Osọha lẹ 20
20
1OVI Islaeli tọn lẹ lọ, yèdo agùn lọ pete, wá zùngbo Zini tọn lọ mẹ to osùn tintan lọ mẹ: gbẹtọ lẹ sọ nọ̀ Kadeṣi mẹ: Miliami sọ kú to finẹ, yè sọ diṣio etọn finẹ. 2Osin de ma sọ tin na agùn lọ gba: yé sọ pli yéde dopọ do Moṣe ji podọ do Aalọn ji. 3Gbẹtọ le lọ sọ to wiwọ hẹ Moṣe, bo hódọ, domo, E do jlo Jiwheyẹwhe dọ mí ko ku whenuena mẹmẹsunnu mítọn lẹ kú to OKLUNỌ lọ nukọn! 4Podọ etẹwutu wẹ mìlẹ hẹn agùnpipli OKLUNỌ lo tọn wá zùngbohé mẹ, na mí nidọ kú to finẹ, mìlẹ po kanlinyìnyìn mítọn lẹ po? 5Podọ etẹwutu wẹ mi ko hẹnmí nado heji jẹgbonu sọn Egipti mẹ wá, nado hẹn mí wá jẹ oten ylankan he mẹ? é ma yín otẹn okún ton de, kavi ovotin lẹ tọn kavi ovẹ̃nsinsẹ́n lẹ tọn, kavi pomẹglanate lẹ tọn; mọ osìn dépope ma sọ tin nado nù. 6Moṣe po Aalọn po sọ yì sọn nukọn agùnpipli lọ tọn jẹ ohọ̀n ogohọ̀ opli tọn lọ tọn kọ̀n, bo họ́ jẹ nukunme yetọn lẹ ji: gigo OKLUNỌ lọ tọn lọ bo sọ sọawúhia hlan yé. 7OKLUNỌ lọ sọ dọhó hlan Moṣe, dọmọ, 8Yí opò lọ, bo pli agùn lọ, hiẹ po Aalọn nọvisunnu towe po, mì ni bo dọhó hlan osé lọ to nukun yetọn lẹ nukọn, na é nido na osìn etọn jegbonu; hiẹ nasọ hẹn osìn jẹgbonu wá yé de sọn osé lọ mẹ: mọwẹ hiẹ na na nùnù agùn lọ po kanlinyìnyìn yetọn lẹ po. 9Moṣe sọ yí opò lọ sọn OKLUNỌ lọ nukọn, dole é degbèna ẹn do 10Moṣe po Aalọn po sọ bẹ́ agùnpipli lọ dopọ do osé lọ nukọn, é bo sọ dọ hlan yé dọmọ, Mì sè dinvie, mì atẹnọ lẹ; mìlẹ ni hẹn osìn jẹgbonu wá na mì sọn osé he mẹ wẹ? 11Moṣe sọ zé alọ etọn daga, bo yí opò etọn do linú osé lọ whlawe: osìn sọ jẹgbonu wá gégé, agùn lọ sọ nù po kanlinyìnyìn yetọn lẹ po. 12OKLUNỌ lọ sọ dọ hlan Moṣe po Aalọn po dọmọ, Na mìlẹ ma yise to yẹn mẹ wutu, nado klan mi do wiwe to nukun ovi Islaeli tọn lẹ lọ tọn mẹ, enẹwutu mìlẹ ma na hẹn agùnpipli he wá aigba lọ mẹ gba he yẹn na yé. 13Ehelẹ wẹ osìn Mẹliba tọn lẹ; na ovi Islaeli tọn lẹ lọ wó hẹ OKLUNỌ lọ wutu, ewọ bo sọ do ede hia wiwe to yé mẹ.
