Abalōma 6

Tufwịle kumbị̄bị lolị tuli nkuja p̣amopēne na Kilisịtị

1Kali lelo po tutigi fịkị? Tubagịle ukuti tūmīlilege ukuja mụmbị̄bị ukuti ilị̄pyana lya Kyala libālege? 2Nakamo na panāndi. Uswe kumbụ̄bị tufwịle po tujege mụ mụmbị̄bị bulebule kangi? 3Namanga mụmēnye ukuti bo tōkesị̄gwe mwa Kilisịtị Jesụ, twalyokesị̄gwe mmbufwe bwake. 4Bo tōsị̄gwe twalị̄pelịle ukuja pamopēne nagwe mbufwe bwake, tulinkusyilịgwa pamopēne nagwe, ukuti bo mụmo Kilisịtị āsyukịle mmbafwe mmaka amakulūmba gā Gwịse, bō twịsetutendekege nanụswe ukuja mmbūmị ubupya.

5Namanga apa twịpelịle ukuja jumojwene nagwe nkufwa kwake bo twịsakutendeka ukuja jumojwene nagwe nkusyuka kwake mmbafwe. 6Tumēnye ukuti ubūndu bwitu bwa ịjolo bukomelị̄gwe lumo na Kilisịtị pakikohekano, ukuti amaka ba mmbili gwa butulanōngwa gupyụtịgwege, tungāndisyaga kangi ukuja batumwa ba butulanōngwa. 7Namanga linga umụ̄ndu afwịle bo ābwịke kumbụ̄bị. 8Apa tufwịle na Kilisịtị tụkusūbila ukuti twịsakujaga būmị pamopēne nagwe. 9Namanga tumēnye ukuti Kilisịtị āsyukịle mmbafwe, atịsakwandisya sịku kangi ukufwa ubufwe butịsakwandisya ukunkaba. 10Buno buno lelo, kunōngwa jakuti āfwịle, īmbị̄bị sịkaja na maka kumyake; lilino ali mmbūmị bwa bulilanisị na Kyala. 11Bububo nanụmwe mwịjịnogonege ukuja bafwe kubutulanōngwa lolị ukuja bumị mbulilanịsị na Kyala mwa Kilisịtị Jesụ.

12Kubagị̄le ukuti īmbị̄bị sịngandisyaga kangi ukugikaba imịbili gyinụ gya bufwe, ukuti umwe mụngafịtikisyaga ifịnyonyo fya mmbili. 13Kangi kukuti kambakāsya ka mmịbili gyinụ mụngabupaga ubutulanōngwa ukuti kajege kakubōmbela īnyalị. Lolị mwịnị̄ngege kwa Kyala ukuja bāndu aba basyukịle ukufụma mmbufwe, mwịnị̄ngege gwesa kumyake ukuti mụjege bakubōmba isya bugolofụ. 14Ubutulanōngwa fịkuti bungajaga Malafyale gwinụ; buno umwe sịkabakaba īngomēlesyo, lolị libakabịle liịpyana lya Kyala.

Abatumwa ba bugolofụ

15Kali tutigi fịkị lelo? Po tubōmbēge īmbị̄bị kunōngwa jakuti īngomēlesyo sịkatukaba lolị tukabị̄gwe niịpyana lya Kyala? Mma nakamo. 16Nalolị umwe mụmēnye ukuti linga mwịnị̄ngịle ukuja batumwa bāmụ̄ndu jumo ukukōnga isyake, mmbwanalolị ịtolo bo mụli batumwa ba Malafyale uju mụkukōnga isyake linga ko kuja batumwa ba butulanōngwa ubu bụkutwala ubufwe, pamo ukubōmba ubwịgane bwa Kyala, isị sịkutwala ubumanyānị na Kyala. 17Lolị Kyala agwilịgwege ulupị. Namanga napapo lumo mwali batumwa ba butulanōngwa, mụsịkōngịle numōjo gwinụ gōsa isyanalōlị isị sịli nndumanyịsyo ulu mwalyambilị̄le. 18Mwalyabulị̄gwe kubutulanōngwa mụlinkwịpela ukuja batumwa ba bugolofụ. 19(Ngujobela mụnjobelo ja būndu papo imịbili gyinụ myonywa) Ngubala ukuti; bo apa ịjolo mwalinị̄ngịle gwesa ukuja batumwa ba bunyalị nubusịtangomēlesyo ukuti mụbōmbēge īmbị̄bị, bo mụtēndekege bunobuno lilino mwịnị̄ngege gwesa ukuja batumwa bā bugolofụ ukuti mụbōmbēge isya bwịkemo. 20Bo mụli batumwa bā butulanōngwa, mụkāli mbōmbo nubugolofụ. 21Kali po mwakabịlemo fịkị nkubōmba isị lilino sịkubakosyisonị? Namanga ubumalikilo bwa mbōmbo sịsịsyo bo bufwe. 22Lolị lilino mwabwịke ku mbị̄bị mwịpelịle ukuja batumwa ba Kyala, ubunụnụ ubu mụkabịlemo ko kwelusịgwa ukuja bị̄kemo, ubumalikilo bwake sịsịsị bo būmị bwa bwịla. 23Namanga umfwalo gwa mbị̄bị bo bubfwe lolị ikyabupe kya Kyala ikisịta kūla, bo būmị bwa bwịla ubu buli nkuja pamopēne na Jesụ Kilisịtị UNTWA gwitu.

Currently Selected:

Abalōma 6: NYB96

Highlight

Compare

Copy