ISAÍAS 30
30
Egipto suyuman hap'ipakuq contra willakuy
1Señor Diosmi nin:
¡Ay mana kasukuq wawaykunamanta!
Paykunan purinku yuyaykusqallankuta
manataq ñoqaq yuyaykusqaytachu,
hukkunawanmi rimanakunku mana ñoqaq kamachisqallay,
chaykunawanmi huchata yapakushallanku.
2Usqhayllaraqmi Egiptoman phawarinku
ñoqata mana tapuykuwaspanku,
Egipto rey Faraonpa yanapaynintan maskhanku,
Egiptoq llanthunpin pakakuyta munanku.
3Faraonqa yanapanasuykitaqa aswan p'enqamanmi churasunki,
Egiptoqa llanthuykunasuykitaqa hatun llakiwanmi ñit'iykusunki.
4Hinaña oficialniykikuna Egipto suyu Zoán llaqtapi kashanku,
kachapuriykikunapas Egipto suyuq Hanes llaqtankama chayanku chaypas,
5llapallankun paykunaqa p'enqasqa rikukunqaku
chay mana imapaq valeq Egipto suyu hawa
chay llaqtakunaqa mana imapi yanapakuqmi,
aswanmi p'enqaypi hatun llakipiraqtaq qhepachin, nispa.
6Neguev ch'inneqpi uywakunamantan Señor Diosqa nin:
Sinchi manchakuy llakiy-llaki suyuntan
qaparkachaq leonkunaq tiyasqan cheqasnintan
picaq mach'aqwaykunaq, phalaq mach'aqwaykunaq kanan cheqasnintan
qhapaq-kayninkuta illankutawan Judamanta kachapurikuna
asnokunapi camellokunapiwan apashanku
mana imapaq valeq Egipto llaqtaman,
7mana ima yanapakuq yanqa kaq llaqtaman,
chayraykun sutichani “Mana ima ruwaq Rahab” nisqata.
8Señor Diosmi niwan:
Kunan riy, hinaspa p'alta rumipi kayta qelqamuy,
qelqallaytaq qelqana k'uyupi
qhepa p'unchayman paykuna contra kashanallanpaq, nispa.
9Kay runakunaqa mana kasukuq k'ullullañan kanku,
llullakuspalla puriqkunan kanku,
Señor Diospa yachachikuynintapas mana uyariy munaqmi kanku.
10Rikhuriy rikuqkunatan ninku:
Amaña rikhuriyta rikuychisñachu, nispa,
profetakunatapas nillankutaq:
Amaña cheqaq kawsaymanta willawaykuñachu,
aswan sumaq simikunallata willawayku,
aswan huk hinanmanta rimapayawayku.
11T'aqarikuychis ñanmanta,
cheqaq ñanmantapas pulqariychis,
amaña Israelpa Ch'uya Diosninta ñawpaqeykuman churawaychischu, nispa.
12Chayraykun Israelpa Ch'uya Diosninqa nin:
Qankunaqa manan munankichischu kay willakuytapas,
awqanakuyman q'otunakuymanwanmi hap'ipakunkichis,
13chayraykun qankunaqa huchachasqa kankichis.
qonqay thunikunanpaq alto perqa yaqrasqa wiksamushaqmanmi rikch'akunkichis.
14T'urumanta hatun manka hinan
hukpaqkama ñut'ullataña p'akikunkichis,
manañan imapaqpas allinñachu kankichis,
q'onchamanta sansa wisinapaqpas,
manallataq unu wisinapaqpas, nispa.
15Israelpa Ch'uya Diosnin Qollana Señormi nirqan:
Kutirikamuwaspaykichismi llakhilla kaspaykichismi
qespisqa kankichis,
thak-kayniyoq kaspaykichismi mak'allikuwaspaykichismi
kallpachasqa kankichis.
Qankunataq ichaqa mana munarqankichischu,
16aswanmi nirqankichis:
Manan, caballopin ayqekusaqku, nispaykichis.
Chay hinaqa, ayqekullaychisyá.
Nillarqankichistaqmi:
Allin phawaq caballopin ayqekusaqku, nispaykichis.
Chay hinaqa phawallaychisyá,
ichaqa qatiykachaqniykichisqa aswan phawaqmi kanqa.
17Huk runa mancharichillaqtinraqmi
waranqa runa ayqerikapunqa,
phisqa runa mancharichillaqtinraqmi
qankunaqa llapaykichis ayqerikapunkichis,
moqo patapi saywa hina ch'ullalla qhepanaykichiskama,
orqo patapi bandera hina sapallaykichis kanaykichiskama, nispa.
