Abalōma 11
11
Ikisa kya Kyala kubany'Ịsịlaelị
1Lelo ngulālūsya: Bule Kyala ābatāgịle abāndubāke? Mma nakamo akābatāgịle. Une Jujune ndi Mwịsịlaelị, ndi gwanndujụ̄ngụ lwa Abụlahamụ, nkikolo kya Benjamịnị. 2Kyala akabatāga abāndụ bāke aba ābasūngwịle ukufụma mụ mmbwandilo. Umwe mụmēnye isị kalata ịkujoba isya Elịja, isị ịkummbūlila kwa Kyala Ịsịlaelị ịkuti: 3Gwe NTWA babagogịle abasōlolị bāko, bapāngulēnịe ifịgemo fyako fyakwịkemēkesyapo, nsyele jujune nịmwene, bịkulōnda ukūngoga. 4Kyala ābāmwịle ātịle fịkị? Ātịle nịbīkị̄le abāndu baelufụ bahāno nababili (7,000) aba bakị̄pụ̄tamo kwa Kyala gwabutūngulu, Bāli. 5Bo sịli nalilino, balịpo banāndi aba basyele mụli aba Kyala ābasūngwịle mwịpyana lyake. 6Ukusala kwake kukufụmila mwịpyana lyake, momma mụli isị bābōmbịle. Namanga linga ilị̄pyana lya Kyala lyafụmilaga mụli isị abāndụ bịkubōmba, po ilị̄pyana lyake ngali likaja ịpyana lya nalolị.
7Bule lelo? Ịsịlaelị apōndịlwe ukukaba ifị āfịlōndaga. Abasalịgwa bāfyagile, lolị abāngi bōsa balinkwịpela bāmapuli kulubilikilo lwa Kyala.
8Bo apa kalata ịkujoba ịkuti:
Kyala abalūlēsye, abapelịle ukuti amāso gābo gangakētaga,
īmbulukutu sịngapilikaga, mpaka umụsyugu.
9Jope Ndabitị ịkujoba ịkuti:
Fịkuti ulusekelo lwabo ulwakulya ifị̄ndu lwịpelege ntego,
kangi lutāmbo, fịkuti lujege ntego gwa bwịna, lujege lubụkisyo.
10Fịkuti bapūpalege amāso gābo ukuti bangakētaga; fịkuti
īndamyo sịbagụ̄ndamịkege īnyụma syabo ntubalilo tōsa.
11Lelo ngulālūsya: Bo Abajụ̄ta bị̄pīsēnịe bagwịle nukufwila jījo? Nakamo napanāndi. Panōngwa jakuti abēne bātulịle īnōngwa, ubupokị bwịsịle kubāpānja, kokuti Abajụ̄ta bababīkilege ubūfị. 12Īmbị̄bị sya Bajụ̄ta syatwele īsajo nyịngị kukị̄su, kangi ubulōndo bwa mụ mbepo syabo bwatwele īsajo nyịngị kubapānja. Po lelo sịsakupelaga pōkị ubwịngị īsajo linga Abajụ̄ta bōsa bope bapīndwịke?
Ubupokị bwa bapānja
13Lilino ngujoba nanụmwe mwe bapānja nguti: Apa ndi ntumịgwa gwa bapānja ngwịtụ̄kifyaga mụ mbōmbo jangu. 14Pamo mmbagị̄le ukubapelela ukuja nubūfị abākikolo kyangu ukuti mụmanyege ukubapoka bamo. 15Namanga bo batāgị̄gwe, abāndụ bōsa nkị̄su bālyandwịke ukufụma nkuja balugu ba Kyala ukwịpela bamanyānị bāke. Po sịsakujaga bulebule lelo, bo bịtikisị̄gwe? Bwịsakujaga bumị bwa bafwe!
16Linga ikimēnya kya kisyesye ikitasị apēgị̄gwe Kyala, po ikisyesye kyosa ikinywamụ kyake kyope; linga imịsị gyampịkị apēgị̄gwe Kyala po īsāmba syope syake. 17Lolị linga īsāmba sịmo sịtụmụlị̄gwe, lelo po ugwe gwe nsyungutị gwa mmatēngele kumela bo ukatịkịgwemo mmbujo bwabo, kwenda nukulilanịla nasyo ifịnụnụ mụnsị gwa nsyunguti ugu gubyalị̄gwe, 18ungị̄tụ̄kifyaga mụsāmba. Linga kwịtụ̄fya, ukūmbukege ukuti ukaja jo ugwe gwe kugwimikisya unsị, lolị mụnsị mo mụno ugwe gwịkolị̄le.
