Osọha lẹ 22
22
1OYI Islaeli tọn le lọ sọ yígbéjizọnlin, bo dosla do danfáfá Moabi ọn lẹ lọ mẹ to Jọdani lọ godo to Jẹliko. 2Balaki visunnu Zipọli tọn lọ so mọ ehe Islaeli wá hlan Amolinu le lọ lẹpo. 3Moabi sọ yín avọ̀satọ na gbẹtọ lẹ lọ tọn, na yé yín susu wutu: Moabi sọ yín nukunbianọ na ovi Islaeli tọn lẹ lo ton wutu. 4Moabi sọ dọ hlan mẹho Midiani tọn lẹ domọ, Dinvie wẹ agùndaho he na didọ́ ehe tin lẹ́do mí lẹpo, dile oyin nọ didọ́ ogbé dànji tọn do. Balaki visunnu Zipoli tọn lọ wẹ ahọlu Moabi tọn to ojlẹ ne mẹ. 5E bo sọ do mẹdagun lẹ hlan Balaami visunnu Beoli tọn lọ, jẹ Petoli, he tin to Otò: lọ dali, jẹ aigba ovi omẹ etọn lẹ tọn lẹ tọn ji, nado ylọ e, dọmọ, Dayi e go, Omẹ de lẹ jẹgbonu sọn Egipti wá: dayi e go, ye ṣinyọn nukunmẹ aigba lọ tọn, yé sọ tin aga pànnukọn mi: 6Enẹwutu wá dinvie, yẹn vè wẹ, hodèdo omẹ he lẹ na mi; na yé yín hlọnhlọnno gbahu na mi: eya yẹn na tinhuhlọn, na mìlẹ nido hò yé, podọ na yẹn nido yàn ye jẹgbonu sọn aigba lọ mẹ: na yẹn yọnẹn dọ ewọ mẹhe hiẹ dona yè dona, podọ ewọ mẹhe hiẹ hodẹ̀do, yè hodẹ̀do. 7Mẹho Moabi tọn lẹ lọ po mẹho Midiani tọn le lọ po fọ́nyì po ahosúnu asẹ tọn lẹ lọ po to alọ yetọn mẹ; yé sọ wá jẹ Balaami de, bo dọhó ohó Balaki tọn lẹ lọ hlan ẹn. 8Ewọ so dọ hlanyé dọmọ, Mì ni jẹ ofì to ozán he mẹ, yẹn naso hẹn ọhó wá na mì, dile OKLUNỌ lọ na dọhó hlan mi do: ogán Moabi tọn le lọ sọ jẹ Balaami de. 9Jiwheyẹwhe sọ wá jẹ Balaami dẹ, bo domọ Mẹnu wẹ omẹ he tin to dewe helẹ? 10Balaami so dọ hlan Jiwheyẹwhe dọmọ, Balaki visunnu Zipọli tọn lọ, ahọlu Moabi tọn, ko domẹhlan mi, dọmọ, 11Dayi e go, ome, he yè hẹn jẹgbonu sọn Egipti wá lẹ lọ, e ṣinyọn nukunmẹ aigba lọ tọn: dinvie, wa họdèdo yé na mi; eja yẹn na tin sọgan nado hoavùn hẹ ye, bo na yan: ye ton. 12Jiwheyẹwhe sọ dọ hlan Balaami dọmọ, Hiẹ ma na yì po ye po gba; hiẹ ma na hodèdo gbẹtọ lẹ lọ gba: na donanọ wẹ yé. 13Balaami sọ tite to afọnnu lọ, bo dọ hlan ogán Balaki tọn lẹ lọ dọmọ, Mì yì aigba mìtọn mẹ na mìde na OKLUNỌ lọ kó nado na vivò mi nado yì po mì po. 14Ogán Moabi tọn lẹ lọ tite, yé bo sọ yi jẹ Balaki de, bo dọmọ, Balaami kọ nado wa po mí po. 15Balaki so do ogan lẹ hlan dogọ janwẹ, he yín yẹyinọ hú yé. 16Yé sọ wá Balaami de, bo dọ hlan ẹn dọmọ, Le wẹ Balaki visunnu Zipọli tọn lọ dọ, Yẹn vè we, hiẹ dike núde glọn we sọn wiwá jẹ dẽ mẹ blo; 17na yen na zé we daga jẹ yeyi daho-talala tẹnmẹ, podọ núdepope hiẹ dọ hlan mi yẹn na wà: enẹwutu, yẹn vẹ̀ we, wá hodẹ̀do omẹ he lẹ na mi. 18Balaami sọ gblọn bo dọ hlan devi Balaki tọn lẹ lọ dọmọ, Eyín é na na owhé etọn mi go na fataka po sika po, yẹn ma sọgan yì zẹ̀ ohó OKLUNỌ lọ Jiwheyẹwhe ṣie tọn go gba, nado wà whiwhe kavi susu. 19Enewutu dinvie, yẹn vè mì, mì dọngban to ofì to azán he mẹ ga, na yẹn nido yọn núhe OKLUNỌ lọ na dọ hlan mi dogọ́. 