2 Já ree̱ 5
5
Eliseoo̱ ko̱jo Naamaa̱n
1Naamaa̱n kuí boá xi kamá nda̱ ngito̱ko̱o̱ jájuún nda̱ ree̱ nangi Siria̱, kó achichí kamáyàndikón ngindyi̱ko̱n ndi̱a̱a̱, ngatꞌa̱ Néná, kuí boá xi katsꞌénkjién nga nangi Siriaa̱ katsꞌén nga kijíkján. Kui nda̱a̱ achichí chꞌokon kamá, ta̱nga chiꞌin xi tsꞌénkjátsón tji̱xin yojoná kisꞌiee̱.
2Xota̱ Siriaa̱ xki̱ xtín jájún jatjoni kui ngi̱ndiee̱, kó ki̱a̱ nangi Israee̱l kijíjo̱ꞌniú ngo tsa̱kjìnchí xi mosoo̱ chjo̱ón Naamaa̱n kamá. 3Kó kui naa̱, bi̱ katsoó chjo̱ón ndi̱a̱a̱:
—Achichíra̱ nda kjiꞌi tsi ndi̱a̱na ki̱a̱ tikón nínga tikón xota̱ chji̱ni̱e̱ꞌe̱én Néná xi tikón na̱xi̱ńdáꞌniú Samaria̱ katsaki, ngatꞌa̱ kui xotaa̱, ka̱maa̱ sa̱ꞌíndaya chiꞌin xi tsꞌénkjátsón tji̱xin yojoná xí tjiín kuí.
4Kó Naamaa̱n kijí nínga tikón nda̱ ree̱, kó bi̱ katsoó:
—Kuí nii̱ xi katsó kui tsa̱kjìnchí xi chji̱a̱ni na̱xi̱ńdá Israee̱l.
5Kó nda̱ ree̱ nangi Siriaa̱, bi̱ katsoó:
—Ja̱ tꞌen, kó an sangiyáa̱ ngo xo̱jo̱n nda̱ ree̱ na̱xi̱ńdá Israee̱l.
Kó jatjo kui nda̱a̱ nga kijí, kó yaꞌa kan tié mi̱ to̱ntiboa, ko̱jo jun mi̱ to̱nsinié, ko̱jo tie ꞌniú xtjí xi chajá. 6Kó kijíjo̱ kui xo̱jo̱n xi kanangiyaa̱ nda̱ ree̱ na̱xi̱ńdá Israee̱l, bi̱ tsó kui xo̱jo̱o̱n: Kjiꞌanga kjo̱choó kui xo̱jo̱o̱n, kꞌi̱e̱ tsꞌéntsangiyaa moso̱na Naamaa̱n, tsi̱ꞌe̱ nga si̱ꞌindaye ji chiꞌin xi tsꞌénkjátsón tji̱xin yojoná xí tjiín.
7Ngije katsꞌényà nda̱ ree̱ na̱xi̱ńdá Israee̱l kui xo̱jo̱o̱n, iskjíndiyájón má ńjñoo̱, kó bi̱ katsó:
—A án boá xi Néná án, tsi̱ꞌe̱ nga ka̱mana sa̱ꞌinkꞌién an, ko̱jo tsi sa̱ꞌinkꞌijñá an ngo xota̱, nga an kon tsꞌéntsangiyana kui nda̱a̱ nga sa̱ꞌindaya an ngo nda̱ xi tjiín chiꞌin xi tsꞌénkjátsón tji̱xin yojoná. Ngotꞌe̱ ꞌne̱, tsitsíjenjnúu̱ kótsꞌèn nga tsꞌénmongase ngo ni tsi̱ꞌe̱ nga an sa̱ꞌínkjánna.
8Kó kjiꞌanga Eliseoo̱, nda̱ xi chji̱a̱ni Néná tsintꞌié nga nda̱ ree̱ Israee̱l iskjíndiyájón ńjñoo̱, katsangiyaa̱ nda̱ ree̱ ngo én, nga bi̱ katsoó: Ánní nga kachjandiyéjìnkon ji ńjñoo̱. An ngatjandibakónna, kó xche̱ ji nga tjín nda̱chji̱ni̱e̱ꞌe̱én Néná kꞌi̱e̱ na̱xi̱ńdá Israee̱l.
