ISAÍAS 31
31
Egipto suyuman hap'ipakuqkuna contra willakuy
1¡Ay, yanapayta maskhaspa Egipto suyuman riqkunamanta!
Atipanankupaqmi Egiptomanta apamusqa caballokunaman hap'ipakunku,
askha carretakunaman caballoyoq soldadokunamanwan hap'ipakunku,
manataq Israelpa Ch'uya Diosninpiqa suyakunkuchu,
manallataq yanapaynintapas mañakunkuchu.
2Señor Diospas ichaqa yachaysapan,
hatun llakita chayachimuqmi,
rimarisqanta mana p'akiqmi.
Millay runa contran sayarinqa,
millay runaq yanapaqninkunatapas muchuchinqa.
3Egipto suyu runakunaqa wañuqllan, manan dioskunachu,
caballonkunapas aychakunallan, manan wiñay kawsaqchu.
Señor Dios paykunata muchuchiqtinmi
yanapaqnin misk'akunqa, yanapasqa kaqpas urmapunqa,
hinan llapallanku huk nisqalla wañunqaku.
4Señor Diosmi niwarqan:
Imaynan huk leonqa ovejata wañurqachispa qaqa sayaykun,
llapa michiqkunaña qaparkachaspa mancharichiyta munaqtinkupas qaqa sayaykun,
chay hinatan ñoqa Tukuy-atiyniyoq Señor Diosqa hamusaq
Sión orqopi kaq llaqtata amachanaypaq.
5Imaynan pichitankapas q'esanpi chiwchinta
patanpi phalaykachaspa makilla waqaychan,
chay hinatan ñoqa Tukuy-atiyniyoq Señor Diospas Jerusalenta waqaychasaq,
qhawasaq, qespichisaq,
hark'akusaq, horqosaqtaq, nispa.
6Señor Diosmi nin:
Israel runakuna, qankunaqa pasaqtapunin saqerpariwarqankichis,
kunantaq ichaqa kutirikampuwaychis.
7Qespichinay p'unchay chayamuqtinmi,
huchallikuspa qorimanta qolqemanta ruwasqaykichis idolokunata wikch'upunkichis,
8Asiria suyu runakunaqa awqa-tinkuypin wañunqa,
manan ichaqa runaq munayninman hinachu,
ñoqa kikiymi paykunataqa chinkachisaq.
Awqa-tinkuypi tupashaspan ayqerikapunqaku,
waynankunapas awqanpa mit'aninmi kapunqa.
9Manchakusqan hawan reyninpas phawaylla ayqerikapunqa,
llaksakuspanmi capitanninkupas banderata wikch'upunqa, nispa.
Señor Diosmi chayta unanchan,
awqankunata muchuchinanpaqmi
paypa ninanqa Jerusalenpi rawrashan.
Currently Selected:
ISAÍAS 31: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
