Abalōma 8

Ubūmị bwa mwa Mbepo

1Po papo lelo lilino sịkajapo isya kubalōnga aba bali mwa Kilisịtị Jesụ. 2Namanga ululagilo lwa Mbepo ulu lụkututwalila ubūmị botwịbūmbịle pamopēne na Kilisịtị Jesụ lutwabwịle ku butulanōngwa na kubufwe. 3Isị īngomēlesyo syatolịgwe ukubōmba panōngwa ja bōnywa bwa mmbili gwa būndu, Kyala akātolị̄gwe. Ubutulanōngwa bwa mmbili gwa būndu ābūlōngịle ukuntuma Umwanāke jūjo, uju ālisịle nkifwanị kya mụ̄ndu gwa mmbili gwa butula nōngwa kukubōmola ubutulanōngwa, 4Kyala ābōmbịle sịsịsị kokuti isị sịkulōndịgwa isya bugolofụ bwa ngomēlesyo mo sịbonekelege mmyitu twe tukwendela mwa Mbepo, tutịkwendela nsyammbili gwa mbị̄bị. 5Aba bịkubōmba isị ummbili gwabo gwa mbị̄bị gụkubatuma, bo īnyịnogono syabo sya mmbili. Aba bịkubōmba isị Mbepo ịkubabūla ukubōmba; īnyịnogono syabo sịlabị̄le kuli isị Mbepo ịkulōnda. 6Īnyịnogono sya mmbili gwa mbị̄bị sịkutwala ubufwe, īnyịnogono sya mwa Mbepo sịkutwala ubūmị nulutēngāno. 7Po lelo uju akabị̄gwe nisya mmbili gwa mbị̄bị jo ịpelịle nndufụ gwa Kyala; papo īngomēlesyo sya Kyala atịkusịkōnga, sịntolịle nalolị ukusịkōnga. 8Aba bịkulagilịgwa nummbili gwabo gwa mbị̄bị bakabagila ukunkyela Kyala.

9Lolị umwe mụtịkubōmba isị ummbili gwinụ gwa mbị̄bị gụkuti mụbōmbēge; lolị mụkubōmba isị Mbepo ịkuti mụbōmbēge linga nalolị Mbepo gwa Kyala ajēngịle mụ̄nda mmyinụ. Uju linga akaja nagwe Mbepo gwa Kilisịtị, umụ̄ndu bo jujujo akaja gwa Kilisịtị. 10Lolị linga Kilisịtị ajēngịle mụ̄nda mmyinụ, po Mbepo bo būmị bwinụ namanga mụbīkị̄gwe mbumanyānị na Kyala napapo imịbili gyinụ gịkufwa kunōngwa ja butulanōngwa. 11Linga Mbepo gwa Kyala uju ālinsyusị̄sye Jesụ ukufụma mbufwe, ajēngịle mụ̄nda mmyinụ, lelo julajula ālinsyusị̄sye Kilisịtị mbufwe jo jūjo kōpe nukugipa ubūmị imịbili gyinụ gya bufwe ịsakugịpaga nkyenị mwa Mbepo gwake uju ali mmyinụ.

12Po lelo mwebāmyitu uswe tuli bākumelelịgwa, lolị tukaja bākumelelịgwa nu mmbili gwa mbị̄bị, ukukōnga isị gụkuti tubōmbēge 13namanga linga mụkukōnga isya mmbili mwịsakufwa, lolị linga mụkusịgogela mwa Mbepo īmbōmbo sya mmbili gwinụ mwịsakujangako kubūmị. 14Buno bōsa aba bịkulōngosịgwa na Mbepo gwa Kyala bōbāna bā Kyala. 15Namanga mụkālyambilịle mbepo gwa butumwa ugwakubagomokesya nndutēnde kangi; mma, lolị mwambilị̄le Mbepo ugwakubapela umwe ukuja bāna bā Kyala, na mmaka ga Mbepo jujuju uswe tụkunnjoba Kyala ija “Abba” kokuti “Tāta”. 16Jo ju Mbepo jūjo uju ịkusị̄tikila ịmbepo syitu ukuti uswe tuli bāna bā Kyala, 17lelo linga tuli bāna, po tuli bākwịngilapo ikilīngo, tuli bịngilapo kilīngo kya Kyala; tuli bingilanisị nagwe Kilisịtị, linga tụkukubilwa pamopēne nagwe ukuti nanụswe tukajụmbikilịgwege lumo nagwe.

