Abalōma 14

Unganndōngaga ugwamyinụ

1Mụmmwambililege umụ̄ndụ umōnywa ndwịtiko, lolị komma ukukānịkana nagwe mụli isị ị̄nogwịne umwene. 2Ulwịtiko lwa mụ̄ndu jumo lụkummwịtikisya ukulya akāndu kōsa, lolị umụ̄ndu umōnywa ndwịtiko ịkulya liịseke ị̄seke lyene. 3Umụ̄ndu uju ịkulya akāndu kōsa angansyokelaga uju ịkufịkāna fịmo; kangi jope uju atịkulya fyosa anganndōngaga uju atịkukāna fịmo; kangi jope uju atịkulya fyosa anganndōngaga uju atịkukāna nafịmo, buno umwene Kyala ịkummwambilila gwesa. 4Gwanị gwe gwāti unndōngege ummbōmbị gwa jūngi? Mwene ju Malafyale gwake jo sịli mmyake ukutụmụla ukuti īmịle pamo ịkugwa. Lolị ịkwimaga papo umalafyale amēnye ukummwimịkisya.

5Umụ̄ndu jumo ịkulyimịka ilị̄sịku limo ukuja ịpala ukukīnda agāngi, umụ̄ndu ujūngi ịkugīmịka amasịku gōsa ịtolo. Umụ̄ndu gwesa akōngege isị amahala gāke gatụmwịle. 6Uju ịkubwimịka ubusịku bumo ịkummwimịkila ju NTWA. Jope uju ịkulya fyosa, ịkunndīla ju Malafyale, namanga ịkugwa ulupị kwa Kyala. Jope uju ịkufịkāna fịmo ịkufịkānịla mụ ndwimịko lwa NTWA, jope ịkugwa ulupị kwa Kyala. 7Akajapo mmyitu uju ubūmị bwake jūjo, kangi akajapo najumo uju ịkwịfwila mwene. 8Linga tuli būmị, tujīlị̄le mụ mụ NTWA ukuja būmị, linga tụkufwa tụkufwila mụ mụ NTWA. 9Namanga Kilisịtị āfwịle, kangi āsyukịle ukuti ajege NTWA gwa būmị na bafwe.

10Po fịkị lelo ugwe kunnjoba ububị̄bị unkamụgo? Nanụngwe gwe jūngi nōngwa ja fịkị kunsyokela ugwamyinụ? Uswe twesa twịsakwimaga nkyenị nkikota Kya bulōngị kya Kyala; 11namanga lisị̄mbị̄gwe ili lịkuti:

Nabumo napa ndi mūmị, bo ịkuja UNTWA, bōsa

bịsakufụgamaga nkyenị mmyangu,

kangi kukuti mụ̄ndu ịsakūndāmbulaga une

ukuti une ne Kyala.

12Po lelo twesa jumo jumo twịsakwịjobelaga kwa Kyala uju isyake uju isyake.

Unganngwisyaga ugwamyinụ

13Oko lelo tungāndisyaga ukujobana ububị̄bị, lolị mụtụmụlege umwe isya kuti: Najumo angampelelaga ugwamyabo isya kumpīsanịa pamo isyakunngwikisya mbutulanōngwa. 14Ubwịkūnganịe bwangu nu NTWA Jesụ bumbelị̄le une ukuja nubwanalolị ukuti fịkajako nafịmo ifị̄ndu ifị fịli mwịko fyene, lolị ifị linga umụ̄ndu ịkufị̄nogona ukuti fịli mwịko fyo fikwịpela ukuja mwịko kumyake jūjo. 15Linga ifị̄ndu ifị kulya fịkumpelela ubusụlụmanịe ugwamyinụ, bo ulekịle ukwenda nndugano. Ungammōnāngaga nifị̄ndu ifị kulya umụ̄ndụ uju Kilisịtị ālimfwilị̄le. 16Akāndu akanụnụ kumyinụ kangajaga kākutukịgwa amahēlu, 17namanga ikitāngālala kya Kyala kukaja ko kulya nukunwa, himma ikyene bo bugolofụ nulutēngāno, nulusekelo mwa Mbepo Mwịkemo; 18uju ịkummbōmbela Kilisịtị bo bunobuno jo ankyelị̄le Kyala, jo bope na bāndu bịkummwịtikila.

19Bunobuno lelo fịkuti bwịla ịtolo tusịkōngege isị sịkutwala ulutēngāno na isị sịkututūla nkukasanịa twe bābo batupu. 20Komma ukōmola īmbōmba ja Kyala kunōngwa ja fị̄ndu. Nalolị ifị̄ndu fyosa fị̄nụnụ ịtolo, lolị fịli mwịko ifị̄ndu ifị umụ̄ndu fịkuntwalila ubutulanōngwa. 21Īnụnụ ko kuleka ukulya īnyama pamo ukunwa ubwalwa bwa māfị̄lu pamo akāndu akāngi kōsa aka unnịno ịkwịkịnyamo. 22Ulwịtiko ulu uli nalo, ujege nalo mụ̄nda mmyako nkyenị mwa Kyala. Nsangalufụ umụ̄ndu uju atịkwịbona ubusobị bo ịkubōmba isị ịkusịbona ukuti sībagị̄le. 23Lolị uju linga ịkulya nukwịlāmwa mụ̄nda, jo ịjobị̄le mwene ububị̄bị, papo atịkulila ndwịtiko. Namanga kōsa aka linga gwe mụ̄ndu kubōmba bo ukị̄toteka ndwịtiko butulanōngwa.

Currently Selected:

Abalōma 14: NYB96

Highlight

Compare

Copy