20Jiwheyẹwhe bo sọ wá jẹ Balaami de to ozanmẹ, bo do hlan ẹn dọmọ, Eyín omẹ lẹ lọ tin wa nado ylọ we, tite yì po yé po; ṣigba kiki ohó hẹ yẹn na dọ hlan we, enẹ wẹ hiẹ na wà. 21Balaami sọ tite to afọnnu lọ, bo blapana kẹtẹkẹtẹ etọn, bo yi po ogán Moabi tọn lẹ lọ po. 22Yè sọ hẹn homẹgble Jiwheyẹwhe tọn jimiyọn na ewọ yì wutu: angẹli OKLUNỌ lọ tọn dọtenmẹna ede to áliho lọ mẹ na mẹglatọ de do e: ji. Dinvie ewọ hẹ́ kẹtẹkẹtẹ etọn ji, devi etọn awe le sọ tin to e de. 23Kẹtẹkẹtẹ lọ sọ mọ angẹli OKLUNỌ lo tọn ṣite to aliho lọ ji, po ohi etọn po dindọnsún to alọ etọn mẹ: kẹtẹkẹtẹ lọ sọ lẹ́ jẹla son aliho ji bo yì ogle mẹ: Balaami sọ linú kẹtẹkẹtẹ lọ nado gò ẹ do aliho ji. 24Whenẹnu angẹli OKLUNỌ tọn lọ fọn ṣite to aliho bibó de jì to vẹ̃ngle lẹ ṣẹnṣẹn, adó de tin to awà he ji podọ adó de to awa nẹ ji. 25Kẹtẹkẹtẹ lọ sọ mọ angẹli OKLUNỌ tọn lọ, e bo sọ tùn ede hlan adó lọ go, bo fìnyọn afọ Balaami tọn do adó lọ go: é bo sọ vọ núli i 26Angeli OKLUNỌ tọn lọ sọ sẹdo nukọn bo ṣite to o, ten jinjan de mẹ, fie aliho de ma te nado lẹ́ hlan alọ adusi ji kavi hlan amiyọn. 27Kẹtẹkẹtẹ lọ sọ mọ angẹli OKLUNỌ tọn lọ, é bo sọ pavava to Balaami glọ: yè sọ hẹn homẹgble Balaami tọn jimiyọn, é yí opò etọn do hò e 28OKLUNỌ lọ sọ hùn onù kẹtẹkẹtẹ lọ tọn, e bo sọ dọ hlan Balaami domọ, Etẹ wẹ yẹn wa do we, bọ hiẹ ko do linú mi whla atọ̀n helẹ? 29Balaami sọ dọ hlan kẹtẹkẹtẹ lọ dọmọ, Na hiẹ ko vlẹ mi wutu wẹ: Yẹn jlo dọ ohí de do ko tin to alọ ṣie mẹ, na yẹn do ko hù we dinvie. 30Kẹtẹkẹtẹ lọ sọ dọ hlan Balaami dọmọ, Kẹtekẹtẹ towe ma wẹ yẹn he ji hiẹ ko nọ hẹ to ogbẹ̀ towe lẹpo me jẹ azán he gbè? bé yẹn ko nọ jlo wà mọ hlan we dai? Ewọ sọ dọmọ, Lala. 31Whenẹnu wẹ OKLUNỌ lọ hùn nukun Balaami tọn lẹ, e bo sọ mọ angẹli OKLUNỌ tọn lọ ṣite to aliho lọ ji po ohi etọn po dindọnsún to alọ etọn mẹ: é sọ dé ota etọn dodò, bọ họ́ jẹ nukunmẹ etọn ji. 32Angẹli OKLUNỌ tọn lọ sọ dọ hlan ẹn dọmọ, Etẹwutu wẹ hiẹ linú kẹtẹkẹtẹ towe whla atọ̀n helẹ? dayi e go, yẹn jẹgbonu wá na mẹglatọ de, na aliho towe sọkòdò to nukọn ṣie wutu: 33kẹtẹkẹtẹ lọ sọ mọ mi, bo lẹ́ jela to nukọn ṣie whla atọ̀n helẹ: ewọ ma do ko lẹ́ jẹla sọn dẽ, nugbonugbo dinvie yèdọ yẹn do ko hù wẹ, bo whlẹn ewọ dogbẹ̀. 34Balaami sọ dọ hlan angeli OKLUNỌ tọn lọ dọ, Yẹn ko wàylando; na yẹn ma yọnẹn dọ hiẹ site to aliho lọ ji do ogo e gba: enẹwutu dinvie, eyín e ma henhomẹhùn we, yẹn na gò dẽ do godo. 35Angẹli OKLUNỌ tọn lọ sọ dọ hlan Balaami dọmọ, Yì pò omẹ lẹ lọ po: kiki ohó he yẹn na dọ hlan we, enẹ wẹ hiẹ na dọ. Mowẹ Balaami yì po ogán Balaki tọn le lọ po. 36Whenuena Balaki sè dọ Balaami wá, é jegbonu yì nado pé e jẹ tòdaho Moabi tọn lọ mẹ, he tin to agboji Alnọni tọn lọ go, hé tin to adi agapatapata agboji lọ tọn, 37Balaki sọ dọ hlan Balaami dọmọ, Yẹn ma kayi owhlẹndo do domehlan we nado ylọ we? etẹwutu hiẹ ma wá dẽ? Yẹn ma ka tin sọgan nadọ zé we daga jẹ yẹyi mẹ? 38Balaami sọ dọ hlan Balaki dọmọ, Dayi e go, yẹn wá de we yẹn ka tindo huhlọn de dinvie nado dọ onú depope? ohó lọ he Jiwheyẹwhe yí do onù mẹ na mi, ene we yẹn na dọ. 39Balaami sọ yì po Balaki po, yé sọ wá jẹ Kiliati-huzoti. 40Balaki yi oyin lẹ po lẹngbọ lẹ po do sánvọ́, bo domẹhlan Balaami, podọ hlan ogán he tin to e de lẹ. 41E sọ wá jọ to afọnnu lọ, we Balaki yí Balaami, bo hẹn ẹn hẹji wá fiyìji Baali tọn lẹ, ewọ bo sọ mọ sọn fìnẹyì adà agapatapata gbẹtọ lẹ lọ tọn.
Currently Selected:
Osọha lẹ 22: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