9Kó Naamaa̱n kijí, kó kijíjo̱ ndi̱je̱e̱ ko̱jo karroo̱, kó ki̱a̱ kasasien nga̱ntjo̱a̱ ndiꞌaa̱ Eliseoo̱. 10Kó Eliseoo̱ katsangiyaa̱ ngo nda̱ chji̱ni̱e̱ꞌe̱én, xí bi̱ katsoó: Tꞌen ji kó yito ndi̱yà taníjín ji yojòo̱ ngi̱jii̱n ndejèꞌ Jorndaa̱n, kó ka̱mandaya nginí yojòo̱, kósꞌe̱ ka̱matsjiejón ji. 11Ta̱nga Naamaa̱n katsꞌénxchán, kó kijí nga bi̱ katsó:
—Bi̱ tsꞌén katsꞌenkjó án: Bee ko̱n an nga kjo̱tjo kuí nda̱a̱, kó ku̱i̱chji̱a̱a̱ Néná kui xi Nee̱ kui, kó skjinínkꞌá tsja, sa̱ꞌínjo̱ kui ngi̱ndiee̱, kó ka̱mandaya chiꞌin xi tsꞌénkjátsón tji̱xin yojona xi konna. 12Ndejèꞌ Abanaa̱ ko̱jo ndejèꞌ Farfaa̱r, xi chji̱a̱ni na̱xi̱ńdáꞌniú Ndamasko̱, a ndajín ngase ta̱bo̱a̱jiín ngayeje ndáfoa xi tjín ki̱a̱ na̱xi̱ńdá Israee̱l. Tsi ki̱a̱ ko̱niéjón yojona kui ndáfoaa̱, a ka̱matsjiejín an.
Kósꞌe̱ kijíꞌoyá nginí, kó katsꞌénxchán. 13Ta̱nga já mosoo̱ kijíkóntiñaa̱ Naamaa̱n, kó bi̱ katsoó: Ji ndi̱a̱, tsi kui nda̱chji̱ni̱e̱ꞌe̱én Néná, tsíꞌaá nga si̱ꞌinkjatjosén ji ngo ni xi niꞌin, a si̱ꞌinkjatjosénjín jí tsobo̱a̱. Ja̱ ngase má nga bi̱ katsoó: Taníjín ji yojòo̱, kó ka̱matsjiejón ji.
14Kósꞌe̱ Naamaa̱n jatjajen nínga tikón ndejèꞌ Jorndaa̱n, kó yito ndi̱yà katsangijin yojoo̱ ngi̱jii̱n ndáfoaa̱, xikó má katsó nda̱ xi tsi̱ꞌe̱ Néná, kó yojoo̱ bo̱a̱ kisꞌie xikó maá yojoo̱ ngo ndí nda̱chí, kó kamátsjiejón. 15Kó tji̱e̱n má kijíkónꞌoyá nginií nda̱ xi chji̱a̱ni Néná, kó kijíjo̱ ngayeje xota̱ xi nijan tjimájo̱, kó nga jachó kje̱n kui nda̱a̱, bi̱ katsoó:
—Ngotꞌe̱ ꞌne̱, nga je be an, nga jmíjín ingo Ne ngayeje tꞌanangii̱, ta̱kuítsí xi tikón kꞌi̱e̱ na̱xi̱ńdá Israee̱l. ¡ꞌNiú míꞌaá nga chjábé jí ngo ni xi tsꞌényaꞌaa̱ kui mosòo̱!
16Ta̱nga bi̱ katsó Eliseoo̱:
—¡Ja̱koxi̱ boá nga tikón Néná, kui xi ngindyi̱ko̱n Kui tikón an, nga skjíbéjín an kui nii̱! Kó Naamaa̱n ꞌniú tsíꞌáa̱ nga skjíbé, ta̱nga Eliseoo̱ kamámejénjiín. 17Kósꞌe̱ bi̱ katsó Naamaa̱n:
—Ja̱ ngotꞌe̱ ꞌne̱, ꞌniú míꞌaá tsobo̱a̱, nga ko̱e̱ꞌéndièní nga kui nda̱ mosòo̱ skjíbé chií ńdie xi chji̱a̱ni kui ngi̱ndiee̱, xikó kjiꞌi xi skaa̱ jó ndi̱je̱tajá, ngatꞌa̱ ngotꞌe̱ ꞌne̱, kui mosòo̱ ngiti̱ sa̱ꞌínkꞌasꞌienjiín kjo̱a̱tjó xi ꞌbítí kje̱ꞌe ne, ta̱sá ta̱ kuí tsí Néná. 18Kó kui nii̱ xi nga tsꞌénjetakónna Néná kjo̱a̱a̱ kui mosòo̱: Nga kjiꞌanga ndi̱a̱na kui xi nda̱ ree̱ kꞌo̱sꞌien na̱ngo̱xi̱i̱ ne Rimoo̱n, tsi̱ꞌe̱ nga ko̱siéntikoó ki̱a̱a̱, kó kjiꞌanga ko̱óꞌniú ndsa̱ án, kó tsi ko̱jo an kotíjña̱ndo an ki̱a̱ na̱ngo̱xi̱i̱ ne Rimoo̱n nga. Kjiꞌanga bo̱a̱ sa̱ꞌin an, Néná nga tsꞌénjétakoón kui mosòo̱.
