ISAÍAS 50
50
1Señor Diosmi nin:
¿Yuyankichischu mamaykichis Israelmanta t'aqakusqayta
imaynan qhariqa warminmanta t'aqakun hinata?
Chay hina kaqtinqa,
¿maytaq t'aqanakusqa qelqari?
¿Yuyankichischu pimanpas manu kaspay kamachipaq qankunata vendesqayta?
Manapunin, aswanpas huchallikusqaykichisraykun vendesqa karqankichis,
mana kasukusqaykichisraykun mamaykichisqa apachisqa kapurqan.
2¿Imanaqtintaq hamuspayqa mana pitapas tarirqanichu?
¿Imanaqtintaq waqyakuqtiypas mana pipas kutichimuwarqanchu?
Chayri, ¿yuyarqankichischu mana kacharichiyta atinaypaq?
¿Manachu kallpayoq kani qespichinaypaq?
Kayqa, phiñarispallaymi mama qochata ch'akichini,
mayukunata ch'inneqman tukuchini,
hinan challwakuna mana unu kaqtin asnaripunku,
unumanta ch'akichikuspa wañupunku.
3Ñoqan hanaq pachata tutayaykachini
yana p'achawan hina qatani, nispa.
Señor Diospa kamachinpa kasukusqan
4Señor Diosmi allinta yachachiwarqan
sayk'usqata simiywan kallpachaspa sonqochanaypaq.
Sapa paqarmi maki uyarichiwan
yachaqashaq hina uyarinaypaq.
5Qollana Señor Diosmi uyarichiwarqan,
manataqmi mana kasukuqchu karqani,
manan qhepamanpas kutirirqanichu.
6Hinallatan wasaypi waqtachikurqani,
hinallatan sunkhayta t'irachikurqani,
hinallatan k'amichikurqani uyaypipas thoqaykachikurqani.
7Señor Diosmi yanapaykuwan,
chaymi mana k'umuykachisqachu kasaq.
Qaqa hinan allintapuni sayani,
yachanitaqmi mana p'enqachisqa kanayta.
8Qayllallaypin kashan chaninchawaqniy Diosqa.
¿Pin ñoqawan churanakunqa?
¡Kuskalla juezman risun!
¿Pipas ch'atawananpaq yuyaykunchu?
¡Asuykamuwachun!
9Qollana Señor Diosmi yanapaykuwaqniyqa,
¿pin huchachawanman?
Llapallankun awqaykunaqa p'acha hina thantakunqaku,
thutaq k'utusqan hinan paykunaqa kanqaku.
10Qankunaqa Señor Diosta manchakuspa
kamachinpa siminta kasukuqkuna, uyariychis:
Laqhayaqpi purinkichis chaypas,
mana ima k'anchaypi kankichis chaypas,
Señorman hap'ipakuychis,
Diosniykichisman k'askaykukuychis.
11Qankunan ichaqa, nina hap'ichiqkuna,
rawrashaq k'anchayta hap'ichiqkuna,
chay ninaq k'anchayninpi purinaykichis,
rawrachisqaykichispa k'anchayninpi kawsanaykichis.
Ñoqa Señor Diosmi kay hinata muchuchisqaykichis:
Ñak'arispan wañunkichis.
Currently Selected:
ISAÍAS 50: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
