2 Já ree̱ 6
6
Eliseoo̱ ko̱jo jacha̱ xi tsꞌáka ngi̱jin ndejeèꞌ
1Kó ndií jáchji̱ni̱e̱ꞌe̱én Néná, bi̱ katsoó Eliseoo̱:
—Achichí xkjó májne̱ kui ngi̱ndie nínga nijan tindyión ji ko̱jo ji̱n. 2ꞌNiú chjiaꞌájne̱ ji nga ko̱e̱ꞌéndièjne̱ nga kongínjne̱ xtji̱e̱e̱n ndejèꞌ Jorndaa̱n, kó nga ngo nga ngojne̱ kongínchjaꞌájne̱ ngo yándojó, kó nga ka̱ma nga ki̱a̱ si̱ꞌandajne̱ ngo ngi̱ndie nínga ku̱i̱ndyión.
Kó bi̱ katsó Eliseoo̱:
—Tangínjnú.
3Ta̱nga ngo kui jaá xi bi̱ katsó:
ꞌNiú chjiáꞌájne̱ ji nga kꞌuínje̱ ji kui já mosòo̱.
Kó bi̱ katsó kui Eliseoo̱:
Ka̱ma kjuín án.
4Kó kijíjo̱ kui jaá, kó nga jachó ki̱a̱ ndejèꞌ Jorndaa̱n, yeꞌeé jó yá. 5Kó kjiꞌanga ngo kui jaá xi tsꞌénbeꞌeé ngo yaá, ki̱a̱ tsꞌáka jachaa̱ ngi̱jin ndáfoaa̱, kó bi̱ katsó nga askjandáyà:
¡Ai ndi̱a̱, ta̱ kiniꞌánkíyána kui jachaa̱!
6Kó kui nda̱ xi chji̱a̱ni Néná, bi̱ katsó nga asíyaá:
—Ñá xtji̱e̱e̱n tsꞌáka. Kó kui nda̱a̱ akoó kui ngi̱ndiee̱. Kósꞌe̱ Eliseoo̱ ngo yá tsatie, kó ki̱a̱ tsꞌajmi ngi̱jin ndáfoaa̱, kó kui jachaa̱ kitsjiensón nga̱són ndáfoaa̱. 7Sꞌe̱ Eliseoo̱, bi̱ katsó:
—Chjábé jí.
Kó kui nda̱a̱ yején tsja, kó iskjíbé kuí jachaa̱.
Eliseoo̱ ko̱jo jájuún nangi Siriaa̱
8Ngo ndi̱yà kjiꞌanga nda̱ ree̱ nangi Siria̱ askjanjo̱ xota̱ Israee̱l, tsíchji̱a̱jo já mosoo̱ nga bi̱ katsoó: Kui ngi̱ndiee̱ kꞌuijñá an ngi̱ndie nínga kꞌuíndo ndiꞌańjñoo̱.
9Kósꞌe̱ kui nda̱ xi chji̱a̱ni Néná, bi̱ katsó én xí katsangiyaa̱ nda̱ ree̱ na̱xi̱ńdá Israee̱l: Chíi̱n nga ki̱a̱jín ku̱i̱tje jí kui ngi̱ndiee̱, ngatꞌa̱ xota̱ Siriaa̱ ki̱a̱ kjo̱a̱ꞌajaya. 10Kó nda̱ ree̱ na̱xi̱ńdá Israee̱l katsangiya xota̱ ki̱a̱ ngi̱ndie xi katsó nda̱ xi chji̱a̱ni Néná, kó jó ján ndi̱yà nga bo̱a̱ katsꞌén, tsi̱ꞌe̱ nga nda askoo̱n yojoo̱.
11Kó nda̱ ree̱ nangi Siria̱, achichí nda̱ kamaá ini̱ma̱a̱ kjo̱a̱a̱ kui nii̱, kó tsíchji̱a̱a̱ já mosoo̱, kó bi̱ katsoó:
—A kꞌuiyájínjnúꞌun ꞌyání xota̱ xí kjo̱a̱ndaa̱ nda̱ ree̱ na̱xi̱ńdá Israee̱l tikónni.
12Kósꞌe̱ ngo nda̱ mosoo̱ nda̱ ree̱, bi̱ katsó:
—Jmí ndi̱a̱ ko̱jo re xi tsa̱ꞌa̱n, nda̱chji̱ni̱e̱ꞌe̱én Néná xi ꞌmí Eliseoo̱ kui xi tikón ki̱a̱ Israee̱l, kuí boá xi tsóyaà nda̱ ree̱ na̱xi̱ńdá Israee̱l ngayeje ni xi ndokjo̱e̱ ji ki̱a̱ ngi̱yaꞌmàa̱.
13Kó bi̱ katsó kui nda̱ ree̱:
—Tangínjnú, kó tsitsíjenjnúu̱ ñání tikón kui nda̱a̱, tsi̱ꞌe̱ nga sangiya an nga ko̱ndo̱bo̱a̱.
