ISAÍAS 52
52
Diosmi Jerusalenta preso kasqanmanta qespichinqa
1Sión llaqta, ¡rikch'ariy!
¡Rikch'ariy! ¡Kallpachakuy!
Jerusalén Diospa ch'uya llaqtan,
sumaqllaña p'achaykiwan p'achakuy.
Manañan haykumusunkikuñachu
mana iñiyniyoq runakunapas qhelli runakunapas.
2Jerusalén llaqta,
ñut'u hallp'ata chhaphchikuspa sayariy,
kamachikuy tiyanaykipi tiyaykuy.
Sión llaqtamanta preso apasqakuna,
watasqa kasqaykichista paskakuychis.
3Qollana Señor Diosmi nin:
Mana imallamanmi kamachipaq vendesqa karqankichis,
mana qolqellawantaqmi horqokapusqaykichispas.
4Ñawpa p'unchaykunapin llaqtayqa Egipto suyuman rirqan,
hinaspan chaypi tiyamurqan.
Qhepatataq Asiria suyu payta saruncharqan.
5Kunanri, ¿imatataq Babiloniapi rikushani?
Llaqtayqa mana qolqellawanmi chayman preso apasqa kashan,
umalli runankunataq khuyayta waqashanku,
Babilonia runakunataq sapa p'unchay k'amishawanku.
6Ichaqa qhepa p'unchaymi llaqtayqa reqsiwanqa,
hinaspa chaykuna sucedenanta ñawpaqmanta nisqayta reparanqa,
arí, ñoqapunin chaytaqa nirqani, nispa.
7Ima munaymi orqo patankunata chaski hamushaqta rikuyqa,
payqa allin willakuytan apamushan,
payqa allillan kawsanankutan willakushan,
payqa Diospa atipasqantan willakushan,
hinaspan Sión llaqtata nin:
¡Diosniykin kamachikushan! nispa.
8¡Uyariy! Llaqta arariwaykikunan kunkayoqta qaparinku,
kuskallan kusisqa qaparinku,
ñawinkuwanpunin rikunku
Señor Diospa Sionman kutimpushasqanta.
9Señor Diosmi llaqtanta sonqochan,
Jerusalentan kacharichin,
chayrayku, Jerusalén raqaykuna,
kuskalla kusisqa qapariychis.
10Señor Diosmi tukuy hatun suyukuna rikushaqtin
ch'uya atiyninta rikuchin.
Kay teqsimuyuntintaqmi yachanqa
Diosninchispa qespichiwasqanchista.
11¡Lloqsiychispuni Babiloniamanta!
¡Ama qhellitapas llamiychischu!
Señor Diospa kaqninkunata apaqkuna,
Babiloniamanta lloqsiychis, hinaspa ch'uyanchakuychis.
12Ichaqa manan usqhayllachu lloqsinkichis,
manan ayqespachu ripunkichis,
Señor Diosmi ñawpaqeykichista rinqa,
Israelpa Diosninmi qhepaykichismantapas waqaychasunkichis.
Señor Diospa kamachinpa muchusqan
13Señor Diosmi nin:
Kamachiyqa allin yachaywanmi ruwanqa,
hatunchasqan qhapaqchasqan kanqa,
ancha mentasqataq kanqapas.
14Imaynan paymanta askha utirayarqanku
uyanqa sinchi k'irisqapuni kasqanta rikuspa,
manaña runa hinañachu kapusqanta rikuspa,
15chay hinallataqmi hatunchasqata rikuspa
askha hatun suyukunapas utirayanqaku.
Payta rikuspankun reykunapas upallakunqaku,
mana piqpapas willakusqantan rikunqaku,
mana hayk'aq uyarisqankutan yachanqaku, nispa.
Currently Selected:
ISAÍAS 52: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