Qhepaman llaqtaq khuyapayasqa kananmanta
18Señor Diosmi ichaqa suyashasunkichis sumaqta qhawarinanpaq,
payqa chanintapuni ruwaq Dios kaspan
sinchitapuni munashan qankuna khuyapayaykuyta.
¡Kusisamiyoqmi paypi suyakuqkunaqa!
19Sión orqopi tiyaq Jerusalén runakuna, cheqaqtapunin manaña waqankichischu. Yanapanapaq waqyakuqtiykiqa sumaqtan Señor Diosqa qhawarimusunkipacha, waqyakuqtiyki hinan kutichimusunkipacha. 20Señor Diosqa hinaña llakikuywan phutikuypiwan ñit'iykusunki chaypas, yachachiqniykiqa manan pakasqachu kanqa, aswanmi ñawiykiwanpuni rikunki. 21Purisqaykipi pañamanña lloq'emanña pantanki chaypas, ninriykiwanpunin qhepaykimanta uyarinki: Kayninmi ñanqa, kayninta puriy, nimuqta. 22Hinan qolqewan k'uyusqa idoloykikunatapas, qoriwan k'uyusqa rikch'ayniykikunatapas huk qhellita hina cheqnikapunki. Qhelli thantata hinan wikch'upunki: Lloqsiychis kaymanta, nispa.
23Señor Diosmi parata parachimunqa chakra llank'asqaykiq rurunanpaq, hinan trigoykipas allinta poqospa askhata rurunqa. Chay p'unchaykunan askha pastokuna kanqa uywaykita michinaykipaq. 24Kallanqataqmi askhallaña q'achu qachasqapas llank'aq toroykikunapaq carga asnoykikunapaqwan, kanchanman k'aspi palawan horqetawan qaranaykipaq. 25Hatun wañuray p'unchay chayamuqtinmi, allin perqasqa llaqtakuna thunikuqtinmi, hinantin orqo patakunapi hinantin moqokunapi mana ch'akiq pukyukuna kanqa. 26Señor Diosqa llaqtanpa k'irinta wataykuqtinmi, paypa k'irisqankunata hampiykuqtinmi, killaq k'anchayninqa intiq k'anchaynin hinaraq k'anchanqa, intiq k'anchaynintaq qanchis inti hinaraq k'anchanqa, qanchis p'unchaypa k'anchaynin huñurqosqa hinaraq k'anchanqa.
Asiria suyuta Diospa muchuchinanmanta
27Qhawariychis haqaytan kikin Señor Diospuni hamushan,
sinchi phiñasqa yana phuyu sonqopin chayamushan,
siminpas k'arak phiñakuywan hunt'an kashan,
qallunpas ruphakuq nina hinan kashan,
28samayninpas patantin phoqchishaq mayu hinan kashan,
kunkakamaraqmi aypashan
payqa thuninanpaqmi suyukunata suysun,
pantachinanpaqmi llaqtakunaq siminman fierro frenowan churan.
29Qankunataqmi kusikuymanta takinkichis
Diospa unanchasqan fiesta tutapi hina,
sonqoykichispas kawsarinqaraq
imaynan qenata tocaspa Señor Diospa orqonman wichanku hinaraq,
imaynan Israelpa qaqa hina pakakunan Dios yupaychaq rinku hinaraq.
30Señor Diosqa hinallan atiyniyoq kunkanta uyarichinqa,
yapa-yapan rikuchinqa atiyninta k'arak phiñakuywan,
ruphakuq nina rawraywan,
illapawan, lloqlla parawan, chikchipiwan.
31Señor Diospa kunkanta uyarispanmi,
waqtasqantapas chaskispanmi
Asiria suyu runakunaqa llaksakuymanta q'aqchakunqa.
32Señor Diosqa Asiria suyu runakunawan maqanakushaspan,
tinya tocasqawan arpa tocasqawan tupaqta
paykunata muchuchispa waqtanqa.
33Unay watakunamantañan Asiria suyu reypa ñak'arinanpaq
wakichisqa kasharqan huk t'oqo anchollaña ukhullañataq,
chaypin kashan ichhu, llant'a, k'aspipiwan,
chaytan Señor Diospa samayninqa
azufre rawraqta hinaraq rawrachinqa.
Currently Selected:
ISAÍAS 30: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
