Abalōma 7

Ikifwanịkisyo kya bwegị ni kipānga

1Mwe bāmyitu, kisịta kwịlāmwa mụkusyaganịaga isị nguja pakujoba, namanga mwesa mụsịmēnye īngomēlesyo. Īngomēlesyo sịkubakaba abāndụ pēne bo balịko kubūmị. 2Ukubalilamo: Unkị̄kụlu umwegị īngomēlesyo sịkumpịnyila kunndume akabalilo kōsa aka unndume alịko kubūmị; lolị linga ịkufwa unndume po umwene ịkuja mwabuke kūngomēlesyo isị syalimpịnyịle. 3Buno buno lelo, linga ịkusịmila ku nnyāmbala ujūngi bo unndume alịko kubūmị ịkujobịgwaga ukuja nkị̄kulu nndogwe; lolị linga unndume afwịle po ịkuja mwabuke ịtolo kūngomēlesyo, po atịkuja nkị̄kulu nndogwe linga ịkwegịgwa nujūngi. 4Bo sịli buno buno na kumyinụ mwebāmyitu, nanụmwe kokuja mụfwịle kūngomēlesyo namanga mụli kambakāsya kammbịli gwa Kilisịtị, lilino po mwịpelịle ukuja bā uju āsyukịle mmbafwe ukuti tujege bākukōnga īnụnụ mụ mbōmbo ja Kyala. 5Namanga bo tāsị tụkukōnga isya mmbili, ifịnyonyo fya mbị̄bị ifị īngomēlesyo syatwalaga, fịlinkubōmba mmịbili gyitu isya kutupelela ukupa īseke sya bufwe. 6Lilino lolị tuli bābuke kūngomēlesyo, papo tufwịle kuli isị ịjolo syatupịnyịle mụnnyololo. Lilino tulekịle ukubōmbela mụnjila īngūlu ija ngomēlesyo isị sịsị̄mbị̄gwe, lolị tụkummbōmbela Kyala mụnjila īmbya ija mwa Mbepo.

Īngomēlesyo nu butulanōngwa

7Kali po tujobēge tutigi īngomēlesyo butulanōngwa? Nalolị mma bo sịkaja. Lolị syali ngomēlesyo isị syalimanyịsye une mụno ubutulanōngwa bujilịle. Linga īngomēlesyo sịkātịle: Unganyonywaga kājūngi, ngali ngamanya ukuti ukunyonywa fyo fị̄ndu fịkị. 8Lolị ubutulanōngwa bwajagị̄le mụngomēlesyo īnjila ukufịsāmbula ifịnyonyo fyosa fya mụ̄nda mmyangu. Apa īngomēlesyo sịkajapo, ubutulanōngwa bụkuja kāndu aka kafwịle. 9Une ịjolo nāli mūmị bo ndịkubutalị ningomēlesyo; lolị bo īngomēlesyo sịsịle ubutulanōngwa bulinkwenda nukusyuka, 10po papo ndinkwenda nukufwa. Īngomēlesyo isị syali syakutwala ubūmị, une kumyangu syatwele ubufwe. 11Ubutulanōngwa bulinkujaga īnjila jake bulinkwendela mụngomēlesyo, bulinkūsyoba bulinkungoga.

12Buno buno lelo isyene īngomēlesyo nyịkemo, lōpe ululagilo lwịkemo, lugolofụ kangi lunụnụ. 13Kali sịsịsị ko kuti īnụnụ syo syatwele ubufwe bwangu? Nakamo napanāndi. Bwali butulanōngwa ubu bwatwele ubufwe; ubutulanōngwa bwatwele ubufwe kumyangu mụnụnụ ukuti buboneke bunụnụ ukuja butulanōngwa. Po papo lelo ubutulanōngwa ukwendela nndulagilo bulinkwịnāngisya ukufịkapo mụmo bwajīlị̄le ukuja bubị̄bị bukīndilisị.

Ubwịte bwa nkāti mmụ̄ndu

14Tumēnye ukuti īngomēlesyo sya Mbepo; lolị une ndi mụ̄ndu gwakufwa, nūlisị̄gwe kubutulanōngwa ukuja ntumwa. 15Isị ngusịbōmba ndịkusyaganịa, namanga ndịkubōmba isị nịganịle ukubōmba, lolị ngubōmba isị ngasịgana. 16Lelo apa ngubōmba isị ndịkulōnda ukubōmba, sịkunāngisya ukuti nịtị̄ke ukuti īngomēlesyo syanalolị. 17Buno buno lelo ngaja joune nalolị uju ịkubōmba sịsịsị; lolị bo butulanōngwa ubu bujēngịle mụ̄nda mmyangu. 18Mmēnye ukuti īnụnụ sịkajamo mmyangu ngubala mụmmbili gwangu gwa būndu. Namanga napapo ngunyonywa ukubōmba īnụnụ, ngutolịgwa ukusịbōmba. 19Ndịkubōmba īnụnụ isị ngulōnda ukubōmba; lolị ngubōmba īmbị̄bị isị ndịkulōnda ukubōmba. 20Linga ngubōmba isị ndịkulōnda ukubōmba, kokuti ngaja joune lelo ne ngusịbōmba, lolị bo butulanōngwa ubu buli mụ̄nda mmyangu.

21Buno buno lelo ngwaga ukuti ululagilo luli pambōmbo; linga nguti mbōmbe īnụnụ, ngwaga ukuti isị sịlịpo syene isyakubōmba une syo mbị̄bị. 22Īnyịbonelo syangu sịsịganile īngomēlesyo sya Kyala. 23Lolị ngwaga ulukomēlesyo ulūngi luli ni mbōmbo mụmmbili gwangu ulukomēlesyo ulu lụkulwa nulukomēlesyo ulu īndụmbụla jangu jilubwene ukutalula. Lukumbela ukuja mpịnyịgwa gwa lulagilo lwabutulanōngwa ulu lụkubōmba mụmmbili gwangu. 24Mma le nnyalịle! Kali ịkujaga jwanị ugwakūmboka kummbili ugu gụkundwala kubufwe? 25Agwilịgwege ulupị Kyala uju abagị̄le ukubōmba sịsịsị mwa Jesụ Kilisịtị UNTWA gwitu.

Lelo mụno njīlị̄le mo mụno: Une nịmwene, mmahala gangu ndi mmbōmbị gwa ngomēlesyo sya Kyala; lolị mụ mmbili gwa būndu ndi mmbōmbị gwa lulagilo lwa butulanōngwa.

Currently Selected:

Abalōma 7: NYB96

Highlight

Compare

Copy