Abalōma 13

Ukubōmba isị īsịlikali jịkulagila

1Umụ̄ndu gwesa ị̄lāmbikege kubalagilị aba bankabịle. Namanga bukajako nabumo ubulagilị ubu bukafụma kwa Kyala, abalagilị bōsa aba balịko abīmị̄ke ju Kyala. 2Po papo lelo uju linga ịkubị̄la abalagilị bo akị̄lịle akāndu aka akīmị̄ke ju Kyala; abēne lelo aba bịkwịla bo bịkwịjēgela ukulōngịgwa. 3Namanga abalagilị bakaja bakutị̄lịgwa nabābomba nụnụ, lolị bakutị̄lịgwa nababōmba mbị̄bị. Bule gwịganịle ukuti ungantị̄laga unndagilị? Po bōmbaga īnụnụ, po ịsakukupālaga, 4namanga umwene mmbōmbị gwa Kyala gwakukubōmbela īnụnụ ugwe. Lolị linga kubōmba īmbị̄bị, utetemege, namanga ulūbo ulu akōlị̄le lukaja lwa kukịnila; umwene mmbōmbị gwa Kyala gwakummbōmbela īngalalisị syake kummbōmba mbị̄bị. 5Bunobuno lelo umụ̄ndu kummbagị̄le ukwịlāmbika, lolị komma kwene ukwịlambikila ndutēnde lwa kutị̄la ingalisị sya Kyala, lolị mope na mụno īnyịbonelo sịkulōndela. 6Ko kunōngwa jijiji nanụmwe mụkusōnga īsōngo, papo abalagilị babōmbị bakulūmba ba Kyala, bịkubōmba isị batumị̄gwe ukubōmba. 7Umụ̄ndu gwesa mụmpege aka kammbagị̄le; ugwasōngo ja nyụ̄mba mụmpege īsōngo ja nyụ̄mba; ugwasōngo ja pampaka, mpege īsōngo ja pampaka; ugwakuntị̄la mụntị̄lege; ugwakummwimịka, mụmmwimịkege.

Īmbōmbo sya kubōmbelana

8Mụngajaga ninōngwa numụ̄ndu najumo ugwakubamelela, lolị kwene kukuganana; buno uju annganịle umpalamanị jo asịkōngịle īndagilo. 9Namanga īndagilo syosa, nulwakuti. Ungalogwaga nulwakuti: Ungagogaga. Nulwakuti: Ungahījaga, nulwakuti: Ungatotomelaga, nisị̄ngị syosa, sị̄kamandēnịe nndulagilo lumolwene ulu lụkuti: Unnganege unnịno bo apa gwịganịle gwịmwene. 10Uju annganịle umpalamanị atịkummbōmbelamo sịku īmbị̄bị; bunobuno lelo ukunngana unnịno ko kusịkōnga īndangilo syosa.

11Umwe kubabagị̄le ukubōmba sịsịsị, namanga mụmēnye ukuti kị̄sịle akabalilo ka kulēmbukila ntulo umwe. Buno akabalilo kākupokịgwa uswe kasegelị̄le fị̄jo lilino ukukīnda mụno kājīlị̄le bo tụkupīnduka. 12Mwe bakūndwe, mụngabụkisanịaga īmbị̄bị pambị̄bị, lolị ulubụkisyo mụnndēkele ju Kyala; namanga lisị̄mbị̄gwe ili likuti: Ulubụkisyo lwangu jujune, ne nịkubụkisyaga bo ịkuja UNTWA. Ikilo kịkuja pakujōnga, umụ̄sị gukuja pakwịsa. Po papo lelo atusịlekege īmbōmbo sya mụngị̄sị, tufwalege īngwego sya lumụlị; 13twendege ulwendo ulu lubagị̄le, tubonekege ukuja bapamụ̄si. Tungajaga bābufụgụja, tungajaga bākwịtekēlela, tungajaga ba mụ̄saka, tungajaga balufụ kubulogwe, tungajaga bā kulwa, tungajaga bākubịnịkana. 14Lolị mụmfwalege ju NTWA Jesụ Kilisịtị, mụngagubịkilaga nafịmo ummbili ifị fịkugutwalila ubwịkute bwa fịnyonȳo.

Currently Selected:

Abalōma 13: NYB96

Highlight

Compare

Copy