Abalōma 9
9
Kyala na bāndu bāke
1Ngujoba isyanalōlị; une ndi gwa Kilisịtị ndịkutūngulupa. Īnyịbonelo syangu isị sịkabị̄gwe na Mbepo Mwịkemo syope sịkusịsịmikisya une ukuti ndịkutūngulupa, 2bonguti ubusụlụmanịe bwangu bụkulūmba fị̄jo, nukuti ndi nubusụlụmanịe ubukulūmba nububabe ubusịtakumalika mụndụmbụla jangu, 3kunōngwa ja bakamụ bāngu. Ummbili gwangu kangi ilịlopa lyangu. Kunōngwa jabo nālōndaga ukuti une nịmwene ngụnịgwe na Kyala nsosịgwemo mwa Kilisịtị. 4Abēne abāndu bā Kyala; abapelịle ukuja bānāke, ubukulūmba bwake alinkubanāngisya; āfị̄ngịlenabo īfị̄ngo syake, alinkwenda nukubapa īngomēlesyo; ukwịpụ̄ta kwabo kwanalolị; nāmbilị̄le īfị̄ngo sya Kyala; 5bafụmịle nkikolo kya Bahịbuli abatasị; Kilisịtị jope, mmbūndu bwake, gwakikolo kyabo. Atufịgwege bwịla bwịla Kyala uju ịkufịlagila fyosa. Amenị.
6Ndịkuti ulufị̄ngo lwa Kyala lutolīgwe; namanga abāndu ba Ịsịlaelị bakaja bāndu bā Kyala bōsa. 7Bope abankikolo kya Abụlahamụ bakaja bāna bā Kyala bōsa. Kyala ālimmbūlịle Abụlahamụ ātịle; kwịsakukabilaga mwa Ịsịhaka abankikolo kyako aba nāfị̄ngịle nanụngwe. 8Kokuti abāna aba bapāpị̄gwe mụmmbili bakaja bāna ba Kyala; lolị abāna aba bapāpị̄gwe ukufụma ndufị̄ngo lwa Kyala bo bịkwịnogonịgwa ukuja bankikolo nalolị. 9Namanga ulufị̄ngo lwa Kyala lwafị̄ngilị̄gwe mmasyu aga: Nịsakugomokaga nnda papapa, po Sāla ịsakujaga numwana unndumyana.
10Sịkaja syo sịsịsị syene. Buno abāna abalumyana ba Lebeka bāli bā gwịse jumo, unnyēnya gwitu Ịsịhaka. 11Lolị ukuti Kyala abonekege ukuti ali nubwabuke bwa kusala na bo bakāli ukupāpịgwa, naba bakāli ukumanya ukusịtapulanịa īmbị̄bị ni nụnụ, 12Lebeka ābulị̄gwe ngānịla ukuti mmbasa ịsakujaga mmbōmbị gwa sịndika; bo kuli ukusala kwa Kyala, kwịtotị̄ke nndubilikilo lwake jūjo mwene, momma mụmbōmbo sya bāndu sịmo. 13Bo apa lisị̄mbị̄gwe ili lịkuti: Nālinnganịle Jakobụ, lolị nalịmmbēngịle Esabu.
14Kali lelo po tutigi Kyala akaja nngolofụ? Nakamo napanāndi. 15Buno ājobịle kwa Mose ātịle: Ngumpākisya gwesa uju nịganịle nịmwene. 16Bunobuno lelo akāndu kōsa katịkusokokela mụli isị umụ̄ndu ịkulōnda pamo mụli isị ịkubōmba, himma mwene nkisa kya Kyala. 17Namanga ilịsyu lya Kyala lịkummbūla umalafyala gwa Egịpịtị lịkuti: Nākupelịle ugwe ukuja Malafyale ukuti ngubōmbelege ukuja gwakunāngisya amaka gangu nukufụmụsya īngamụ jangu nkị̄su kyosa. 18Bunobuno lelo Kyala ịkumpākisya uju linga ịganịle, kangi ịkumpelela ubukafụ īndụmbụla gwesa uju ị̄ganịle.
