2 Já ree̱ 7
7
1Kósꞌe̱ Eliseoo̱, bi̱ katsó:
—Ndaꞌyájnúu̱ eén Néná: Bi̱ tsó Néná: Ndyiojón kuí má kui chi̱bo̱a̱a̱, tie kilo̱ ndso̱ko̱a̱n ṉño̱pan xi kixꞌi, ku̱i̱je̱nnii̱ ngo to̱ntiboa, ko̱jo kan kilo̱ sebandaa̱ ku̱i̱je̱nnii̱ ngo to̱ntiboa ki̱a̱ nga̱ntjo̱a̱a̱ na̱xi̱ńdáꞌniú Samaria̱.
2Kósꞌe̱ nda̱ ngito̱ko̱o̱ jájuún kui xi bosikójo nda̱ ree̱, bi̱ katsoó nda̱ xi chji̱a̱ni Néná:
—Tsi Néná ngotꞌe̱ sa̱ꞌíndaa̱ nga̱ntjo̱a̱masienkjá ndiꞌakꞌajmi jàn, a ka̱ma kuí nii̱.
Kó bi̱ katsó kui nda̱a̱:
—Ja̱ ndyikin má ji xi sku̱i̱e̱ kui nii̱, ta̱nga ka̱májín xi̱ni̱ ji.
Nga jatjoꞌma xota̱ Siriaa̱
3Kó ki̱a̱ nga̱ntjo̱a̱a̱ na̱xi̱ńdáꞌniuú kisꞌińdo nijón já xí tjiín chiꞌin xi tsꞌénkjátsón tji̱xin yojoná, xi bi̱ katsoó xkjín:
—Míkjo̱a̱a̱ nga kꞌi̱e̱ tindyión ngaskande nga ko̱yà. 4Tsi ko̱e̱ꞌée̱ takón nga ki̱a̱ ku̱i̱tjásꞌi̱e̱n na̱xi̱ńdáꞌniuú, kjindiá kjima ki̱a̱ na̱xi̱ńdáꞌniuú, ki̱a̱ ko̱yà ñá, kó tsi kꞌi̱e̱ ku̱i̱ndyión kꞌi̱e̱e̱, ti̱ ko̱yà ñá nga. Ja̱ kuíni nga ngotꞌe̱ ꞌne̱, ta̱sá tjiàn, kó ki̱a̱ tjiàn nínga síndo jájún Siriaa̱, kó tsi sa̱ꞌínkꞌiénjínná kuí jaá, ku̱i̱ndyión nga̱sondie, kó tsi sa̱ꞌínkꞌiénná, ngiti̱ jmí ni ka̱májín xi si̱ꞌán, ta̱ ko̱yà tsí ñá.
5Kó kuíni nga ngije kjimajñoó jastjíe̱n kui jaá, tsi̱ꞌe̱ nga kijí nínga síndo ndiꞌaa̱ xota̱ Siriaa̱, kó nga jachó ki̱a̱ nínga síndo ndiꞌaa̱ xota̱ Siriaa̱ jmíjín xi tjín ki̱a̱a̱. 6Ngatꞌa̱ Néná boá xi katsꞌén nga ki̱a̱ nínga síndo ndiꞌaa̱ xota̱ Siriaa̱, kandaꞌyá nda̱a̱ karretaa̱, ko̱jo nda̱a̱ ndi̱je̱e̱, ko̱jo nda̱a̱ ngo tjín jájún xi ꞌniú kjín kamaá, kó kui xotaa̱ ja̱kꞌi̱e̱ ja̱ngaján bi̱ katsoó xkjín: Nda̱ ree̱ Israee̱l, jè íchjií nda̱ ree̱ xota̱ Ee̱t, ko̱jo nda̱ ree̱ xota̱ Ejiptoo̱ tsi̱ꞌe̱ nga ñá kjo̱e̱ꞌekjánjo̱ná. 7Kó jastjíe̱n kui jaá, kó tsanga nga kamájñoó, kó íjñámasien ndiꞌańjñoo̱, ko̱jo ndi̱je̱e̱, ko̱jo bórroó, kó índomasien ndiꞌa nínga kisꞌińdo xikó má tsꞌén kisꞌijña, kó tsanga ta̱ngatꞌanii̱ nga tsꞌaxiéꞌá yojoo̱.
8Kó kjiꞌanga jachó kui já xí tjiín chiꞌin xi tsꞌénkjátsón tji̱xin yojoná, ki̱a̱ ndi̱tsen nínga síndo ndiꞌańjñoo̱, tsꞌasꞌien ngo kui ndiꞌaa̱, kó iskjinie ko̱jo katsꞌe nichinie ko̱jo niꞌyó, kó tsꞌaxié to̱nsinieé ko̱jo to̱ntiboaa̱, ko̱jo ńjño xi chajaá, kósꞌe̱ índoꞌmá kui nii̱. Sꞌe̱ jaskan kijí nginí, kó tsꞌasꞌien nginí kje̱ꞌe ndiꞌańjño, kó ti̱ iskjíbé ni ki̱a̱a̱ nga, sꞌe̱ kijí, kó índoꞌmá kui nii̱. 9Sꞌe̱ jaskan ja̱kꞌi̱e̱ ja̱ngaján, bi̱ katsoó xkjín: Ndajínkjiꞌi ni xi ndyi̱niꞌán. Kui ni̱xtjii̱n, ni̱xtjii̱n tsi̱ꞌe̱ éntjatsi̱e̱ boá, ta̱nga ñá xió kixindyión, kó tsi xchiyá ngaskande nga ndibáꞌásie̱én, ni xi ndajín xi kiniꞌán kjo̱chótji̱ngíná. Ja̱ ngotꞌe̱ ꞌne̱, tjiàn ndiꞌaa̱ nda̱ ree̱, kó kꞌuiyáa̱ kui eén.