19Ugwe kutigi: Īsāmba syatụmụlị̄gwe ukuti une ngafyikịgwe mụno syali. 20E, isyo syo sị̄syo. Syatụmụlị̄gwe papo sịkāli nulwịtiko, lolị ugwe gwịkịtị̄kemo utịkusụkanịka panōngwa ja lwịtiko. Po lelo gwandege ungịjụ̄mbikaga, lolị upāsyege. 21Namanga linga Kyala akāsịpākị̄sye īsāmba īfụma mụmpịkị, po āt'akupākisyege ugwe? 22Ukēte lelo ubōlōlo nubukali bwa Kyala: Ubukali kuli aba bagwịle, lolị mōlōlo kumyako ugwe, linga kūmīlila mmbōlōlo bwake; linga mma po nanụngwe kwịsakutumụlịgwa. 23Nabāngi bope linga bịkūmīlila mụ mbusịtalwịtiko bịsakumekesịgwangamo, namanga Kyala ali na maka ukubamekesyamo kangi. 24Namanga linga gutụmụlị̄gwe ugu gwabyalị̄gwe, bule po īsāmba isị sịpelelị̄gwe mụnsyunguti ummbyalịgwa sịtịsakukīndililaga ukumekesịgwamo mụnsyunguti gwabo?
Ikisa kya Kyala kuli bōsa
25Mwe bāmyitu, ukuti mụngị̄syobaga mwịbēne ukuti mụli namahala, ngulōnda ukuti mụsyaganịe isya kubutị̄tu isị. Ubukafụ īndụmbụla bwa bany'Ịsịlaelị bamo bukaja bwa kujako bwịla, bụkujangako ukwịsakufịka pa kabalilo aka abany'Ịsịlaelị bōsa bịsakwịsaga kwa Kyala, 26po lelo Ịsịlaelị gwesa ịsakupokịgwaga bo apa lisị̄mbị̄gwe ili lịkuti:
Umpokị ịsakufụmaga mwa Syonị,
ịsakubujosyaga ubwịlangomēlesyo mwa Jakobụ;
27lulūlu lo lwịsakujaga lo lufị̄ngo lwangu lwa kufị̄nga
nabo bo ndipakōmola īmbị̄bị syabo.
28Kulubafụ lwa ịbāngilị abēne balugu ba Kyala, kunōngwa jīnụ; lolị kulubafụ lwa kusūngulịgwa, baganịgwa, kunōngwa ja bị̄sukulu bābo. 29Namanga linga Kyala ābapēle abāndụ ifyabupe fyake nukubasūngula; atịkwānduka. 30Pakwanda umwe mwalinsāmbukị̄le Kyala, lolị lilino mụlyagịle ilị̄pyana lyake ukufụma nndufụ̄jo lwabo. 31Bo sịtendị̄ke bunobuno, kunōngwa ja ịpyana ilị mwambilị̄le Abajụ̄ta bịkummwịla Kyala ko kuti bope bāmbililege ikisa kya kya Kyala. 32Namanga Kyala ābapịnyịle abāndụ bōsa ndwịlo lwabo ukuti abapākisyege bōsa.
Kyala atụ̄fịgwe
33Bo bwịngị bukị ubukabị bwa Kyala: Bo busolofu bukị amahala gāke nubumanyị bwake! Jwanị uju abagị̄le ukusịlīngānịa īndụmụlilo syake? Jwanị abagị̄le ukusyaganịa īnjila syake?
34Bo apa lisị̄mbị̄gwe ili lịkuti:
Jwanị asịmēnye īnyịnogono sya NTWA?
Jwanị amēnye ukummbūla ukuti: Utigi, utigi?
35Jwanị uju ampēlemo fịmo lumo,
ifyakumelelịgwa linga sịku ukuti anngomolelege?
36Buno fyosa ịtolo fịkufụma kumyake, fịkwendela mụ mmyake jūjo kangi fịkulabila kumyake; īmikịgwege Kyala kisịta kumalika sịku. Amenị.
Currently Selected:
Abalōma 11: NYB96
Highlight
Share
Compare
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