Kó kiꞌmíyaà nga ki̱a̱ tikón na̱xi̱ńdáꞌniú Ndotaa̱n. 14Kósꞌe̱ nda̱ ree̱ katsangiya ki̱a̱a̱, xota̱ xi síndosoón ndi̱je̱ ko̱jo xi ndyi̱a̱ karro̱, ko̱jo ꞌniú kjín jájún, kó kui jaá nga jñoó jachó, kó jaꞌatjiyajoo̱n na̱xi̱ńdáꞌniuú.
15Kó kjiꞌanga mosoo̱ nda̱ xi tsi̱ꞌe̱ Néná ꞌniú ta̱jñó jastjíe̱n, nga jataxie ndi̱tsén jàn, kamábe ngo xtín jájún xi síndosoón ndi̱je̱ ko̱jo xi ndyi̱a̱ karro̱, xi je jaꞌatjiyajoo̱n na̱xi̱ńdáꞌniuú. Kó kui nda̱ mosoo̱, bi̱ katsoó Eliseoo̱:
¡Ai ndi̱a̱ xi tsa̱ꞌa̱n! Mí ni xi si̱ꞌanjne̱.
16Ta̱nga Eliseoo̱, bi̱ katsó:
—Ngata̱ ndakinjín má ji, ngatꞌa̱ kjín ngase ma xi síndojo̱ná ñá, ta̱bo̱a̱jiín xi síndojo̱ kui jaá.
17Kó Eliseoo̱ tsíchji̱a̱a̱ Néná, nga bi̱ katsó: Ji Ndi̱a̱, ꞌniú míꞌaá nga chjáxꞌé Jí ndyi̱ko̱n kui nda̱a̱ tsi̱ꞌe̱ nga sku̱i̱e̱. Kó Néná iskjíxꞌá ndyi̱ko̱n kui nda̱ mosoo̱, kó nga askotsijen, kamábe nga ki̱a̱ na̱xi̱i̱ tjikítsie má xota̱ xi síndosoón ndi̱je̱, ko̱jo xi ndyi̱a̱ karro̱ xi ndiꞌí, xi síndotꞌa nga ngo foaꞌatjiyajoo̱n Eliseoo̱.
18Kó kjiꞌanga jatjajen xota̱ Siriaa̱ kondra̱a̱ Eliseoo̱, Eliseoo̱ tsíchji̱a̱a̱ Néná, nga bi̱ katsoó: ꞌNiú míꞌaá Ji Ne nga si̱ꞌin ti̱ka̱ Ji kui xotaa̱. Kó Néná katsꞌénti̱ka̱ kui xotaa̱, xikó má tsꞌén tsíꞌá Eliseoo̱. 19Kósꞌe̱ Eliseoo̱, bi̱ katsó: Kuijín bi̱ ndi̱ya̱à, ti̱nde kuijín bi̱ na̱xi̱ńdáꞌniuú, ndibátjingijnúꞌun, kó án ki̱a̱ kjuínjo̱jnúꞌun nínga tikón nda̱ xi ndyi̱mindyiséjnú.
Kó kijíjo̱ kui jaá ngaskande nangi Samaria̱. 20Kó nga jachó na̱xi̱ńdáꞌniú Samaria̱, Eliseoo̱ bi̱ katsó: Ji Ndi̱a̱, chjáxꞌé Ji ndyi̱ko̱n kui xotaa̱, tsi̱ꞌe̱ nga ka̱ma tsijén nginií. Kó Néná iskjíxꞌá ndyi̱ko̱n kui jaá, kó nga kamátsijee̱n kamábe nga ki̱a̱ síndo ngamasiee̱n na̱xi̱ńdáꞌniú Samaria̱.
21Kó kjiꞌanga nda̱ ree̱ na̱xi̱ńdá Israee̱l, kamábe kui jaá, bi̱ katsoó Eliseoo̱:
—A sa̱ꞌinkꞌién an na̱ꞌmi xi tsa̱ꞌa̱n.
22Kó bi̱ katsó Eliseoo̱:
—A si̱ꞌinkꞌin jí kui xota̱ xi ki̱cha̱ndojóo̱ ko̱jo yáchjonyáa̱ kandoboéni ji. Tꞌíjñíi̱ ngindyi̱ko̱n kui xotaa̱ pan ko̱jo ndáfoa, tsi̱ꞌe̱ nga skji̱ni̱e̱ ko̱jo nga kꞌuí, sꞌe̱ ngatjíꞌoyá nginí nínga tikón ndi̱a̱a̱.
23Kósꞌe̱ nda̱ ree̱ katsꞌenda tsie nichinie tsi̱ꞌe̱ kui jaá, kó ngije iskjinie ko̱jo ngije katsꞌe, katsꞌénkjí, kó kui jaá kijí nginí nínga tikón ndi̱a̱a̱. Kó nginijánjín jachó jájún xi chji̱a̱ni nangi Siria̱ ki̱a̱ na̱xi̱ńdá Israee̱l.
