ISAÍAS 29
29
1¡Ay qanmanta, Ariel nisqa llaqta!
¡Ay qanmanta, Davidpa tiyanan llaqta!
Hinalla pasachun iskay kinsa wata
imaymana fiestaykikunapiwan,
2chaywanpas ñoqan Ariel llaqta hawan-ukhun sonqoyoqta ruwasqayki,
hinan waqanki llakikunki,
qanqa sacrificio ruphachina altar hinan kanki.
3Kikiypunin muyuykusqayki,
muyuriqniykimanmi perqata churasqayki,
phawaykunaypaqmi qenchata hinaraq churasqayki.
4K'umuchisqan pampa-mukintin rimamunki,
rimasqaykipas uyarikunqa mukisqa ukhumantan,
kunkaykipas uyarikunqa hallp'a ukhumanta kukuchiq kunkan hinan,
rimasqaykipas uyarikunqa ñut'u hallp'a sonqomanta chhuchusqa hinan.
5-6Ichaqa qonqayllan huk ratomanta huk rato
ñoqa Tukuy-atiyniyoq Señor Diosqa awqaykikunata muchuchisaq
q'aqyaqekunawan, pacha chhaphchiywan, raqhaqaqaywan ima,
parantin wayrantinwan, chikchi pukllaywan, nina wach'iypiwan.
Askhallaña awqaykiqa
ñut'u hallp'aman tukuchisqan kanqa,
mana yupay atiy yana alma awqaykiqa
q'opa hina phukusqan kanqa.
7Llapan qanwan maqanakuq askhallaña llaqtakunaqa,
llapan qanwan awqa-tinkuqkunaqa,
allin perqaykikunata phawaykuq awqaykiqa,
qanta llakichiqniykikunaqa
yanqa mana kaqmanmi mosqoyman hina tukupunqa.
8Imaynan yarqay hap'iqtin mosqopakun mikhunawan,
mosqoyninpitaq mikhushan,
rikch'arintaq ch'usaq wiksallantin yarqasqalla,
imaynan ch'akisqapas mosqopakun unuwan,
mosqoyninpitaq ukyashan,
rikch'arintaq kaq ch'akisqalla ch'aki kunkallantin,
chay hinan kanqa
Sión orqo contra maqanakuq mana yupay atiy llaqtakunaqa.
9¡Hinalla qankunaqa mana yuyayniyoq kaychis!
¡Hinalla qankunaqa ñawsa kaychis!
¡Hinalla qankunaqa thampiykachaychis ichaqa mana tragollawan!
¡Hinalla qankunaqa machaychis ichaqa mana vinollawan!
10Señor Diosmi qankuna pataman misk'i puñuyta kachamurqan,
profetakunapas llaqtaq ñawin hina qhawananpaq,
paytaqa Señor Diosmi ñawinta qataykun mana rikunanpaq,
paykunapas llaqtaq uman hina imaymanata entiendenanpaq,
paytaqa Señor Diosmi umanta khipurqan mana entiendenanpaq.
11Qankunapaqmi llapan kay rikhuriykuna kashan
allin wisq'asqa qelqa k'uyupi simikuna hina.
Pillapas huk leeqman haywarinqa:
Leeykuy kayta, nispa chayqa,
paymi kutichinqa:
Wisq'asqamá kashan, manan leeymanchu, nispa.
12Haywarillanmantaq mana leey yachaqman:
Kayta leey, nispa chayqa,
paypas kutichillanmantaq:
Manan yachanichu leeytaqa, nispa.
13Señor Diosmi nin:
Kay llaqtaqa rimayllankuwanmi qayllaykamuwan,
simillankuwanmi yupaychawan,
sonqonkutaq ñoqamanta karupi kashan.
Yupaychamuwasqanku yupaychayqa
runakunaq yuyaykusqan ruwayllan, yuyayninkumanta horqosqallankun,
yuyayninkupin hap'iqarqanku kikintakamalla ruwanankupaq.
14Chayraykun musphana ruwaykunawan
huk kutimantawan kay llaqtata musphashaqta saqesaq.
Yachayniyoqninkuq yachayninpas
yachaysapakunaq yuyayninpas chinkapunqan, nispa.
15¡Ay, yuyaykusqankunata Señor Diosmanta pakaykuqkuna!
Paykunan pakallapi mana chaninta ruwanku,
ninkutaq: Manan pipas rikuwasunchischu,
manan pipas reparawasunchischu, nispa.
16¡Ima millaymi kanku!
¿Manka ruwaqwan t'uruwanqa kaqkamachu?
¿T'urumanta ruwasqari ruwaqninta ninmanchu:
Manan qanchu ruwawarqanki, nispa?
¿Mankari llut'aqninta ninmanchu:
Manan yachankichu ima ruwaytapas, nispa?
Israelpa qespikuyninmanta
17As pisi p'unchaymantan Líbano sach'a-sach'a orqoqa
imaymanaq winañan chakraman tukupunqa,
kunan imaymanaq wiñanan chakrapas chaywanqa manan tupanqachu.
18Chay p'unchaypin roqt'uqa uyarinqa
piña qelqata leeykapuqtinpas.
Tutayaqpi kashaspa laqhayaqpi kashaspa
ñawsapas qhawarinqan.
19Llamp'u sonqokunapas wakmantan Señor Dioswan kusikunqa,
wakchakunapas wakmantan Israelpa Ch'uya Diosninwan q'ochukunqa.
20Yana almakunaqa tukukapunqan,
asipayakuqkunapas ch'usaqyapunqan,
mana allinlla ruway munaqkunapas wañuchisqan kanqa.
21Mana huchayoqta tumpaykuqpas,
juezman misk'ana churaqpas,
q'otuspakama mana huchayoqta mana uyariy munaqpas,
llapallanpunin wañuchisqa kanqa.
22Chayraykun Abrahamta qespichiq Señor Diosqa Jacobpa mirayninta nin:
Kunanmanta hinaneqmanqa Jacobqa manan p'enqasqañachu kanqa,
uyanpas manan p'enqakuymanta pukayanqachu.
23Ruwasqaykunata rikuspan,
paykunaman wawakunatapas qosqayta rikuspan
ch'uya sutiyta yupaychanqaku.
Hinaspan Jacobpa Ch'uya Diosnin kasqayta reqsiwanqaku,
ñoqa Israelpa Diosninta manchakuwanqaku.
24Pantachisqa kaqkunaqa yuyayniyoq-kaytan yachapunqaku,
chhuchupakuqkunaqa yachachikuykunatan chaskipunqaku, nispa.
Currently Selected:
ISAÍAS 29: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
