Abalōma 3

1Lelo ukuja Njụ̄ta kụkubūmbulila fịkị? Pamo ububụ̄tịgwa buli nubunụnụ bukị? 2Bubagị̄le mụ̄njila syosa, ukwanda tāsị Abajụ̄ta bapēgịgwe ukugalindilila amasyu aga ājobaga Kyala. 3Bule linga bamo bakāli basūbilịgwa? Ukusịtakusūbilịgwa kwabo kukubupīnga ubusūbilịgwa bwa Kyala? 4Nakamo napanāndi! Kyala gwanalōlị na papo linga abāndu bōsa bājaga batūngulu, bo apa sịsị̄mbị̄gwe ukuti:

ugwe sịkunogelege mmasyu gāko,

bo ulipakulongịgwa.

5Lolị linga ububị̄bị bwitu bubikị̄gwe ukuja bwakunāngisya ubugolofụ bwa Kyala, po tụkutigi fịkị? Tụkutigi Kyala akaja nngolofụ ukutufụ̄nda uswe ni ngalalisị syake? (Ngujobela mbūndu.) 6Nakamo. Namanga po lelo ngali abagị̄le ukukilōnga bulebule ikị̄su? 7Lolị linga ukwendela mbutūngulu bwangu ubwanalolị bwa Kyala mo mụmo bụkujīla bwịngị mbukulūmba bwake, po fịkị une ukutinnjemo nnjobị̄gwege ukuja ntulanōngwa? 8Kangi po fịkị ukuti tungabōmbaga īmbị̄bị ukuti mōsị̄silege īnụnụ? Bo sịsyo abāndu bamo bịkutuhēlụla bịkuti botụkuja. Ukulōngịgwa kwabo kutalwịle.

Akajako najumo unngolofụ

9Kali lelo fịkị? Uswe tubakīndịle abāngi? Mma, tukabakīnda nakamo; buno tubalōngịle abāndu bōsa, ifịkolo fyo fịbīli Abajụ̄ta na Bagịlịkị tutịle īmbị̄bị sịbakabịle,

10bo apa sịsị̄mbị̄gwe mwakalata ukuti:

Akajako najumo unngolofụ, najumojwene;

11Akajako najumo uju asyagēnịe;

Najumo uju ịkunndōnda kyala.

12Bōsa basobịle, bōsa pamopēne balabị̄le kubutulanōngwa;

akajako najumo ummbōmba nụnụ, najumo najumojwene.

13Ummịlo gwabo ịpūmba ili lili bwasị,

bịkubōmbela īndimị syabo ukuja syakubasyobela abāndu,

īsụmụ ja njoka jili kūsi kumịlomo gyabo.

14Nkanwa mmyabo mwị̄swile ifịgụne nubukali.

15Amalūndi gābo mēngo ukubūka pakōnịlopa.

16Mụnjila syabo bonange butupu nubufwalanganịfụ.

17Injila ja lutēngāno jo bakajimanya.

18Kumāso kumyabo lukajako ulutị̄lo lwa kuntị̄la Kyala.

19Lilino tumēnye ukuti syosa isị ululagilo

lụkujoba kuli aba bali pāsi palulagilo, kukuti imịlomo gyosa gibatamege, kangi ikị̄su kyosa kị̄pelege kya kulongịgwa na Kyala. 20Buno akajako najumo umụ̄ndu uju sịsakunnogelega nkyenị mmyake ukukōngana nimbōmbo sya lulagilo; namanga ubutulanōngwa bụkumanyilịgwa ndulagilo.

Mụno Kyala ịkutusajanịkisya numwene

21Lolị lilino injila ja Kyala jikubamanyānịa nagwe umwene abāndu jibonị̄ke pabwelụ. Jili pasịma ningomēlesyo, napapo īngomēlesyo sya Mose na bakụngụlụka bājisịsịmịkịsye, 22Kyala ịkubapa ubugolofụ abāndu ndwịtiko lwabo lwakummwịtikila Jesụ Kilisịtị. Ịkubōmba sịsịsị kuli bōsa aba bịkummwịtika Kilisịtị, papo sịkajapo nasịmo isị bakīndēne. 23Kunōngwa jakuti bōsa batulịle īnōngwa bāgị̄lwe ukufịkapo pa bụkulūmba bwa Kyala, 24bịkujobịgwa ubugolofụ mwịpyana lyake ili bapēgị̄gwe ukuja kyabupe kunjila ja bupokị ubu buli mwa Kilisịtị Jesụ, 25uju Kyala ālimmbikịle ukuja lumanyānịo kunjila ja lwịtiko mwịlopa lyake. Isị, syali syakunāngisya ubugolofụ bwa Kyala, namanga mbufịsalyojo bwake ubwịkemo āsịswị̄le īmbị̄bị īndasị. 26Sịsịsị syalisyakunāngisya ubwanalolị bwake nkabalilo aka ukuti umwene nngolofụ nukuti ịkunngolokesya uju ịkummwịtika Jesụ.

27Lelo sịkufumamo syafịkị nkwịtụ̄fya kwitu? Kusosịgwepo. Ndulagilo luliku? Nndulagilo lwa mbōmbo? Mma, lolị nndulagilo lwa lwịtiko. 28Namanga tukwaga ukuti umụ̄ndu ịkujobelịgwa ubugolofụ nndwịtiko, momma mụmbōmmbo sya lulagilo. 29Pamo Kyala jo Kyala gwa Bajụ̄ta bēne? Ākāja jo Kyala gwa bāpānja bope? E, jo Kyala gwa bāpānja bope, 30Kyala ali jumojwene, Abajụ̄ta ịsakumanyanaga nabo kunōngwa ja lwitiko lwabo, kangi isakubajobaga ubugolofụ ndwịtiko lwabo. 31Bule Sịsịsị lelo kokuti ndwịtiko lulūlu po tukusịtāgaga īndagilo? Nakamo napanāndi! Lolị tukusyimikisyaga.

Currently Selected:

Abalōma 3: NYB96

Highlight

Compare

Copy