Abalōma 12

Ubūmị bwa mụmbōmbo ja Kyala

1Fyobēne lelo mwe bāmyitu ngubasūmila mwịpyana lya Kyala ukuti mụnnị̄ngege imịbili gyinụ ukuja ịkemo ulyumị, ilị̄kemo ili lịkwịtikisịgwa kwa Kyala ili lịkuja lwịpụ̄to lwinụ lwa mụmbepo. 2Mwandege mụ̄ngafwanaga ni īnyị̄ho sya nkisu mụno, lolị Kyala abāndulege nkāti abapege īnyịnogono īmbya. Po lelo mwịsakumanyaga ukubwaganịa ubwịgane bwa Kyala, mụkusịmanyaga inụnụ isị sịkunkyela umwene kangi īmbelelesye.

3Namanga mwịpyana ili mbēgị̄gwe nịkubabūla mwesa jumojumo nkilūndilo kyinụ mụngịjị̄nogonaga ukukīnda apa umụ̄ndu abagị̄le ukwịjị̄ngonela, lolị amahala gajeko mwịgelelege mụmo Kyala abapēlị̄le ulwịtiko uju ulwake uju ulwake. 4Namanga bo apa mụmmbili gumogwene tuli nutumbakāsya tūtwịngị, kangi tōsa tuli ntubōmbo ntubōmbo, 5bo tuli nanụswe, napapo tuli bị̄ngị tuli mmbili gumogwene mwa Kilisịtị, uju kambakāsya ka nnịne uju kambakāsya ka nnịne. 6Lelo bo tuli nifịkūngilwa uju ikyake uju ikyake ukukōngana niịpyana ili tupēgị̄gwe, tufịbōmbelege; linga bo bukụngụlụka tububōmbelege ukukōngana nulwịtiko lwitu; 7linga bo bubōmbelị tububōmbelege, uju ali nikikūngilwa kya bumanyịsị amanyịsyege. 8Uju ali nikikūngilwa kya kubatēngulila abāndu akibōmbelege. Uju ali nikikūngilwa kya kumpa unnịne aka linga alinako jo abōmbelege mmbupe bwake, uju ikikūngilwa kyake kya bulōngosị jo ị̄jūlege ukulōngosya, uju ịkunāngisya ilị̄pyana kubāngi jo abōmbēge mbusangalufụ ịtolo.

9Ulugano lungajaga lwa lusyobo: mụsịbēngege īmbị̄bị, mụsyumīlilege īnụnụ; 10amụgananege mwe bābo batupu nndugano lwa bunyamụ̄ndụ, mụkīndililege ukunāngisanịa ulwimiko. 11Mụnganyogēlekaga nkwịjūla, īndụmbụla syinụ sịpyege pakummbōmbela UNTWA. 12Ulusūbilo lwinụ bwịla ịtolo lubapelege ukuja bāndu aba bali nulusekelo; mbutolwe mụjege bafị̄ndang'oma mūmīlisyege ukwịpụ̄ta. 13Mụbatūlege abị̄kemo mụli isị linga bafụ̄mbịlwe; mụbāmbililege abahēsya.

14Mụbasajege aba bịkubafwima; mụbasajege, mụngabagụnaga. 15Mụsekelege nabo aba bịkusekela, mụlilege nabo aba bịkulila. 16Amụbombanịlege īnụnụ mwesa, mụngịnogonaga isya kwịjụ̄mbika mwịbēne, lolị mwangalege nabāndu abāpāsi, mụngị̄bonaga ukuja bāmahala fị̄jo.

17Mụngabụsanịkisyaga īmbị̄bị pambị̄bị. Mwịnogonege ukubōmba sịnụnụ bo bịkukēta abāndu bōsa. 18Linga sịkwịtika mụmanyanege na bāndu bōsa. 19Mwe baganịgwa, himma lolị mụsịlekege īngalalisị sya Kyala, namanga lisị̄mbị̄gwe ili lịkuti: Ulubụkisyo lwangu jujune, nịkubụkisyaga jujune, bo ịkuja UNTWA. 20Mma linga unndugu gwako ali ninjala, umpege ifị̄ndu; linga ūmị̄lwe amīsi, mpepo amīsi gākunwa; namanga linga kubōmba bunobuno bo kummbūngānịkisya īngalabuga syamōto pantu pamyake. 21Ungatolịgwaga nimbị̄bị, himma īmbị̄bị usịlāmbikege ni nụnụ.

Currently Selected:

Abalōma 12: NYB96

Highlight

Compare

Copy