ISAÍAS 51
51
Jerusalén llaqtaq sonqochasqa kasqan
1Uyariwaychis chanin kawsayta munaqkuna,
munayniyman hina kawsayta munaqkuna.
Qhawariychis may qaqamantachus horqosqa kasqaykichista,
may rumi qolqamantachus horqosqa kasqaykichista.
2Yuyariychis taytaykichis Abrahamta,
yuyariychis wachakuqniykichis Saratapas.
Abrahamtaqa sapallanraq kashaqtinmi waqyarqani,
hinaspan samincharqani askhayachirqani.
3Cheqaqtapunin ñoqa Señor Diosqa Sión llaqtata sonqochasaq,
llapa raqay-raqay kasqankunatan llakipayasaq.
Ch'inneqkunatan Edén huertaman hina tukuchisaq,
ch'aki pampakunatapas plantasqay huertaman hinan tukuchisaq.
Hinan runaqa Sionpi kusikunqa q'ochukunqa,
takiykunqakun, “gracias” niwanqakun.
4Llaqtalláy maki uyariway.
Suyulláy, maki uyariway.
Ñoqan yachachiyniyta willasaq,
ñoqan chaninchaspa llaqtakunata k'anchasaq.
5Usqhayllan asuykamushani kacharichinaypaqqa,
qayllaykamushaniñan qespichinaypaqqa,
atiyniywanmi llaqtakunata kamachisaq.
Mama qocha pata suyukunapas suyawanqakun,
yanapaykunaytan suyakunqaku.
6Hanaq pachata qhawariychis,
kay pachatapas qhawarillaychistaq.
Hanaq pachaqa q'osñi hinan chinkaripunqa,
hallp'a pachapas p'acha hinan mawk'ayapunqa,
chaypi tiyaqkunapas ch'uspi hinan wañunqaku.
Ñoqan ichaqa wiñaypaq qespichisaq,
ñoqaqa atipashallasaqpunin.
7Uyariwaychis, chaninkaqta reqsiqkuna,
uyariwaychis, yachachikuy simiyta sonqoykichispi hap'iqkuna.
Ama manchakuychischu runakunaq pisichasqasuykichista,
ama manchakuychischu k'amisqasuykichista,
8p'achata hinan thuta paykunata k'utunqa,
millmata hinan paykunata thutanqa.
Ñoqan ichaqa atipashallasaqpuni,
ñoqaqa wiñaypaqmi qespichisaq.
9Rikch'ariy, Señor Diosniyku,
rikch'ariy, kallpachakuy.
Ñawpa p'unchaykunapi ruwasqaykita hina kunanpas ruway.
Qanmi Rahab nisqa hatunkaray animalta ñut'urqarirqanki,
mama qochapi tiyaq manchana animaltapas sat'irqarirqanki.
10Qanmi mama qochata manchana unu ukhuta ch'akichirqanki,
mama qocha ukhuta ñanman tukuchirqanki
Egiptomanta horqomusqaykikunaq chimpananpaq.
11Señor Diospa qespichimusqankunaqa kutimunqakupunin,
Sionmanmi takispa haykunqaku,
wiñaypaqmi kusisqa tiyakunqaku.
Q'ochukunqakun kusikunqakun,
manañan hayk'aqpas nanachikunqakuchu anchinqakupaschu.
12Señor Diosmi nin:
Ñoqapunin sonqochaqniykiqa kani.
¿Imanaqtintaq wañuq runata manchakunki?
¿Imanaqtintaq q'achu hinalla kaq runata manchakunki?
13¿Kamaqniyki Señor Diostachu qonqapuwarqanki?
Ñoqan hanaq pachata mast'arqani,
kay pachatapas teqsicharqani.
¿Imanaqtintaq muchuchiqpa k'arak phiñakusqanta
sapa p'unchay manchakushallankipuni?
¿Imanaqtintaq manchakunki wañuchinasuykipaq wakichikushaqta?
Chayri, ¿maytaq chay muchuchiqpa k'arak phiñakusqan?
14K'umuykachisqa presokunaqa usqhayllan kacharichisqa kanqa,
manan watay wasipi wañunqakuchu,
t'antankupas kashallanqapunin.
15Ñoqan Apu Señor Diosniyki kani,
sutiyqa Tukuy-atiyniyoq Señor Diosmi.
Ñoqan mama qochata aytichini,
phoqchiqesqankunatapas qaparichini.
16Ñoqan hanaq pachata mast'arqani,
kay pachatapas teqsicharqani,
kunantaq Sión llaqtata nini:
Qanqa llaqtaymi kanki,
ñoqan yachachiyki,
makiywanmi llanthuykuyki, nispay.
17Jerusalén llaqta, ¡rikch'ariy!
¡Rikch'ariy! ¡Sayariy!
Qanmi Señor Diospa k'arak phiñakuyninwan hunt'a qeruta chaskirqanki,
hinaspan ch'umapantinta ukyarqanki,
machasqa hinan thamaykachasharqanki.
18Llapa wawaykikunamantaqa
manan mayqenpas pusaqniyki kanchu,
llapa uywasqayki wawakunamantaqa
manan makimanta aysaqniyki kanchu.
19Kay iskay llakin qatirqasunki:
suyuykin purunyachisqa llat'anasqa karqan,
runaykikunan yarqaypi awqa-tinkuypi wañurqan.
¿Pitaq llakipayasunki?
¿Pitaq sonqochaykusunki?
20Llikapi hap'isqa taruka hinan
wawaykikunaqa mana kallpayoq kashanku,
llapa calle esquinakunapin chuta-chuta urmanku,
Señormi k'arakta phiñakuspan paykunata muchuchirqan,
Diosniykin paykunata wanachirqan.
21Llakichisqa llaqta, uyariy,
machasqan kashanki, ichaqa manan vinowanchu.
22Qollana Señor Diosniykin,
llaqtanta amachaqmi nisunki:
Chay machasqayki qerutan qechuyki,
manañan k'arak phiñakuyniywan hunt'a qerutaqa ukyankichu.
23Muchuchiqniykikunan nirqasunki:
Kumpakuy, qan patantan thaskisaqku, nispanku.
Qantaq pampaman thallaykurqanki,
pampata hina sarunasuykikupaq.
Kunantaqmi chay muchuchiqniykikunaman chay qeruta qosaq ukyanankupaq.
Currently Selected:
ISAÍAS 51: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
