞌijñaá xota̱ tji̱e̱e̱ Endoo̱n,
tꞌanangii̱ jatsié, nkꞌajmii̱ janie, sꞌe̱ ṉdi̱i̱ ixóni stseé.
5Jatsié má na̱xi̱i̱ ngindyi̱ko̱n Néná,
ngaskande ti̱kuii na̱xi̱ Sinaii̱ jatsié ngindyi̱ko̱n Nee̱ xota̱ Israee̱l.
6Ni̱xtjin nga kisꞌijña Samngaa̱r ndií Anaa̱t,
ko̱jo ni̱xtjin nga kisꞌijña na̱ Jaee̱l,
ndajín kamátaꞌin xota̱ xi jaꞌa ndi̱yà ꞌniuú kui nangii̱,
kó xotaa̱ ndi̱yàngí kisꞌiṉtso̱mani.
7Ndí nangi xi chji̱a̱ni Israee̱l kisꞌińdomasien,
ngaskande nga an, na̱ Ndéboraa̱, katjoꞌójin an, xikoó na̱aa̱n xota̱ Israee̱l.
8Kjiꞌanga xota̱ Israee̱l jaꞌájin ne xi tja̱tsi̱e̱,
je tikónda má kjo̱a̱xcha̱án nga̱ntjo̱a̱a̱ na̱xi̱ńdáꞌniuú,
kó, a kamáyà ni xi ꞌbíchjánii̱ ni xi ndajiín ko̱jo yáyojoó
ki̱a̱ ngi̱jii̱n yichán mi̱ xota̱ Israee̱l.
9Tsꞌenkꞌasꞌiée̱n ini̱ma̱na ngito̱ko̱o̱ xota̱ Israee̱l,
ko̱jo kui xi ngayejeni kon nga kijí kjo̱a̱xcha̱án.
¡Ti̱ꞌantsjàjnúu̱ Néná!
10Jún xota̱ xi mindyionsónjnúu̱ bórró chjo̱on xí tiboa,
ko̱jo jún xi mindyionsónjnú yáxíríe̱ nga niꞌándajinjnú kjo̱a̱,
ko̱jo jún xi mińtja̱jnú ndi̱ya̱à, nda má ti̱ꞌankjójnú.
11ꞌNiú ngase nda̱jnú ki̱a̱ nínga síndo ndáńchꞌií, ta̱bo̱a̱jiín xota̱ xi kjiní yáyojó,
ki̱a̱ nínga ma sꞌué ngije katsꞌén Néná,
kósꞌe̱ kjiꞌa boá nga jájuún Néná kjo̱chó ki̱a̱ tꞌa nga̱ntjo̱a̱a̱ na̱xi̱ńdáꞌniuú.
12Ti̱sítji̱n ji, ti̱sítji̱n ji na̱ Ndéboraa̱,
ti̱sítji̱n ji, ti̱sítji̱n ji, kó ndè jí ngo só,
ti̱sítji̱n ji Baraa̱k ndií Abinoaa̱n,
tꞌenje̱ ji xota̱ xi ndyi̱a̱ꞌniuú.
13¡Jún xota̱ xi tsꞌangi ngase, jún tatíxomájnúu̱ xota̱ xi tjiín ngaꞌniuú!
¡Kó jún xota̱ na̱xi̱ńdaá Néná, jún tatíxomájnúu̱ xota̱ xi kjaán!
14Nangii̱ xota̱ tji̱e̱e̱ Efraii̱n kjindibáni xota̱ na̱xi̱ńdaá nga askjanjo̱ xota̱ Amalee̱k,
kó ko̱jo xota̱ ndiꞌaa̱ Benjaa̱ kijítji̱ngii̱ nga,
kó xota̱ tji̱e̱e̱ Makii̱r kjindibáni xota̱ xi kamá ngito̱ko̱o̱,
kó xota̱ tji̱e̱e̱ Sabuloo̱n kjindibáni xota̱ xi atíxomaa̱.
15Kó xota̱ ngito̱ko̱ xi chji̱a̱ni xota̱ tji̱e̱e̱ Isakaa̱r kijíkoón na̱ Ndéboraa̱,
xikó katsꞌén Baraa̱k, ti̱ bo̱a̱ katsꞌén Isakaa̱r nga,
kó ki̱a̱ tsangínjo̱ yise ki̱a̱ nangi soón,
ngi̱jii̱n xota̱ tji̱e̱e̱ Rubee̱n,
achichí kamá ni xi katsꞌéndajin nga ngayeje ini̱ma̱a̱.
16Xota̱ tji̱e̱e̱ Rubee̱n, katsjájiín kon nga kijí kjo̱a̱xcha̱án,
kó ta̱sá ki̱a̱ nijan kisꞌińdojo̱ cho̱tsa̱nga̱a̱ ki̱a̱ nchꞌoaá,
nga tsintꞌieé nga ndyi̱kjandayà kui cho̱o̱.
17Tji̱e̱nga xota̱ Ngalaa̱nd ki̱a̱ ndyi̱tsꞌènkjaꞌyá ki̱a̱ xi ingoboaá ndejèꞌ Jorndaa̱n,
ánní nga tá tsie kjiꞌbondíyaá tjotso yiꞌii̱ xi ndyi̱ndibayá xota̱ tji̱e̱e̱ Ndaa̱n,
kó xota̱ tji̱e̱e̱ Asee̱r a ki̱a̱ síndotꞌa ndáchíkoón,
kó, a xió síndo ki̱a̱ tꞌa ndáchíkón nínga fochó tjotso yiꞌii̱.