Kjindiá xí kisꞌie nangi Samaria̱
24Jaskan ngije kamá kui nii̱, Bee̱n-Andaa̱nd, nda̱ ree̱ nangi Siria̱ ítikó ngayeje jájuún, kó jaꞌatjiyajoo̱n na̱xi̱ńdáꞌniú Samaria̱ tsi̱ꞌe̱ nga skjánjo̱. 25Kó ngo kjindiá xí ta̱nisién ꞌniú kisꞌie ki̱a̱ nangi Samariaa̱, ta̱ngatꞌanii̱ nga je ikitjatjíyajoo̱n kui ngi̱ndiee̱, nga ngaskande ngo to̱ko̱ bórró ichítié ko̱jo kantié to̱ntiboa kastiñáni, kó ngo tji̱ngo̱ yeꞌee̱ tójo, ún to̱ntiboa kastiñáni.
26Kó kjiꞌanga nda̱ ree̱ na̱xi̱ńdá Israee̱l jaꞌa ki̱a̱ nínga tikón xoó na̱xi̱ńdáꞌniuú, kamábe ngo xota̱chjo̱on xí askjandáyà má nga bi̱ katsoó:
—ꞌNa̱xiéꞌéní ji re, ji xi ndi̱a̱na ji.
27Kó bi̱ katsó kui nda̱ ree̱:
—Tsi kꞌo̱xiéꞌájiín Néná, kótsꞌèn ka̱mana kꞌo̱xiéꞌaá jí. A ka̱ma tsja chií ni xi síndo ki̱a̱ nínga ꞌbíndo ni xi maxchaá, axa̱ ki̱a̱ nínga ꞌnaxié ndaá tostsi̱je̱è. 28Kó bi̱ katsó ngase nda̱ ree̱:
—Kó kamaá ji.
Kó bi̱ katsó kui xota̱chjo̱on:
—Kui naa̱, bi̱ katsóna: Te̱ꞌé ji ndíi̱, tsi̱ꞌe̱ nga xi̱ni̱e̱ ngotꞌe̱, kó ndyiojón xi̱ni̱e̱ ndí xí tsa̱ꞌa̱n. 29Kó bo̱a̱ tsꞌén nga kiniꞌánchjánjne̱ ndína, kó kichiniejne̱. Kó nga kamángindyiojón, bi̱ kixiáa̱n: Te̱ꞌé ji ndíi̱ ngotꞌe̱ ꞌne̱, tsi̱ꞌe̱ nga xi̱ni̱e̱. Ta̱nga kui naa̱ íjñaꞌma ndií.
30Kjiꞌanga tsintꞌié nda̱ ree̱ ni xi katsó kui xota̱chjo̱on, tji̱e̱nga kjoaꞌa ki̱a̱ xoó kui na̱xi̱ńdáꞌniuú, iskjíndiyájón ńjñoo̱, kó xota̱ na̱xi̱ńdáꞌniuú kamábe nga ńjño xi xa̱ꞌya̱ yajá kui nda̱ ree̱ ngindie ńjñoo̱. 31Kósꞌe̱ bi̱ katsó nda̱ ree̱: Bo̱a̱ kjiꞌi ni xi ngatsꞌénjo̱na Néná, kó ngaskande ngatásón ngasee̱, tsi kotiesénjín an to̱ko̱ Eliseoo̱ ndií Safaa̱t.
32Kó Eliseoo̱ ki̱a̱ xió tikón ndiꞌaa̱, kó ki̱a̱ síndojo̱ xota̱ xi xchaá, kó nda̱ ree̱ katsangiya ngo nda̱. Ta̱nga ngindiee̱ nga kjo̱chó kui nda̱a̱, Eliseoo̱ bi̱ katsoó xota̱ xi xchaá: A je kamáyàjnú nga kui ndií kui nda̱ xi tsꞌenkꞌién ini̱ma̱a̱, katsangiya tsi̱ꞌe̱ nga ku̱i̱chásénna. Tsitsíjenjnúu̱ nga kjiꞌanga kjo̱e̱ꞌe kuí nda̱ xi kanangiyaa̱, tꞌíchjájnú nga̱ntjo̱a̱a̱, kó ngata̱ boeꞌéndièjínjnúu̱ nga kꞌo̱sꞌien. A ndaꞌyájínrií nga̱xto̱n kui nda̱a̱ se nga je tsꞌéndibá ndi̱a̱a̱ kui.
33Tji̱e̱nga tsꞌénchji̱a̱jo ngase kui xotaa̱, nga kamábe kui nda̱ chji̱ni̱e̱ꞌe̱én nga je tsꞌéndibájáyani nínga tikón, kó bi̱ katsó:
—Ja̱koxi̱ boá nga kui ni xi ndajiín, Néná boá xi katsangiya. Mí ni xi ka̱ma skoya ngase an xi tsi̱ꞌe̱ Néná boá kui nii̱.
Currently Selected:
2 Já ree̱ 6: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