19Kó Eliseoo̱, bi̱ katsoó:
—Tꞌen xió xió ji. Kó kijí kui nda̱a̱, kó ngije mara̱ masien kilometro̱ nínga je kjochó, 20Ngiesii̱, nda̱ mosoo̱ Eliseoo̱, nda̱ xi chji̱a̱ni Néná, bi̱ tsꞌén katsꞌénkjó: Ndi̱a̱na katsjandièjín nga Naamaa̱n kui xi chji̱a̱ni nangi Siriaa̱, sa̱ꞌínkꞌasꞌiee̱n ni xi yaꞌa, ta̱nga, ¡tikón Néná nga konga má an nga kjuíntjíngíi̱, kó ngo kui ni xi yaꞌa Naamaa̱n skjíbé án!
21Kó bo̱a̱ tsꞌén nga Ngiesii̱ kijítji̱ngii̱ Naamaa̱n, kó nga kamábe Naamaa̱n nga ki̱a̱ tji̱e̱ntji̱ngii̱ kui nda̱a̱, jatjajen karro̱ xi tjiyá kó kijíkjaꞌáyíndi̱yà, kó bi̱ katsoó nga asíyaá:
—A nda tindyin ji.
22Kó bi̱ katsó kui nda̱a̱:
—Jo̱o̱n, nda tikón an. Ndi̱a̱na boá katsangiyana nga bi̱ xiaán jí: Ngotꞌe̱ má jeꞌeni ki̱a̱ nangi na̱xi̱ xi chji̱a̱ni xota̱ tji̱e̱e̱ Efraii̱n jó já xo̱ngò xí ndií jáchji̱ni̱e̱ꞌe̱én Néná, kó ꞌniú míꞌaá nga te̱ꞌée̱ ján mi̱ to̱n to̱ntiboa, ko̱jo jó ꞌniú ńjño tja̱tsi̱e̱ xi chajá.
23Kó Naamaa̱n, bi̱ katsó:
—ꞌNiú míꞌaá nga chjábé jí jun mi̱ to̱n tiboa. Kó ꞌniú katsꞌeén, kó jó stsa indyiá nga jun mi̱ kui to̱ntiboaa̱, ko̱jo nga jó kui ńjño tja̱tsi̱e̱e̱ xi chajaá, kó katsjaá jó já moso̱ xi tsi̱ꞌe̱, tsi̱ꞌe̱ nga ko̱e̱je̱jo kui to̱o̱n ngindyi̱ko̱n Ngiesii̱. 24Kó nga jachó ngo ngi̱ndie xi ꞌma, Ngiesii̱ iskjíbé kuí ni xi ndyi̱yaꞌa kui jaá, sꞌe̱ ki̱a̱ índo ngi̱ya kui ndiꞌaa̱, sꞌe̱ katsꞌénkjí kui jaá ngijee̱.
25Kó ngije tsꞌasꞌien, nínga tikón ndi̱a̱a̱, ki̱a̱ kasasien ngindyi̱ko̱n. Kó Eliseoo̱ bi̱ katsoó:
—Ñá kjindibéni ji Ngiesii̱.
Kó bi̱ katsó kui nda̱a̱:
—Ta̱jñàjínni kijí kui mosòo̱.
26Kósꞌe̱ bi̱ katsoó Eliseoo̱:
—A ki̱a̱jín tikón ini̱ma̱na kjiꞌanga kui nda̱a̱ jatjajenni karroo̱ nga kijíkjaꞌayindi̱ya̱à. A kuí ni̱xtjii̱n nga chjábé to̱ntiboa, ko̱jo nga chjábé ńjño xi chajá, ko̱jo to aseitunaa̱, ko̱jo tostsi̱je̱è, ko̱jo cho̱tsa̱nga̱a̱, ko̱jo cho̱yojo xi bokján tꞌanangi, ko̱jo já moso̱ xi xi̱ꞌin ko̱jo xi ínchjín. 27Kuíni nga chiꞌin xi tsꞌénkjátsón tji̱xin yojoná xí kisꞌiee̱ Naamaa̱n kꞌuieé jí ngotꞌe̱, ko̱jo xota̱ tji̱e̱ tse̱ ngatsjéni̱xtjin.
Kó Ngiesii̱ ngije jatjoni ngindyi̱ko̱n Eliseoo̱, kisꞌiee̱ kui chiꞌin xi tsꞌénkjátsón tji̱xin yojoná xí kisꞌiee̱ Naamaa̱n, kó tiboa xó xó kamá yojoo̱.
Currently Selected:
2 Já ree̱ 5: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