18Xota̱ tji̱e̱e̱ Sabuloo̱n ndasénjín kamaá yojoo̱ ngaskande kjo̱a̱bo̱yaa̱,
kó xota̱ tji̱e̱e̱ Neftalii̱ ndasénjín kamaá yojoo̱ nga askjan ki̱a̱ na̱xi̱i̱.
19Jeꞌe ree̱, kó askjan, askjan re xi chji̱a̱ni nangi Kanaa̱n,
ki̱a̱ na̱xi̱ńdáꞌniú Taanaa̱k, ki̱a̱ tꞌa ndáfoa xi tjín na̱xi̱ńdáꞌniú Mengindoo̱,
ta̱nga jmí ni xi to̱ntiboa kijíjo̱jín.
20Ngatꞌa̱ ndeskande nkꞌa jàn askjanni ńñoo,
ndeskande ndi̱yà nínga foaꞌa, askjanjo̱ni Sísaraa̱.
21Kó kijítjiboajo̱ ngaꞌniuú ndáfoaa̱ xo̱ngàndántꞌié Sisoo̱n,
kui ndáfoa xi je xchá tikónnii̱, ndáfoaa̱ xo̱ngàndántꞌié Sisoo̱n,
¡ngatꞌieé ngaꞌniú nga kꞌuínrá ji ini̱ma̱!
22Kósꞌe̱ kandaꞌyaá ki̱cha̱se ndi̱je̱e̱,
ngatꞌa̱ bo̱a̱ fí bo̱a̱ ndibá katsꞌén kui cho̱o̱.
23Chꞌo tꞌínjnúu̱ na̱xi̱ńdáꞌniú Meroo̱, tsó ndítsjie xi Néná,
ꞌniú chꞌo tꞌínjnúu̱ tsi̱ꞌe̱ nga ndajín ka̱maa̱ xota̱ xi síndo ki̱a̱a̱,
ngatꞌa̱ kijíjín nga kijíkasikójo Néná,
ko̱jo kijíjín nga kijíkasikójo xota̱ xi chꞌokoo̱n.
24¡Ngatamachikonñé na̱ Jaee̱l ngi̱jii̱n ínchjiín,
kui xi chjo̱ón Jebee̱r, nda̱ kenitaa̱,
ꞌniú ngatamachikonñé ngi̱jii̱n ínchjín xí chji̱a̱ni xota̱ ndiꞌaa̱!
25Sísaraa̱ ndáfoa tsíꞌá, kó ntsjén katsjaá,
kó ngo ni xi ꞌbiyá ni xota̱ xi nkꞌa xaá indyiaá nga katsjaá nataa̱ ntsjén,
26kósꞌe̱ tsja xi skón iskjíbéní yáyojoó,
kó tsja xi kixi̱i̱ iskjíbéní ki̱cha̱ xi ꞌbínieé,
sꞌe̱ asieén to̱ko̱ Sísaraa̱, kó katsꞌénkjaꞌaxtikjaá ta̱ꞌii̱n ńdatꞌanijon.
27Kó ítikó má yojoo̱ nga tsꞌáka ki̱a̱ tꞌanangii̱,
ki̱a̱ tꞌa se na̱ Jaee̱l, nínga ítikó yojoo̱, ki̱a̱ kꞌien.
28Kó na̱aa̱n Sísaraa̱ askotsijen xtji̱e̱e̱n nga̱ntjo̱a̱masienkjaá,
kó ngi̱jii̱n ndi̱jo̱ selosiyaa̱, bi̱ katsó:
Ánní nga tá tsie kjiꞌbondíyaá karro̱ kjo̱a̱xcha̱án.
Ánní nga kasasienxió kon ni ńtsoó karro̱ kjo̱a̱xcha̱án.
29Kó kui ínchjín xí yandikón xi ꞌniú kjínkón ngasee̱
ko̱jo kui xota̱chjo̱on tsíchji̱a̱jo xkjín nga bi̱ katsó:
30A jè tikoón ni xi kasakoo̱ kjo̱a̱xcha̱án, nga jè ndyi̱tsꞌénkábií xkjín tsobo̱a̱,
ngo ko̱jo tsi jó ínchjín xo̱ngò nga ngo xota̱jun sa̱ko̱ó,
kó Sísaraa̱ ngateꞌeé poño xi kjín a̱sie̱én,
kó ńjño chji̱ni̱e̱ xi kjín a̱sie̱én, ki̱a̱ ngatꞌijñaá kjásén xota̱ xi katsꞌeén.
31¡Bo̱a̱ tsꞌén ngatjiesón ngayeje kondraa̱ ji Ne!
Ta̱nga xota̱ xi tjoó ji, nga sakóngáꞌniuú xikó maá nga ꞌna̱ ma ndiꞌií tsꞌueé nga tjo.
Kó yichán nó nga kisꞌie kjo̱a̱xió tꞌanangii̱.
Currently Selected:
Nendiꞌamasien 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014