ISAÍAS 61
61
Qespikuymanta sumaq willakuykuna
1Qollana Señor Diospa Espiritunmi hunt'aykushawan,
paymi akllakuwaspa hawiwarqan
wakchakunaman allin willakuykunata willanaypaq.
Kachamuwarqanmi llakisqa sonqoyoqkunata kusirichinaypaq,
presokunaman kacharisqa kanankuta willanaypaq,
watay wasipi kaqkunaman lloqsipunankuta willanaypaq.
2Kachamuwarqanmi llaqtanta sumaqta qhawarinan p'unchay chayamunanta willanaypaq,
awqanchiskunaman paypa ayni-kutichinan p'unchay hamunantawan willanaypaq.
Kachamullawarqantaqmi lutopi kaqkunata sonqochanaypaq,
3Sionpi tiyaq lutokuqkunaman
llakikuyta rikuchiq usphamantaqa sumaq coronata qonaypaq,
waqaymantaqa q'ochukuyta qonaypaq,
umphuyaymantaqa yupaychayta takichinaypaq.
Paykunaqa Señor Diospa mallkisqan encina sach'a hinan kanqaku,
chanintapunin kawsanqaku,
Señor Diostan hatunchanqaku.
4Paykunan ñawpa raqaykunata wakmanta perqanqaku,
ñawpa thunisqakunatan wakmanta sayarichinqaku,
unayña thunisqa llaqtakunatan wakmanta hatarichinqaku.
5Llaqtalláy, wak llaqtayoqkunan ovejaykichista michipusunkichis,
wak runakunan chakraykichista llank'apusunkichis,
uvasniykichistapas pallapusunkichis.
6Qankunataq “Señor Diospa sacerdotenkuna” nisqa kankichis,
“Diosninchista serviqkuna” nisqa kankichis.
Hatun suyukunaq kaqninkunatan usachinkichis,
qhapaq-kayninkun qankunaq kapunqa.
7Qankunaqa manañan p'enqachisqachu k'umuykachisqapaschu
aswanpas suyuykichistan hap'ikapunkichis,
chaypin ancha askha kaqniyoq kankichis,
wiñaypaqtaqmi q'ochukunkichispas.
8Señor Diosmi nin:
Ñoqaqa chanin-kaytan munakuni,
suwakuytapas mana chanin ruwaytapas cheqnikunin.
Hunt'aq kaspaymi runaykunaman premiota qosaq,
paykunawanmi wiñaypaq rimanakusaq.
9Mirayninkupas hatun suyukuna ukhupin mentasqa kanqa,
wawankupas llaqtakuna ukhupin reqsisqa kanqa.
Llapa paykunata rikuqkunan reparanqaku
ñoqa Señor Diospa paykunata saminchasqayta, nispa.
10Anchatapunin Señor Diospa ruwasqan hawa q'ochukuni,
sinchitapunin Diosniypa yanapawasqanmanta kusikuni,
payqa qespichiwarqanmi, ñoqawanmi atipachirqan,
uma k'uyunantin noviota hinan p'achachiwarqan,
munay illakunawan sumaqchasqa noviata hinan p'achachiwarqan.
11Imaynan chakra yurakunaqa phutumun,
imaynan huertapipas muhuqa wiñamun,
chhaynatan Qollana Señor Diosqa hatun suyukunaq rikushasqan
chanin-kayta yupaychayta phutuchimunqa.
Currently Selected:
ISAÍAS 61: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
