Osọha lẹ 21

1KANANINU lọ, ahọlu Aladi tọn lọ, he nọ nò huwàji mẹ, sè dọ Islaeli gbọn aliho amé lẹ tọn dali ja; é sọ hoavùn hẹ Islaeli, bo bé adade yé tọn mẹglọnọ. 2Islaeli do opagbe de hlan OKLUNỌ lọ, bo dọmọ, Eyín hiẹ nugbonugbo na jó omẹ he lẹ do alọ ṣie mẹ, whenẹnu yẹn na klan tòdaho yetọn lẹ dovo. 3OKLUNỌ lọ sọ tùntóai hlan ogbè Islaeli tọn, bo dè Kananinu lẹ lọ jó; yé sọ klan yé dovo po todaho yetọn lẹ po: oyín otẹn lọ tọn wẹ yè nọ ylọ Họlma.

4Yé sọ yígbéjizònlin sọn osé Họli mẹ gbọn aliho lọ dali jẹ Ohù Vẹ̃ lọ kọn, nado lédo aigba Edọmi tọn lọ: alindọn gbẹtọ lẹ lọ tọn sọ yín whlẹndonọ na aliho lọ tọn wutu. 5Gbẹtọ lẹ lọ sọ to hódọ do Jiwheyẹwhe go, podọ do Moṣe gó dọmọ, Etẹwutu wẹ mìwlẹ ko hẹn mí hẹ́ji sọn Egipti mẹ wá nado kú to zùngbo lọ mẹ? na akla de ma tin, osìn de ma sọ tin; podọ alindọn mítọn hòwán akla madota he. 6OKLUNỌ lọ sọ do odàn miyonnọ lẹ hlan gbẹtọ lẹ lọ ṣẹnṣẹn, yé sọ hẹnadú gbẹtọ lẹ lọ, omẹ Islaeli tọn susu sọ kú. 7Gbẹtọ lẹ lọ sọ wá Moṣe de, bo dọmọ, Mí ko wáylando, na mí ko dọhó do OKLUNỌ lọ go wutu, podọ do ogo we; hodẹ̀ hlan OKLUNỌ lọ, na é nido dè odàn lẹ lọ sọn mí de. Mọse sọ hodẹ̀ ná gbẹtọ lẹ lọ. 8OKLUNỌ LỌ sọ dọ hlan Moṣe dọmọ, Basi odàn miyọnnọ de na dewe, bo zé e do atin de ji: é nasọ wá jọ, dọ omẹ he odàn hẹnadú dopodopo whenuena é mọ ẹn, na nò ogbẹ́. 9Moṣe sọ basi odàn ogàn vẹ tọn de, bò yí i do atin lọ ji: é sọ wà jọ, dọ eyín odàn de hẹnadú omẹ depope whenuena é pọ́n hlan odàn ogànvẹ̃ tọn lọ de, é gán. 10Ovi Islaeli tọn lẹ sọ yígbéjizọnlin lọ, bo dosla do Oboti mẹ. 11Yé sọ yígbéjizònlin sọn Oboti, bo dosla to Iyeabalimi, to zùngbo lọ mẹ he tin to Moabi nukọn, hlan whèzizẹ dali. 12Yé yígbéjizọnlin sọn fìnẹyì, bo dosla do agbadò Zeledi tọn lọ mẹ. 13Yé sọ yígbéjizọnlin sọn fìnẹyì, bo dosla do awà awetọ Alnọni tọn ji, he tin to zùngbo lọ mẹ, he jẹgbonu tón sọn agboji Amolinu lẹ tọn mẹ: na agboji Moabi tọn wẹ Alnọni, to Moabi po Amolinu lẹ po ṣẹnṣẹn. 14Enẹwutu wẹ yè do dọ to owé awhàn OKLUNỌ tọn lọ tọn mẹ dọ,

Núhe jọ to Ohù Vẹ̃ mẹ,

Podọ to agbadò Alnọni tọn lẹ mẹ,

15Po dòdòklidò agbadò lẹ lọ tọn

Po he dó hlan fininò Ali tọn lọ,

Bo sọ zẹ̀nmẹ agboji Moabi tọn lọ.

16Yé sọ yígbéjizọnlin sọn finẹyì jẹ Beeli : enẹ wẹ odòtò lọ ehe tọn OKLUNỌ lọ dọ hlan Moṣe dọmọ, Bẹ́ gbẹtọ lẹ lọ plidopọ, yẹn bo nasọ na osìn yé.

17Whenẹnu wẹ Islaeli ji ohàn he:

Ví daga, odòtò E; mì jihàn hlan ẹn

18Odòtò lọ, ehe ogán lẹ kùn,

Ehe yẹyinọ sọn gbẹtọ lẹ lọ mẹ kùn,

Gbọn asẹ sénnatọ lọ tọn dali, podọ po opò yetọn lẹ po.