14Moṣe sọ do mẹdagun lẹ hlan Kadẹsi mẹ jẹ ahọlu Edọmi tọn de dọmọ, Le wẹ nọvisunnu towe Islaeli dọ dọmọ, Hiẹ yọn otuklajẹ he pla mí lẹpo: 15le otọ́ mítọn lẹ jẹte yì Egipti mẹ do, podọ mi nọ̀ Egipti mẹ ojlẹ dindẹn de; podọ Egiptinu lẹ lọ zán mí ylankan, po otọ́ mítọn lẹ po: 16podọ whenuena mí dawhá hlan OKLUNỌ lọ, é sè ogbè mítọn, bo do angẹli de hlan, bo hẹn mí jẹgbonu sọn Egipti mẹ wá: bo, dayi e go, mí tin to Kadẹsi mẹ, tòdaho de to agapetepete agboji towe tọn lọ mẹ: 17Yẹn vẹ́ we, gbọ mí ni gbọn aigba towe mẹ luntọ́n: mí ma na gbọn ogle mẹ luntón gba kavi gbọn vẹ́ngle mẹ luntón gba, mọ mí ma na nù sọn osìn odòtọ̀ lẹ lọ tọn mẹ gba: alihogbo ahọlu tọn lọ wẹ mí na gbọn yì, mí ma na lẹ́ do awà de ji hlan alọ adusi kavi hlan amiyọn gba, kaka mí ko do zẹ́ agboji towe go. 18Edọmi bo sọ dọ hlan ẹn dọmọ, Hiẹ ma na gbọn aigba ṣie mẹ luntón gba, Yẹn nikã jẹgbonu wá oji we po ohi po. 19Ovi Islaeli tọn lẹ lọ sọ dọ hlan ẹn dọmọ, Mí na hẹji yì gbọn alihogbo lọ ji wẹ: podọ eyín mí sọ nù sọn osìn towe me, yẹn po kanlinyìnyìn ṣie lẹ po, whenẹnu yẹn na na akuẹsọha etọn: ma wà onú depope dogọ́, sà gbọ ma gbọn afọ ṣie le ji luntọ́n kẹdẹwẹ. 20E sọ dọmọ, Hiẹ ma na gbọn luntọ́n gba. Edọmi sọ jẹgbonu wá e ji po gbẹtọ susu po, podọ po alọ sinsinyẹn de po. 21Le wẹ Edọmi kó do nado na aliho Islaeli gbon agboji etọn mẹ luntọ́n; enẹwutu Islaeli diọkọ̀ sọn e de.
22Yé sọ yígbéjizọ̀nlin yetọn sọn Kadẹṣi mẹ: podọ ovi Islaeli tọn lẹ lọ, yèdọ agùn lọ pete, wá jẹ osé Họli kọ̀n. 23OKIUNỌ lọ sọ dọhó hlan Moṣe po Aalon po to osé Họli mẹ, to agboji aigba Edọmi tọn lọ tọn dali, dọmọ, 24Aalọn na yín bibẹ́pli do omẹ etọn lẹ de: na ewọ ma na biọ aigba lọ mẹ gba he yẹn ko na hlan ovi Islaeli tọn lẹ lọ, na mì ṣiatẹ do ohó ṣie go wutu to osìn Mẹliba tọn lẹ kòn. 25Yí Aalọn po Eleazali visunnu etọn po, bo hẹn yé hẹji wá jẹ osé Họli kòn: 26bo klón sọn Aalọn go awu etọn lẹ, bo yí yé do Eleazali visunnu etọn ji: Aalọn bo nasọ yín bibẹ́pli do omẹ etọn lẹ de, bo na kú to finẹ. 27Moṣe sọ wà dole OKLUNỌ lọ degbè do: yé sọ heji yì osé Họli mẹ to nukun agùn lọ lẹpo tọn mẹ. 28Moṣe bo sọ klón sọn Aalọn go awu etọn lẹ, bo yí yé do Eleazali visunnu etọn ji: Aalọn bo sọ kú to finẹ to aga osé lọ tọn mẹ: Moṣe po Eleazali po sọ jẹte sọn osé lọ ji wá. 29Podọ whenuena agùn lọ lẹpo mọ dọ Aalọn yín osiọ, yé viavi na Aalọn azán ogbàn, yèdọ owhé Islaeli tọn lọ lẹpo.
Currently Selected:
Osọha lẹ 20: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
