Abalōma 5

Ubumanyānị na Kyala

1Lelo kunōngwa ja kuti tụkujobịgwa ubugolofụ nndwịtiko tuli ndutēngāno na Kyala kunōngwa ja NTWA gwitu Jesụ Kilisịtị. 2Kunōngwa jake tukabịle ubujo ubwakwịngila mwịpyana lilīli ili twimịlemo, kangi tụkusekela nndusūbilo lwa kujabilịgwa ubusịsya bwa Kyala. 3Kangi pamwanya pali sịsịsyo, tụkusekela mụngubilo, bo tumēnye ukuti ulukubilo lụkutwala ubufị̄ndang'oma, 4kangi ubufịndang'oma bụkutwala ubunyambala īndụmbụla, ubunyāmbala īndụmbụla bụkupela ulusūbilo, 5kangi kulusūbilo lutōnekị̄le mụndụmbụla syitu ukwendela mwa Mbepo Mwịkemo uju tupēgị̄gwe.

6Bo tukaja nubutūlị nabumo Kilisịtị alinkubafwila aba batịkunndōnda Kyala pakabalilo aka kịkulōndịgwa. 7Kupala umụ̄ndu ukumfwila umụ̄ndu unngolofụ. Pamo lumo umụ̄ndu abagị̄le ukukịba ukumfwila umụ̄ndu unnụnụ. 8Lolị Kyala atunāngị̄sye ubwịngị bwa lugano lwake kāli ko kabalilo aka twakāli mụ mụmbị̄bị apa Kilisịtị ātufwilaga. 9Mbufwe bwake mo mụno tumanyanị̄le na Kyala; po tụkupelaga pōkị lelo ukwịsakupokịgwa ku ngalalisị syake. 10Twali balugu ba Kyala, lolị mbufwe bwa mwanāke twịpelịle ukuja bamanyānị bāke. Lelo lilino apa tuli bamanyānị ba Kyala, po tutịsakukīndililaga ukupokịgwa mbūmị bwa Kilisịtị. 11Loli sịkaja syo sịsịsị syene; tụkusekela kuli isị Kyala abōmbị̄le mụ NTWA gwitu Jesụ Kilisịtị uju ātupelịle ukuja bamanyānị bā Kyala.

Atamụ na Kilisịtị

12Īmbị̄bị syalyendịle mmụ̄ndu jumojwene ukwịsa nkị̄su, īmbị̄bị sya mụ̄ndu jujuju syalịsịle nubufwe. Po lelo ubufwe bubalanị̄le mmbāndu bōsa ba pāsi namanga umụ̄ndu gwesa atulịle īnōngwa. 13Syalịpo īmbị̄bị pakị̄su bo ululagilo lukāli ukusōka; lolị kuno ululagilo lukajako, īmbị̄bị nasịmo sịtịkubalịgwa. 14Lolị ukufụma pakabalilo ka Atamụ ukwịsakufịka nkabalilo ka Mose, ubufwe bwabakabịle abāndu ba pāsi bōsa, nabābo bakātulịle īnōngwa kifwene bo apa Atamụ ābōmbịle apa akākōngịle ululagilo lwa Kyala.

Atamụ kyali kyo kifwanị kya uju āli gwakuja pakwịsa.

15Lolị bōsa bo babīli bakīndēne, namanga ikyabupe kya Kyala kya ịpyana kikafwana nubutulanōngwa bwa Atamụ. Syanalolị ukuti abāndu bị̄ngị bāfwịle kunōngwa ja mbị̄bị ja mụ̄ndu jumojwene jula. Lolị ilị̄pyana lya Kyala ịkulūmba fịjo; bo kili kyope ni kyabupe kyake ikya ịtolo kubāndu abị̄ngị fị̄jo ukwendela mmụ̄ndu jumojwene, Jesụ Kilisịtị.

16Kangi ikikūngilwa kya Kyala nubutulanōngwa bwa mụ̄ndu jumojwene fịkīndēne. Pānyụma pa mbị̄bị jimojēne bulinkwịsa ubulōngị bwa busobị; lolị pānyụma pa mbị̄bị nyịngị po kịkwịsa ikikūngilwa kya Bugolofụ. 17Syanalolị ukuti kumbị̄bị ja mụ̄ndu jumojwene ubufwe bwalyandịle ukulagila panōngwa ja mụ̄ndu jumojwene jula. Lelo po sịpele pōkị ubukulūmba isị sịfụmịle mmụ̄ndu jumojwene, Jesụ Kilisịtị. Bōsa aba bịkwambilila ilị̄pyana lya Kyala kangi bapēgịgwe ulusajano nagwe bịsakulagilaga mmbūmị, mwa Kilisịtị.

18Bunobuno lelo, bo apa īmbị̄bị jimojēne jabatwalịle ukujobịgwa ububị̄bị abāndụ bōsa nkị̄su, bo jitēndị̄ke ni mbōmbo ja bugolofụ jịkubapelela ubwabuke abāndụ bōsa jịkubapa ubūmị. 19Kangi bo apa abāndu bōsa ulukịlanịo lwa mụ̄ndu jumojwene lwabapelị̄le batulanōngwa, bo bịsakutēndeka ga bububo bōsa bịsakupēlịgwaga ukumanyana na Kyala kunōngwa ja mụ̄ndu jumojwene.

20Ingomēlesyo syalịsịle ukuti ubutulanōngwa bubālege; lolị kuno ubutulanōngwa bwalyongị̄lepo ubwịngị, ilị̄pyana lya Kyala lyalyongelịle lyakindilị̄le fị̄jo. 21Bunobuno lelo ba apa ubulagilị bwa mbị̄bị bwalyendịle mmbufwe, bo lili niịpyana ukwendela mmbugolofụ ukulagila, lịkututwala kubūmị bwa bwịla ukwendela mwa Jesụ Kilisịtị UNTWA gwitu.

Currently Selected:

Abalōma 5: NYB96

Highlight

Compare

Copy