Abalōma 15

Mụbakyelege abāngi, mwemma mwịbēne

1Uswe twe tuli namaka ndwịtiko fịkuti tubatūlege abōnywa ukupīmba imịsịgo gyabo. Tungịkyelaga twịbēne. 2Lolị twesa fịkuti tubakyelege abị̄nītu aba tupalamēne nabo nukubị̄nogonela īnụnụ kumyabo isya kubajēnga ndwịtiko. 3Buno jope na ju Kilisịtị akị̄kyelaga mwene. Lolị ātēndị̄ke bo mụmo lịkujobela ili lisị̄mbị̄gwe mwa kalata ili lịkuti: Amahēlụ gīsa aga bākutukaga ugwe gāngwilịle une. 4Namanga syosa isị sịsị̄mbị̄gwe sịsị̄mbị̄gwe ukuti sịtumanyịsyege uswe ukuti tukabēge ulusūbilo ukufụma mbufịsalyojo na nndusūbisyo, ifị bakalata bịkutubūla. 5Umwene lolị Kyala, īnyị̄buko ja bufịsalyojo nulusūbisyo, abapege ukuja ndụmbụla jimojēne mwe bābo batupu, 6ko kuti mwesa umwe mụje nndomo gumogwene pakuntụ̄fya Kyala Ugwịse gwa NTWA Jesụ Kilisịtị.

Īndumị īnụnụ kubapānja

7Po papo lelo amwambililanịlege bo apa Kilisịtị abāmbilị̄le umwe ukuti Kyala īmikịgwege. 8Nịkubabūla une ukuti Kilisịtị alịpelịle mmmbōmbị gwa babụ̄tịgwa ukunāngisya ubwanalolị bwa Kyala, ukuti āsịsịsịmikisyege īfị̄ngo isị āfị̄ngịle na bātāta, 9ko kuti abapānja bammwimịkege Kyala panōngwa ja kisa kyake. Bo apa lisị̄mbị̄gwe ili lịkuti:

Po papo lelo nịkukupālaga mmbapānja,

kangi nikujīmbilaga īngamụ jako.

10Kangi lijobị̄gwe ilyakuti:

Amụsekelege mwe bapānja, pamopēne nabāndu bāke;

11Kangi nguti:

Amụmpālege UNTWA mwesa mwe bapānja,

abāndu bōsa bampālege;

12kangi isị̄ngị Jesaja ịkujoba ịkuti:

Unsị gwa Jese gụkwịsaga,

uju asụmwịke pakubalagila abapānja;

abāpānja mo bịsakusūbilaga mmyake.

13Kyala gwa lusūbilo abị̄susyege nulusekelo kangi nulutēngāno nndwịtiko, ko kuti amaka ga Mbepo Mwịkemo gabapelelege ukuti mụlefụkege ịtolo nndusūbilo.

Isị syampelelaga Paulị ubukịfụ ukusị̄mba

14Mwe bāmyitu une sịngolịle sịfịkịlepo isyinụ ukuti umwe mwị̄swile ubunụnụ, mwị̄swile gōsa kangi mụmēnye nukumanyịsanịa. 15Lolị mụ nōngwa sịmo ngịbịle ịtolo ukubasị̄mbila mụnjila ja lukūmbusyo, kunōngwa ja ịpyana ili mbēgị̄gwe na Kyala, 16ukuja mpụ̄tị gwa Kilisịtị Jesụ kubapānja mụmbōmbo ja bupụ̄tị bwa ndumị īnụnụ ja Kyala, ko kuti ukusōsya ilịkemo lya bapụ̄tị lị̄tikisị̄gwege bo lipēgị̄gwe ubwịkemo na Mbepo Mwịkemo. 17Mwa Kilisịtị Jesụ lelo ndinafyo ifya kwịtụ̄kifyamo mụmbōmbo jangu jakummbōmbela Kyala. 18Namanga ndịsakukịba ukujoba sịmo isị akabōmbela mmyangu ukulwaga ulutị̄lo kubāpānja ukwendela mwịsyu pamo mụmbōmbo, 19mmaka ga fịmanyịlo nifị̄swigu, mmaka ga Mbepo Mwịkemo, kokuti ukufụma mụ Jelụsalemụ ukusyungūtila ukwakufịka Mwịlịlịka nndūmbilị̄le mfịkịlepo ilịbāngilị lya Kilisịtị, 20ukwịjūla kwangu bwịla kwali kokulūmbilila īndumị Inụnụ pōsa ịtolo apa īngamụ ja Kilisịtị jakāli ukupilikịgwa, ukuti nangajakujēngaga palwalo ulu ālị̄sye umụ̄ndu ujūngi, 21ukukōnga bo ili lisị̄mbị̄gwe ili lịkuti:

Bịsakusịbonaga aba bakabūlịgwamo sịku īnōngwa syake,

kangi bịsakusyaganịaga aba bakapilikamo sịku

īnōngwa syake.

Ulubạ̄tiko lwa Paulị lwa kunnjātila Loma

22Sịsịsị syo isị sịmbelị̄le ukupīngịgwa ukwịsa kumyako utubalilo tu twịngị. 23Lolị lilino, apa ngaja nabujo bwa mbōmbo mụmbafụ sya kuno, kangi papo nnyonyịlwe ifyinja fị̄ngị ukwịsa kumyinụ, 24ngusūbila ukubabona bo ngukīnda ukubūka ku Sịpanịja, nukūngūjisya umwe ukusụmụka īnjila jangu bo nāngēle nanụmwe mbūgịle. 25Lolị nkabalilo aka nsụmwịke ku Jelụsalemụ ndwele ifyakwakubapa abị̄kemo. 26Namanga aba Mụmaketonịja na ba mw'Akaja bị̄kyelị̄le ukubasāngulila fịmo abalōndo mmbị̄kemo ba mụ Jelụsalemụ; 27bālikyelị̄le ukubōmba bunobuno, lelo nalolị kwababagị̄le ukubatūla. Kunōngwa jakuti Abajụ̄ta bālilanị̄le nabo Abapānja īsajo sya mwa Mbepo. Abapānja kwababagị̄le ukuti bope fịkuti bạ̄ti bababōmbelege Abajụ̄ta īsajo isị sịkwendela ntūndu twa kukolela mmaboko. 28Bo mmalịle īmbōmbo jijiji, bo mbanị̄ngịle īndalama syosa isị bāsāngulilị̄gwe nịsakusụmụkaga ukubūka ku Sịpanịja po nēnde ukubaponịapo bo ngukīnda. 29Bo nịkwịsa kumyinụ Mmēnye ukuti nịkwịsaga nulusajo lwa Kilisịtị lōsa mụno lujīlị̄le.

30Mwe bāmyitu, nịkubasūma, nịkupyelekesya mmalafyale gwitu Jesụ Kilisịtị na nndugano lwa Mbepo nịkuti atwịjūlanịlege nanịne nanụmwe ndwịpụ̄to lwa kunyịpụ̄tila une kwa Kyala, 31ukuti mbokịgwege une kubafụ̄jị ba mụ Jụtaị; nukuti īmbōmbo jangu iji ngubūkila mụ Jelụsalemụ jị̄tikisịgwege na bị̄kemo bā mụmo. 32Po nịsakwịsaga kunyinụ bo ulusekelo lundolịle, linga Kyala ị̄tị̄ke, nịsakutūsyaga nanụmwe. 33Kyala, gwa lutēngāno ajege nanụmwe mwesa. Amenị.

Currently Selected:

Abalōma 15: NYB96

Highlight

Compare

Copy