10Kó nga jachó kui jaá, tsíchji̱a̱a̱ jájún xi konda nga̱ntjo̱a̱a̱ na̱xi̱ńdáꞌniuú, kó bi̱ katsoó: Ki̱a̱ tsangínjne̱ nínga síndo ndiꞌańjñoo̱ xota̱ Siriaa̱, kó jmíjín xi kisꞌińdo ki̱a̱a̱, ti̱nde nde ngo nda̱a̱ xota̱ ndaꞌyájín ki̱a̱a̱, ta̱soboá ndi̱je̱ ko̱jo bórró xí síndotaꞌniú tsí, kó ndiꞌaa̱ xotaa̱ síndo cha̱n cha̱n.
11Kósꞌe̱ já xí konda nga̱ntjo̱a̱a̱ askjandáyà má, kó katsóyà kui nii̱ ngi̱ya ndiꞌa nínga botixómá nda̱ ree̱. 12Kó nda̱ ree̱ jastjíe̱n nga jñoó, kó bi̱ katsoó já mosoo̱:
—Kꞌi̱e̱ xiyàjnúꞌun ni xi katsꞌénjo̱ná xota̱ Siriaa̱. Kui jaá, jè be nga bojóná, kó kuíni nga je jatjoni ndiꞌańjñoo̱, kó ki̱a̱ síndoꞌmá ngi̱jin kꞌijñaá, kó bi̱ tsꞌén ndyi̱tsꞌènkjó: Ngije kjo̱tjoni ngi̱jin na̱xi̱ńdáꞌniuú, ko̱ndo̱bo̱a̱ tikón, kósꞌe̱ ku̱i̱tjásꞌi̱e̱n na̱xi̱ńdáꞌniuú.
13Kósꞌe̱ ngo nda̱ mosoo̱, xi bi̱ katsó:
—Chjábé ngotꞌe̱ ún kui ndi̱je̱ xi ta̱kó síndo na̱xi̱ńdáꞌniuú, ngatꞌa̱ kui xi ta̱kó síndo kꞌi̱e̱e̱, ti̱ bo̱a̱ ti̱ tsꞌén ko̱yà xikótsꞌèn kju̱i̱e̱ xota̱ Israee̱l xi je jesón nga, kó ko̱nangíyá, kó xcha̱ mí ni xi kjima.
14Kósꞌe̱ kui jaá iskjíbé jó karro̱ xi ndi̱je̱ ndyi̱kjienni, kó nda̱ ree̱ ki̱a̱ katsangiya nga̱xto̱n xota̱ Siriaa̱, kó bi̱ katsoó: Tangínjnú kó tsitsíjenjnú. 15Kó kijí kui jaá, kó ki̱a̱ kijítji̱ngii̱ ngaskande ndejèꞌ Jorndaa̱n, kó ngayeje ndi̱ya̱à tjikítsie má ńjño ko̱jo ni xi niꞌánkjién xí xota̱ Siriaa̱ atítsojo, ngatꞌa̱ achichí tsá katsꞌeén yojoo̱ nga kijí. Kó kui já chji̱ni̱e̱ꞌe̱én, kijíꞌoyá nginí nínga tikón nda̱ ree̱ nga katsóyaà kui nii̱. 16Kósꞌe̱ jataxie xota̱ na̱xi̱ńdaá, kó iskjíbé ni xi tjiín ndiꞌańjñoo̱ xota̱ Siriaa̱. Kó tie kilo̱ to ndso̱ko̱a̱n ṉño̱pan xi kixꞌi, ko̱jo kan kilo̱ sebandaa̱, ngo to̱ntiboa kastiñáni, xikó má katsó én xí katsóyà Néná.
17Kó nda̱ ree̱ ki̱a̱ íjñá kui nda̱ ngito̱ko̱ ki̱a̱ nga̱ntjo̱a̱a̱, kui nda̱ xi tsja kui yíꞌniú nga jastjíe̱n, kó xota̱ na̱xi̱ńdaá katsjánié kui nda̱a̱ ki̱a̱ nga̱ntjo̱a̱a̱, kó kꞌien, xikó má katsó nda̱ xi chji̱a̱ni Néná, kjiꞌanga tsíchji̱a̱jo nda̱ ree̱, kjiꞌanga kijíkoón kui nda̱a̱. 18Kó bo̱a̱ kamá xikó má katsó nda̱ xi chji̱a̱ni Néná nga tsíchji̱a̱jo nda̱ ree̱, nga bi̱ katsoó: Kan kilo̱ sebandaa̱ ko̱jo tie kilo̱ to ndso̱ko̱a̱n ṉño̱paa̱n, ngo to̱ntiboa sti̱ñáni ndyiojón kui chi̱bo̱a̱a̱, ki̱a̱ nga̱ntjo̱a̱a̱ na̱xi̱ńdáꞌniú Samaria̱. 19Kó kui nda̱ ngito̱ko̱o̱, bi̱ katsoó nda̱ xi chji̱a̱ni Néná: Tsi Néná xí sa̱ꞌíndaa̱ nga̱ntjo̱a̱masienkjaá ndiꞌakꞌajmii̱, a ka̱má kui nii̱ tsobo̱a̱. Kó bi̱ katsó nda̱ xi chji̱a̱ni Néná: Ndyikin má ji xi sku̱i̱e̱ kui nii̱, ta̱nga xi̱ni̱jín ji kui nii̱. 20Kó bo̱a̱ má kamá, ngatꞌa̱ xota̱ na̱xi̱ńdaá katsjánié ki̱a̱ nga̱ntjo̱a̱a̱, kó ki̱a̱ kꞌien.
Currently Selected:
2 Já ree̱ 7: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
