ISAÍAS 25
25
Dios hatunchana taki
1Señor Diosníy, qanpunin Diosniyqa kanki,
chaymi hatunchasqayki yupaychasqayki,
qanmi musphanakunata ruwarqanki,
cheqaq hunt'aq kaspaykin
ñawpaqmanta yuyaykusqaykita ruwarqanki.
2Llaqtatan rumi soqyaman tukuchirqanki,
allin perqasqa llaqtatan raqay-raqayman tukuchirqanki,
awqakunaq qhapaq wasintan thunirqanki,
manañataqmi hayk'aqpas sayarichisqañachu kanqa.
3Chayraykun atiyniyoq llaqta yupaychasunki,
mana khuyapayakuq runayoq llaqtapas manchakusunki.
4Qanmi wakchakunaq pakaykuqnin karqanki,
hatun llakipi rikukuqpa hark'akuqnin karqanki,
chikchimanta pakaykuqnin karqanki,
ruphaymanta llanthuykuqnin karqanki.
Mana khuyapayakuqpa yuyaykusqanqa
poqoy tiempopi chikchi chayaq hinan,
5huk niypitaq ch'akiy tiempopi inti qanqey hina.
Qanmi awqakunaq qaparkachayninta ch'inyachinki
inti qanqeyta phuyu llanthuwan chiriyachiq hinaraq,
chay hinatan mana khuyapayakuq runata upallachinki.
6Sión orqo patapin Tukuy-atiyniyoq Señor Diosqa
llapan suyukunapaq wakichinqa
sumaq añaka mikhunakunata, sumaq poqosqa vinokunata,
sumaq misk'i mikhuykunata, sumaq allinnin ukyanakunatawan.
7Chay orqo patapin Señor Diosqa llik'inqa
llapan llaqtakunaq llakikuymanta uya qatakunanta,
llapan suyukunaq lutokunan qatakunata.
8Señor Diosqa wiñaypaqmi wañuytapas chinkachinqa,
llapaq ñawinmantan waqaytapas ch'akichinqa,
llapan pachantinmi imaymana llakikunawan llaqtanpa p'enqakuyninta chinkachipunqa.
Señor Diospunin chayta nin.
9Chay p'unchaypin ninqaku:
Kaymá Diosninchisqa,
paypin suyakurqanchis, paytaqmi qespichiwarqanchis,
chay hinaqa kusikusunchis q'ochukusunchis,
paypunin qespichiwaqninchisqa, nispa.
10Sión orqotaqa Señor Diospunin amachanqa,
Moab suyutataq chaykama t'ustunqa
q'opa patapi ichhuta saruq hinaraq.
11Moab suyun makinta mast'arinqa
unupi wayt'aq runa hinaraq,
ichaqa kallpanña kusata haywapakunanpaq kashaqtinpas,
Señor Diosmi astawan qaqapachinqa.
12Señor Diospunin pukarakunata urmachinqa,
sinchi hatun perqakunatapas kumpanqa,
pasaq pampayachisqatapunin ruwanqa.
Currently Selected:
ISAÍAS 25: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