Podọ sọn zùngbo lọ mẹ yé yígbejizọnlin jẹ Matana: 19podọ sọn Matana jẹ Nahalìeli: podọ sọn Nahalieli jẹ Bamoti: 20podọ sọn Bamoti jẹ agbadò lọ mẹ he tin to dànji Moabi tọn lọ, jẹ aga Pisga tọn lọ, he pànnukọn zùnkan lọ.

21Islaeli bo sọ do mẹdagùn lẹ hlan Sihọni ahọlu Amolinu lẹ tọn lọ de, dọmọ, 22Gbọ yẹn ni gbọn aigba towe mẹ luntón: mí ma na lẹ́ do awà de ji biọ dànji gba, kavi biọ vẹ̃ngle mẹ gba; mí ma na nù sọn osìn odòtò lẹ lọ tọn mẹ gba: aligbo ahọlu tọn ji wẹ mí na gbọn yì, kaka mí ko do zè agboji towe go. 23Sihọni ma sọ jlo dikena Islaeli nado gbọn agboji etọn luntón gba: ṣigba Sihọni bẹ́ omẹ etọn lẹpo plidopọ, bo jẹgbonu yì péhẹ Islaeli to zùngbo lọ mẹ, bo wá jẹ Jahazi: é sọ hoavùn hẹ Islaeli. 24Islaeli sọ yí onù ohi lọ tọn do hò e, bo so yí aigba etọn sọn Alnọni jẹ Jabọki, yèdọ sọn ovi Àmọni tọn lẹ lọ de: na agboji ovì Amọni tọn lẹ lọ tọn yín sinsinyẹn. 25Islaeli bo sọ jí tòdaho hẹle pó: Islaeli bo sọ nọ̀ tòdaho Amolinu lẹ lọ tọn lẹpo mẹ, to Hẹṣbọni mẹ, podọ to otò etọn lọ lẹpo mẹ. 26Na Hẹṣbọni wẹ tòdaho Sihọni ahọlu Amolinu lẹ lọ tọn tọn mẹhe hoavùn hẹ ahọlu Moabi tọn nukọntọn, bò sọ yí aigba etọn lẹpo sọn alọ etọn mẹ, yèdọ jẹ Alnọni. 27Enẹwutu wẹ yé he dọhó to hówhinwhẹn lẹ mẹ dọmọ,

Mì wá jẹ Hẹṣbọni,

Gbọ tòdaho Sihọni tọn lọ ni yín dido podọ hinhẹnli:

28Na miyọn de tón yì sọn Hẹṣbọni mẹ,

Miyọnlọ de sọn tòdaho Sihọni tọn mẹ:

É ko dù Ali Moabi tọn súdo,

OKLUNỌ fìyiji Alnọni ton lẹ.

29Dindọn hlan wẹ, Moabi!

Taponọ wẹ hiẹ, gbẹto Semosi tọn lẹ È:

E ko jó visunnu etọn lẹ di gbéjinu lẹ,

Po viyọnnu etọn lẹ po do mẹglọnọ mẹ,

Hlan Sihọni ahọlu Amọlinu lẹ lọ tọn.

30Mìlẹ ko ségá do yé; yè va Hẹṣbọni yèdọ jẹ Dibọni, Mìlẹ bo ko sọ hẹn mlọnai jẹvọ́ yèdọ jẹ Nọfa, Ehe yì jẹ Medeba. 31Le wẹ Islaeli nọ̀ aigba Amolinu lẹ lọ tọn me do. 32Moṣe sọ domẹhlan nado bẹ̀ Jazeli pọn, yé bo sọ yí oto etọn lẹ lọ, bo yan Amolinu he tin to fìnẹ lẹ jẹgbonu. 33Ye sọ lé bo hẹji gbọn aliho Baṣani tọn lọ yì: Ogi ahọlu Basẹm tọn lọ sọ jegbonu yì pó ye, ewọ po omẹ etọn lẹpo po, nado péawhàn to Edlei. 34OKLUNỌ lọ sọ dọ hlan Moṣe dọmọ, Hiẹ dibu nẹ blo: na yẹn ko jo e do alọ towe mẹ, po omẹ etọn lẹpo po, po aigba etọn po; hiẹ bo nasọ wà hlan ẹn dile hiẹ wà hlan Sihọni ahọlu Amolinu le lọ tọn do, he nọnọ̀ Hẹṣbọni. 35Mowẹ yé hò e, po visunnu etọn lẹ po, po omẹ etọn lẹpo po, kaka yè ma do jó dopo dai pò nẹ̃ gba: ye sọ yí aigba etọn.

Currently Selected:

Osọha lẹ 21: BWL23

Highlight

Copy