JAKOBU 1
1
1JAKOBU afànume Jiwheyẹwhe tọn po Jesu Klisti Oklunọ po tọn, hlan whẹndo wiawe he gbàpé lẹ, ayajẹ.
2Mì mẹmẹsunnu ṣie emi, whenuena mì jẹ whlepón hunkọhunkọ mẹ, mì hia ẹ na ayajijẹ popo; 3na mì ni sọ yón ehe dọ whlepón yise mìtọn tọn wẹ nọ wàzón homẹfa tọn. 4Ṣigba mì gbọ homẹfa ni wàzón etọn tla, na mì nido sogbè, na mì nido pégan, núde sọ pò blo.
5Eyín mẹde ma tindo nuyọnẹn to mì mẹ, ni kanbiọ to Jiwheyẹwhe de, mẹhe nọ na omẹ susugege, bo ma nọ wóhẹ omẹ, yè na na ẹn. 6Ṣigba ni biọ to yise mẹ, to matin ayi awe mẹ. Na ewọ he do ayi awe, é taidi agbowhẹn ohù tọn, he gbọn alọ jẹhọn tọn mẹ to bibli hlan nukọn bibli hlan godo. 7Na omẹ lọ len dọ é na mọ núde yí to Oklunọ de blo. 8Gbẹtọ ayiha awenọ ma sọgan hẹn ede lódo to ali etọn lẹpo ji gba.
9Ṣigba gbọ mẹmẹaunnu whiwhẹnọ ni jaya na yè zé e daga wutu: 10ṣigba adọ-kunnọ, dọ yè zín in dai wutu: na di vovó ogbé tọn, mọwẹ é na ju yì. 11Na le owhè zẹ po oyózo po, bo nọ hẹn ogbe yọ, bọ vòvó etọn sọ nọ ja kọnyinai, bọ whanpẹ jijọ etọn tọn sọ nọ súdo: mọkẹdẹ ga wẹ adọkunnọ na kupó do to ali etọn lẹ ji.
12Donanọ wẹ dawe lọ he doakónna whlepón: na whenuena yè tén ẹn pọn, é na yí ojegbakun ogbè tọn, he Oklunọ ko dopagbe hlan yé he yiwan nẹ lẹ. 13Whenuena yè whle mẹde pọ́n, é dọmọ Jiwheyẹwhe de wẹ yè whle e pọ́n sọn blo: na yè ma sọgan yí oylan do whle Jiwheyẹwhe pọ́n gba, mọ é ma sọ nọ whle mẹdepope pọ́n: 14ṣigba omẹ dopodopo wẹ yè whlepón, whenuena yè gbọn wantúntún etọn titi dali dòn ẹn yì, bọ yè sọ doyèklọ ẹ. 15Whenẹnu, wantúntún, whenuena é mọhò, é ji ylando: podọ ylando, whenuena yè basi i pó, é ji okú. 16Mì buali blo, mì mẹmẹsunnu ṣie yiwanna emi. 17Nunina dagbedagbe po nunina he sogbè lẹpo po, aga wẹ é sọn, bo sọ jete sọn Otọ́ hinhọ́n lẹ tọn de, mehe de didiọ de ma te, kavi oyẹ́ lilẹpe tọn. 18Sọn ojlo etọn mẹ wẹ é yí ohó nugbo tọn do hẹn mí jẹgbonu wá, na mí nidó yín sinsẹ́n tintan de to nudida etọn lẹ mẹ.
19Enẹwutu, mì mẹmẹsunnu yiwanna ṣie emi, omẹ dopodopo ni nọ yawu nado sè, ni whleawu nado gblọn, bo sọ whleawu nado gblehomẹ: 20na homẹgble gbẹtọ tọn ma nọ wàzón dódó Jiwheyẹwhe tọn gba. 21Enẹwutu mì yí diho po oylan wàzlẹjẹgo lẹpo po do apadopo, bo sọ yí wàlọmimiọn do yí ohó yè do do mì homẹ lọ, ehe sọgan whlẹn ayiha mìtọn gán. 22Ṣigba mì ni yín basitọ ohó lọ tọn, mì yín sisètọ kẹdẹ blo, to mìde kiklọ mẹ. 23Na eyín mẹde yín sisètọ ohó lọ tọn, bọ é ma yín basitọ gba, é taidi dawe de he tọ nukunmẹ etọn yè ji po e po pọ́n to mẹpónnu me: 24na whenuena é pọ́n ede pó, bo tón yì, to afọdoponẹji é wọn omẹ he hunkọ ewọ yín. 25Ṣigba mẹdepope he donu osén mẹdekannujẹ tọn he sọgbè lọ mẹ pọ́n, bo sọ nọte to e mẹ, bọ ewọ ma yín sisètọ nuwọntọ, ṣigba azón lọ basitọ, omẹ lọ wẹ yè na dona to bibasi etọn mẹ. 26Eyín mẹde to mì mẹ sọawúhia nado yín sinsẹ̀ntọ, bo ma dogàn odẹ́ etọn, ṣigba bo to ayiha ede tọn klọ, sinsẹ̀n omẹ he tọn ovọ́ wẹ. 27Sinsẹ̀n wiwe magble to Jiwheyẹwhe Otọ nukọn wẹ ehe, Nado nọ dla tọsiọvi po asuṣiọsi lẹ po pọ́n to nukunbibia yetọn mẹ, podọ nado whlá ede madodiho sọn aihọn de.
Currently Selected:
JAKOBU 1: BWL23
Highlight
Copy
Compare
Share
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
