ISAÍAS 63
63
Diosmi awqankunata muchuchin
1¿Pin kay, Edom suyumanta hamuq?
¿Pin kay, Bosra llaqtamanta yawarkama p'achayoq hamuq?
¿Pin kay, sumaq p'achaykusqa hamuq?
¿Pin kay, qharillaña thaskimuq?
Ñoqa Señor Diosmi kani,
qespichinaypaq atiyniyoqmi kani,
atipasqaytan willakuni.
2¿Imanaqtintaq p'achaykiri pukachasqa kashan?
¿Imanaqtintaq uvas saruqpa p'achan hina p'achaykiri pukallaña kashan?
3Ñoqallan uvas sarunapi sarurqani,
manan hatun suyukunamanta pipas yanapawarqanchu.
K'arakta phiñakuspan awqaykunata sarurqani,
k'arakta phiñakuspan paykunata t'usturqani,
yawarninkun p'achayman ch'allaykuwarqan,
llapa p'achaytan pukachaykukurqani.
4Ñoqan yuyaykukurqani awqaykunata muchuchinaypaq,
llaqtayta kacharichinay p'unchaymi chayamunña.
5Allintan qhawarirqani,
manan pipas yanapaykuwaqniy karqanchu,
mana yanapaykuwaqniy kaqtinmi utirayarqani,
chaymi makiyqa atipachiwarqan,
k'arakta phiñakuspan kallpachakurqani.
6K'arakta phiñakuspan hatun suyukunata t'usturqani,
k'arakta phiñakuspan paykunata machachirqani,
hinaspan yawarninkuta pampaman hich'arqani.
Israel runakunapaq Diospa munakuynin
7Señor Diospa mana p'itiyta munakuwasqanchismantan willakusaq,
tukuy imaymanata ruwapuwasqanchismantan payta yupaychasaq,
Israel runakunata anchatapuni munakuspanmi khuyapayaspanmi
paykunapaq sumaq sonqonwan tukuy imaymanata ruwarqan.
8Paymi nirqan:
Paykunaqa llaqtaypunin kanku,
manan paykunaqa saqerpariwanqakuchu, nispa.
Chaymi payqa tukuy llaki-phutiyninkumanta qespichirqan,
9manan kachapurichu manataq angelchu paykunataqa qespichirqan,
aswanpas Dios kikinmi paykunataqa qespichirqan.
Munakuspanmi khuyakuspanmi paykunata kacharichirqan,
ñawpaqa sapa p'unchayllan paykunata hoqarispa aparqan.
10Paykunataq ichaqa pay contra sayarirqanku,
Santo Espirituytan phiñachirqanku,
chaymi Señor Diosqa awqanku kapurqan,
pay kikinmi paykuna contra maqanakurqan.
11Ichaqa ñawpa p'unchaykunatan yuyarirqanku,
Moisespapas runakunaqpas kawsasqan p'unchaykunatan yuyarirqanku,
chaymi tapukurqanku:
¿Maytaq mama qochamanta paykunata horqomuq Diosri?
¿Maytaq runakunatawan umallikunatawan horqomuqri?
¿Maytaq Moisesman Santo Espiritunta churaqri?
12¿Maytaq hatun atiyninwan Moisesta pusamuqri?
¿Maytaq wiñaypaq mentasqa kananpaq
unuta ñawpaqenkupi rakispa
13unu ukhunta paykunata chimpachiqri?
Imaynan caballoqa ch'in cheqasninta purin,
chay hinatan paykunaqa mana misk'akuspalla purirqanku.
14Imaynan wakakunaqa q'omer wayq'oman uraykun,
chay hinatan Señor Diospa Espiritunqa samarinaman paykunata pusarqan.
Diosnillayku, chay hinatan llaqtaykita pusarqanki,
ahinapin sutiykiqa ancha hatunchasqa karqan, nispa.
Yanapanapaq mañakusqa
15Señor Diosnillayku, hanaq pachamanta qhawarimuwayku,
ch'uya qhapaq tiyanaykimanta qhawarimuwayku,
¿Manañachu wañuy atiyta munakuwankiku?
¿Maytaq atiyniykiri?
¿Manañachu ñoqaykupaq sonqoyki ch'allaq nin?
¿Manañachu ñoqaykuta khuyapayawankiku?
16Qanqa taytaykun kanki,
Abrahamña mana yuyariwankuchu chaypas,
Israelña mana reqsiwankuchu chaypas,
Señor Diosnillayku, qanmi taytaykuqa kanki,
maypachamantapas kacharichillawankikun.
17Señor Diosnillayku,
¿imanaqtintaq ñanniykikunamanta pantaqta hinallata qhawawankiku?
¿Imanaqtintaq qanta mana manchakunaykupaq sonqoykutapas rumiyaykachinki?
Kamachiyki kasqaykurayku kutirimpuwayku,
llaqtayki kasqaykurayku hampuwayku.
18Pisi tiempollan awqaykuqa ch'uya llaqtaykita munaychakuwarqanku,
paykunan ch'uya wasiykita sarunchakurqanku.
19Mana hayk'aqpas kamachiwasqaykiku hinan kapushayku,
mana hayk'aqpas llaqtaykichu kaykuman karqan hinan kapushayku.
Currently Selected:
ISAÍAS 63: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
