Abalōma 4

Ikifwanịkisyo kya Abụlahamụ ikyakukētelamo

1Tụkujobaga tụkutigi fịkị lelo isya Abụlahamụ, umwịsukulu gwitu nkikolo? 2Namanga linga Abụlahamụ ājobịgwaga ukuja nngolofụ kunōngwa ja mbōmbo, ālinasyo isyakwịtụ̄kifyamo, lolị momma nkyenị mwa Kyala. 3Īnōngwa sya Kyala sịkuti fịkị? Abụlahamụ ammwịtikaga Kyala, po kumyake bulinkujobịgwa ukuja bugolofụ. 4Lelo kumụ̄ndu uju ịkubōmba īmbōmbo, umfwalo gwake gutịkujobị̄gwa ukuja kyabupe lolị gụkujobịgwa ukuja fịhōmbịgwa ifị akabịle.

5Kangi kuli uju ịkubōmba īmbōmbo lolị ịkunsūbila uju ịkubajoba ubugolofụ aba batịkuntị̄la Kyala, ulwịtiko lwake lụkujobịgwa ukuja bugolofụ. 6Buno buno jope na Ndabitị bo ịkunnjoba ubusangalufụ umụ̄ndu uju Kyala ịkunnjoba ubugolofụ pasịma ni mbōmbo isị umụ̄ndu ịkubōmba apa ịkuti:

7Basangalufụ aba ubutulanōngwa bwabo buswegị̄gwe,

aba īmbị̄bị syabo sịkupikilị̄gwe;

8Nsangalufu uju Kyala atịkummbalila īmbị̄bị syake.

9Ubusangalufụ bububu bụkubajoba bēne ababụ̄tịgwa, pamo bope nabasịtakubụ̄tịgwa? Tụkujoba tụkuti ulwịtiko lwajobịgwaga kwa Abụlahamụ ukuja bugolofụ. 10Po lelo kumyake lwajobịgwaga bulebule? Kali kokabalilo bo akāli ukubụ̄tịgwa pamo kwali kokūnyụma bo abụ̄tị̄gwe? Kukāli ko kūnyụma lolị bo akāli ukubụ̄tịgwa. 11Alyambilị̄le ububụ̄tịgwa ukuja kimanyịlo pamo kikolekelo kya bugolofụ ubu āli nabo ndwịtiko bo akāli ukubụ̄tịgwa. Sịsịsị syalimpelị̄le ukuti ajege jo gwịse gwa bōsa aba bịkwịtika kisịta kubụ̄tịgwa, aba bịkujobịgwa ubugolofụ, 12kangi ukufwana bo sịsịsị nukuja gwịse gwa babụ̄tịgwa aba bakābụ̄tị̄gwe kukubụ̄tịgwa kwene lolị kangi bịkukōnga akajīlo ka lwịtiko ulu Tāta gwitu Abụlahamụ āli nako bo akāli nukubūtịgwa.

Ulufị̄ngo lwa Kyala lụkwambililịgwa ndwịtiko

13Ulufị̄ngo ulu lwafị̄ngị̄gwe kwa Abụlahamụ na bankikolo kyake ukuti babagị̄le ukukị̄ngilapo ikị̄su, lukālisị̄le ndulagilo lolị lwalyendị̄le mbugolofụ bwa ndwịtiko. 14Linga bo bakōngị bālulagilo aba babagị̄le ukuja bākwịngilapo ikilīngo, po ulwịtiko lukaja na mbōmbo kangi ulufị̄ngo luli bwasị ịtolo. 15Namanga ululagilo lụkutwala īngalalisị, lolị apa linga lukajapo ululagilo nalumo po sịkujapo īngịlanịo.

16Fyobēne ulufị̄ngo lwafụmịle ndwịtiko ukwendela mwịpyana, ko kuti ilịsyu lya Kyala lijege lyanalōlị kumbejụ̄ ja Abụlahamụ jōsa. Komma kwene kubakōnga ngomēlesyo lolị kōpe nakuli aba bēndị̄le ndwịtiko lwa Abụlahamụ, namanga umwene jo Tāta gwitu twesa; 17bo apa lisị̄mbị̄gwe ili lịkuti: Ngupelịle ukuja gwịse gwa fị̄kolo fịfị̄ngị. Ulufị̄ngo ulo lwanalōlị kumāso kwa Kyala uju Abụlahamụ ālimmwịtị̄ke Kyala uju ịkubasyusya abafwe, uju ululagilo lwake lụkufịpelela ukujako ifị fịkālimo. 18Abụlahamụ ị̄tikaga nukusūbila napapo sịkālipo isyakumpelela ukusūbila, ko kuno alinkwịpela ukuja “Gwịse gwa fịkolo fịfị̄ngị”. Bo mụmo ilịsyu lịkujobela lịkuti: Abankikolo kyako bịsakujaga bo īndōndwa ubwịngị. 19Umwene ākāngēle āli kifụkị ukuja nifyinja mịa jumo, lolị akālogotị̄le ndwịtiko pālema amēnye ukuti ummbili gwake gukāli namaka ukufwana gufwịle, nukuti jope unkasị, Sala, āli nngūmba. 20Abụlahamụ akālwịlāmwaga ulufị̄ngo lwa Kyala; ulwịtiko lwalimpēle amaka, alinkummwimịka Kyala.

21Āli nubwanalolị ukuti Kyala atikutolịgwa ukusịbōmba isị linga afị̄ngịle numụ̄ndu. 22Jonōngwa iji ulwịtiko lwake Abụlahamụ lulinkumpelela ukuti Kyala annjobege ukuja nngolofu. 23Amasyu aga gāsị̄mbị̄gwe ukuti: Ājobịgwaga ukuja nngolofụ, gakāsị̄mbị̄gwe kunōngwa jake mwene. 24Gāsị̄mbị̄gwe ukuja gītu nanụswe twe tụkujobịgwa ukuja bagolofụ, twe tukummwịtika uju ālinsyusị̄sye mmbafwe Jesụ UNTWA, 25uju āgogị̄gwe panōngwa ja ngịlanịo syitu, kangi āsyukịle ukuti tukabege ubugolofū nkyenị mwa Kyala.

Currently Selected:

Abalōma 4: NYB96

Highlight

Compare

Copy