Ubukulūmba ubu bukwịsaga

18Une ngwịnogona ukuti īngubilo sya kabalilo aka sịkabagila ukusifwanịkisya nubukulūmba ubu twịsakukị̄ngulilịgwaga. 19Ifịpelịgwa fyosa fịkusyukwa fị̄jo, fịkugụ̄lila ukuti Kyala abasakule pabwelụ abānāke; 20namanga ifịpelịgwa fyalāmbịle kububofụ komma kubwịgane bwabo lolị kubwịgane bwa Kyala. Lolị lulinkujapo ulusūbilo, 21ukuti ifyene ifịpelịgwa lumo fịsakwabuka kubutumwa bwa bubofụ fịsakujabilịgwaga ubwabuke ubukulūmba bwa bāna ba Kyala. 22Namanga tumēnye ukuti mpaka nkabalilo aka, ifịpelịgwa fyosa fịkwịkēma ukubabịgwa, ukufwana kubabịgwa kwa pa kupapa umwana. 23Lolị fịkaja fyo fịpelịgwa fyene ifị fịkwịkēma, himma, nanụswe twe tulubukị̄le īseke sya Mbepo tụkwịkēma mụ̄nda bo tụkugụ̄lila tụkusyukwa ukuja bāna, nukubāngịgwa kwa mịbili gyitu. 24Namanga twapokị̄gwe nndusūbilo lulūlu; lolị linga tụkufịbona ifị tụkusūbila, po lukaja lusūbilo lwene. Papo jwanị ịkusūbila ifị ịkufịkēta? 25Lolị linga tụkusūbila ifị tutịkufịbona, po tụkufịgụ̄lila mbufịsalyojo.

26Bo atēndị̄ke buno buno na Mbepo jope ịkututūla uswe mmbōnywa bwitu; namanga tukamanya ukwịpụ̄ta bo mụno fịkuti twịpūtilege, lolị Mbepo jūjo ịkutupyelekesya kwa Kyala, 27Umwene lolị Kyala uju ịkwenēsya īndụmbụla sya bāndu jo amēnye isị Mbepo ịkugāmba; namanga umwene ịkubasūmila abāndu bā Kyala ịkukongana naisị Kyala īganịle.

28Tumēnye ukuti utūndu tōsa tụkutūlana ukubakabila īnụnụ aba bannganịle Kyala; aba ababilikilị̄le isị ababīkịle nganị. 29Namanga Kyala abamanyị̄le ngānị abāke bo bakāli nukujobịgwa, alinkubasungulila ngānị ukufwana nu mwanāke, ko kuti umwene ajege jo gwakipānda mmbanyamụ̄ndu abị̄ngị. 30Lelo po papo Kyala alinkubabilikila aba ābasūngwịle; aba ābabilikị̄le alinkubapa ubugolofụ, aba ābapēle ubugolofụ alinkubapa bope nubukulūmba.

Ulugano lwa Kyala mwa Kilisịtị Jesụ

31Kali mụli syosa sịsịsị tubagị̄le ukujoba sịliku? Linga Kyala ali kulubafụ lwitu, po jwanị ạ̄ti akīndanege nanụswe? 32Umwene akālimpākị̄sye nu mwanāke jumojwene, lolị alinkuntāga ịtolo ukuti atufwilege uswe twesa, jo ạ̄ti asị̄te ukutupēla lumo nagwe fyosa ịtolo? 33Jwanị ạ̄ti abalōngege abasalịgwa ba Kyala? Kyala jūjo ịkubajoba ubugolofụ. 34Po lelo ajege jwanị ugwakubalōnga? Ajege jō Kilisịtị Jesụ, uju āfwịle, uju kangi āsyukịle mmbafwe, uju ali kukiboko ikị̄lị̄lo kya Kyala, uju ịkutwimila uswe? 35Kali lelo jwanị abagị̄le ukututapulanị̄a uswe nulugano lwa Kilisịtị? Kali bujege bo butolwe, kali ubukamandanịgwa, pamo ukufwimịgwa, pamo īnjala, pamo ubulōndo pamo ubulugu pamo ubufwe? 36Bo lilyo lisị̄mbị̄gwe mwa kalata ili lịkuti:

Panōngwa jako tuli mbulugu bwa bufwe utubalile tōsa;

Tụkubōmbelịgwa ukufwana ng'ōsi isị sịsụmwịke pakubōlịgwa.

37Lolị mụli syosa sịsịsị tuli nubutolị ubupelelesye ubu bụkufụma kumyake uju atuganịle uswe. 38Buno une, sịngolịle isya kuti nalīnga buje bufwe, pamo ubūmị; nalīnga tuje tūndu twa lilino, pamo ututukwịsaga; na linga baje bāndumịpamo abalagilị pamo amaka gamo ga kumwanya; 39nalīnga bobwịnufụ pamo ubusolofụ pamo akāndu kamo mfịpelịgwa fyosa, fịkamanya ukūsōsya kulugano lwa Kyala ulu luli mwa Jesụ Kilisịtị UNTWA gwitu.

Currently Selected:

Abalōma 8: NYB96

Highlight

Compare

Copy