ISAÍAS 62
62
1Sión llaqtaraykun mana upallakusaqchu,
Jerusalén llaqtaraykun mana ch'inyakusaqchu,
pacha illarimuy hina chaninchasqa kasqan k'anchanankama,
qespichisqa kasqanpas tutapi k'anchay hina rawranankama.
2Jerusalenlláy, hatun suyukunapas chaninchasqa kasqaykitan rikunqaku,
llapa reykunapas hatunchasqa kasqaykitan rikunqaku.
Kikin Señor Diosmi mosoq sutiwan sutichasunki,
3Señor Diospa makinpin munayllaña corona hina kanki,
Diosniykiq makinpin reypa churakunan pillu hina kanki.
4Manañan “Qosaq Wikch'usqan” nisqachu kanki,
manañan hallp'aykipas “Purunyachisqa” nisqachu kanqa,
aswanmi “Diospa munakusqan” nisqa kanki,
hallp'aykipas “Casaraq Warmi” nisqan kanqa.
Qanwanmi Señor Diosqa kusikunqa,
payqa qosa hinan hallp'aykipaq kanqa.
5Imaynan waynapas doncella sipaswan casarakun,
chay hinatan churiykikunaqa qanta hap'ikapusunki,
imaynan qosapas warminwan kusikun,
chay hinatan Diosniykiqa qanwan kusikunqa.
6Jerusalenlláy, perqaykikuna patapin qhawaqkunata sayachirqanki,
tutapas p'unchaypas manapunin upallakunqakuchu.
Qankuna, Señor Diosta prometekusqanmanta yuyarichiqkuna,
aman samankichischu.
7Aman Diosta saminchankichischu
Jerusalenta wakmanta perqanankama,
Jerusalenta teqsimuyuntin pachawan yupaychachinankama.
8Señor Diosmi hunt'ananpaq jurarqan,
atiyninwanmi kayta hunt'anqa:
Manan hayk'aqpas trigoykitaqa awqaykikunawan mikhuchisaqchu,
manan llank'asqayki vinotapas
wak llaqta runakunawan ukyachisaqchu,
9aswanpas qankuna cosechaqkunan chaytaqa mikhunkichis,
hinaspan ñoqata yupaychawankichis,
uvastapas pallankichismi,
hinaspan ch'uya wasiy patiokunapi chay vinota ukyankichis, nispa.
10Jerusalenpi tiyaqkuna, punkunkunata lloqsiychis,
ñanta llaqtaypaq wakichiychis,
hatun ñanta allichaychis,
rumikunata pallaychis,
llaqtakunapaq banderata sayachiychis.
11Señor Diosmi kay pachantinman willan:
Jerusalenta niychis:
¡Qhawariy! Qespichiqniykin hamushan,
¡Qhawariy! Horqokampusqan llaqtanwanmi hamushan,
nispaykichis, nispa.
12Paykunatan “Ch'uya Llaqta” ninqaku,
“Señor Diospa Qespichimusqankuna” ninqaku,
Jerusalentataqmi “Diospa Munakusqan Llaqta” ninqaku,
“Manaña Wikch'upusqa Llaqta” ninqaku.
Currently Selected:
ISAÍAS 62: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
