Abalōma 2

Ubulōngị bwa Kyala

1Fyobene gwe mụndu utịsakuhobokelịgwaga bo kunndōnga ujūngi, papo bo kutụmụla īnōngwa jake kwịlōnga gwịmwene, namanga ugwe gwe kulōnga īnōngwa, kubōmba sịsyo kubalōnga abāngi kangi. 2Tumēnye ukuti ubulōngị bwa Kyala bụkutalula ukubagwila aba bịkubōmba isị sịli bo buno buno. 3Gwe mụ̄ndu kwịnogona ukuti bo kubalōnga aba bịkubōmba sịsịsị, bo kangi kusịbōmba jujugwe, kwịsakuponaga ukulōngịgwa na Kyala? 4Pamo kubusyokela ubwịngị bwa bōlōlo bwake nubufịsalyojo nubufị̄ndang'oma bwake? Usyagēnịe ukuti ubōlōlo bwa Kyala bubīkị̄gwe ukuja bwa kukutalukisya kulupīnduko. 5Lolị kubukafụ bwa ndụmbụla jako isịta lupīnduko, kwịlụ̄ndikila gwịmwene īngalalisị sya pị̄sịku lya ngalalisị bo ubulōngị bwa Kyala ubugolofụ bukị̄ngulị̄gwe.

6Namanga ịsakumpaga umụ̄ndu gwesa ifị fịfwene ni mbōmbo syake: 7Abafị̄ndang'oma pa kubōmba īnụnụ mụkulōnda ubukulūmba, ulwimiko nubūmị bwa bwịla bwịla, ịsakubapaga ubūmị bwa bwịla; 8lolị abapasyulị aba batịkukōnga isyanalōlị, lolị bịkukōnga īnyalị, bo bịsakwambililaga īngalalisị ni ngịmbuko. 9Lwịsakujangako ulutamyo nubukamandanịgwa, ku mụ̄ndu gwesa uju ịkubōmba īmbị̄bị, sịsakutalaga tāsị pa Njụ̄ta napō sịbūkege pa Nngịlịkị. 10Lolị ubukulūmba nulwimiko nulutēngāno ịsakupēgịgwaga uju ịkubōmba īnụnụ, ukatala pa Njụ̄ta ukukōnga pa Nngịlịkị. 11Namanga Kyala atịkusalila mbunụnụ kumāso.

12Bōsa aba batulịle īnōngwa bo bakaja nululagilo bope bịsakufwaga kisịta kulōngelịgwa ndulagilo, aba batulịle īnōngwa bo bali nasyo īngomēlesyo bo bịsakulongelịgwaga mụ mụngomēlesyo 13Buno bakaja bo bapilikị ịtolo ba lulagilo aba bịkuja bagolofụ nkyenị mwa Kyala, lolị aba bịkulubōmba ululagilo bo aba sịsakubanogelaga. 14Bo abapānja aba bakaja na lulagilo bịkusịbōmbela mbupelịgwa bwabo bịkuti bo tupelịlwe, isị ululagilo lụkusịlōnda, bịkwịpela lulagilo bēne, na papo linga bakaja na lulagilo. 15Bịkunāngisya ukuti isị ululagilo lụkulōnda sịsị̄mbị̄gwe mụndụmbụla syabo, bo īnyịbonelo syabo syope sịkusịsịmikisya ninyịnogono syabo sịkufụ̄ndana sịsyo ndupu sịkubalōnga pamo ukubalwila. 16Pịsịku lila apa ukulōngana niịbāngilị lyangu ili ngulūmbilila, Kyala ịsakusịlōngaga isya mbutị̄tu sya bāndu.

Abajụ̄ta nindagilo

17Lolị linga kwịjoba gwịmwene ukuja Njụ̄ta kwịkila ndulagilo kangi kwịtụ̄fya kunōngwa ja bukamụ bwako na Kyala. 18Kangi ubumēnye ubwịgane bwake nukusịtika īnụnụ īmbelelesye, papo umanyịsịgwe mụ̄ndagilo, 19kangi linga gwịmēnye nalolị ukuti uli nndōngosị gwa bafwamāso, uli lumụlị lwa aba bali mụngị̄sị, 20uli gwakubagalosya abakonyofụ, uli mmanyịsị gwa bakeke, uli nubumanyị ubu bwịpịnyịle mụ ndagilo na mbwanalolị. 21Lelo ugwe gwe kubamanyịsya abāngi, lelo fịkị utịkulōnda ukwịmanyịsya gwịmwene? Bo kulūmbilila isya bubị̄bị bwa kwịba, po kangi kwịba jujugwe? 22Ugwe kuti fịkuti najumo angalogwaga po kangi kulogwa jujugwe. Gwe ufịbēngịle fya bakyala po kangi kufị̄ba nnyụ̄mba syakwịpụ̄tilamo jujugwe. 23Gwe kwịtụ̄kifya mụngomēlesyo, fịkị kangi kumfụjụla Kyala kukịlanịa ingomēlesyo? 24Namanga bo apa sịsị̄mbị̄gwe. Īngamụ ja Kyala jịkutukịgwa amahēlụ mmbāpānja kunōngwa jīnụ.

25Ububụ̄tịgwa nalolị bunụnụ linga gwe mụ̄ndu kukōnga ululagilo, lolị linga kufụ̄ja ululagilo ububụ̄tịgwa bwako butịkuja bubụ̄tịgwa.

26Buno buno lelo linga unsịtakubụ̄tịgwa ịkukōnga isị īngomēlesyo sịkulagila, ubusịtakubụ̄tịgwa bwake bwịsakubīkịgwaga ukuja bubụ̄tịgwa. 27Lelo abasịtakubụ̄tịgwa ummbili, aba lolị bịkukōnga īndagilo bịsakubalōngaga umwe mwe mụli nululagilo ulu lusị̄mbị̄gwe kangi nububụ̄tịgwa lolị mụkulufụ̄ja ululagilo. 28Unnjụ̄ta mụ̄nyụma akaja Njụ̄ta nalolị, kangi bukaja bubụ̄tịgwa bwa nalolị ububụ̄tịgwa pānja ịtolo pamo mụmmbili ịtolo. 29Njụ̄ta nalolị uju Njụ̄ta nkāti, kangi ububụ̄tịgwa bwanalōlị bụkuja mụndụmbụla, buli mụ mbepo momma mbusị̄mbe. Imbālo syake, Unnjụ̄ta gwa bo bunobuno sịtịkufụmaga kubāndu lolị sịkufụmaga kwa Kyala.

Currently Selected:

Abalōma 2: NYB96

Highlight

Compare

Copy