Īngalalisị nulupākịsyo lwa Kyala
19Lolị kumo mmyinụ ịkujōbaga kumyangu ịkutigi: Linga bo sịli bunobuno, po Kyala abagị̄le bulebule ukummūmana umụ̄ndu? Jwanị abagị̄le ukusịpīnga isị ịganịle umwene? 20Gwe Kanya, gwanị gwe gwāti ulōnganege na Kyala? Īndeko jịkujobamo ku mmbūmbandeko jitigi: Fịkị bo umbūmbịle bunobuno? 21Apēne lelo, utigi ummbūmbandeko kummbagị̄le ukubōmbela umfụ gwakubūmbila bomụno ịganị̄le, ukubūmbila īmbụlị jījo īndeko ịbili: īndeko jimo ja mbōmbo īnyimikịgwa pamo ni ndeko ijīngi ja mbōmbo isịta kubagila.
22Bo sịli bububo naisị Kyala ābōmbịle. Ālōndaga ukunāngisya ubukalale bwake nukufụmụsya amaka gāke. Lolị āfịsịle ilyojo nkukịba ukusitakubabōmbela nasịmo aba bantwalilaga īngalalisị, aba bāli bākupyụtịgwa ịtolo, 23ukuti abufụmụsyege ubwịngị bwa bụkulūmba bwake kutūndu twakupākisịgwa utu ātutendekekịsye ngānị ukuja twakunāngisya ubukulūmba, 24na jujuswe twe ātubilikị̄le, momma ukufụma Mmbajụ̄ta mwene, lolị na mmbāpānja? 25Bo mụno ịkujoba mwa kalata gwa Hoseja apa ịkuti:
Aba bakāli bāndu bāngu
ngubajobaga ukuja bāndu bāngu,
unkị̄kulu uju akālinnganịng̣wa,
nịkunnjobaga ukuja nnganịgwa gwangu.
26Kangi pabujo bulabula apa syajobị̄gwe ukuti:
Mụkaja bāndu bāngu,
bịsakujobịgwaga ukuja bāna
bā Kyala umūnị.
27Jesaja ịkujoba isya bany'Ịsịlaelị ịkukōlela ịkuti: Pope nalīnga abāna ba Ịsịlaelị bị̄ngị bo unsānga gwa kunyanja, pope bịkuponaga bābo basyele; 28namanga ubulōngị bwa NTWA pakị̄su bwịsakumalisịgwaga nakalīnga. 29Sịsakujaga bo apa Jesaja ājobịle ulutasị apa ātịle: Linga UNTWA ugwa maka gōsa akātulekị̄le bamo abankikolo po ngali tufwene bo Sotomụ, ngali tufwene bo Gomola.
Ịsịlaelị ni ịbāngilị
30Po papo lelo tụkujoba tụkuti abapānja aba bakị̄jūlaga ukumanyana na Kyala, babwagị̄le ndwịtiko ubugolofụ; 31bo abāndu ba Kyala aba bāsịlōndaga īngomēlesyo syakubamanyānịa na Kyala bakāsyagịle. 32Nōngwa ja fịkị? Papo bakāsịkōngelaga ndwịtiko lolị āsịkōngelega mụmbōmbo syabo. Balinkwenda nukwịkoma pị̄bwe. 33Bo lilyo lisị̄mbị̄gwe mwa kalata ili lịkuti:
Kēta ngubika ilị̄bwe mwa Syonị
lyakubapīsanịa abāndu,
ulwalabwe lwa kubagwisya
Lolị gwesa uju ịkummwịtika
jo atịsakusūsịgwaga.
Currently Selected:
Abalōma 9: NYB96
Highlight
Share
Compare
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
