ISAÍAS 24
24
Llapa pachantinpaq taripay
1¡Qhawariychis! Señor Diosmi kay pachata purunyachinqa,
pasaqtan ch'usaqyachinqa, rawiykachinqa,
llapan runakunatan lliwta ch'eqechinqa.
2Chay ñak'ariytaqa llapallapunin muchunqaku,
llaqta runapas sacerdotepas,
uywaqepas uywasqapas,
uywaq mamapas warmi uywasqapas,
rantiqpas vendeqpas,
mañaqpas chaskiqpas,
manuqpas manukuqpas.
3Hallp'a pachaqa pasaq ch'usaqyachisqan kanqa,
sinchi llat'anaykusqan kanqa.
Señor Diosmi nirqan chay hinatapuni.
4Hallp'an ch'akiykapun naq'eykapuntaq,
teqsimuyuntin hallp'an ch'akisqa naq'eykapushan,
hanaq pachan kay pachapiwan ch'akiykapushan.
5Kaypachan runakunaq qhellichasqan kapushan,
paykunan Diospa kamachikuy siminkunata wikch'upurqanku,
paykunan unanchasqan simikunata mana kasurqankuchu,
wiñay rimanakusqa simitan p'akirqanku.
6Chayraykun kay pachata Diospa ñakaynin p'uchukashan,
runakunapas huchankumanta ñak'arishan,
chaypi tiyaqkunapas pisiyachisqa kapushan,
pisi runallañataq qheparparipunku.
7Vinopas pisiyaykapunmi, uvas sach'atapas onqoymi hap'irqapun,
kusisqalla kawsaqpas llakisqallañan kapun.
8Tinyawan arpawan kusikunankupas tukukapunmi,
reqsinakuq-masintin kusikuymanta qaparkachanankupas ch'inyapunmi.
9Takikuspa vino ukyaypas manan kanñachu,
ukyanakunan hayaman tukupun ukyaqkunapaq.
10Purunyachisqa llaqtaqa raqay-raqaymi kapushan,
llapan wasin mana haykuykunayoq kapushan.
11Mana vino kaqtinmi callekunapi runakuna waqarashan,
llapa rikch'aq kusikuymi chinkapun,
kay pachapi kusikuykunaqa ch'inyachisqan kapun.
12Llaqtaqa raqay-raqaymi kapushan,
punkukunapas chhallurqarisqan kapushan.
13Chay hinakamachá llapan kay pacha llaqtakunapas kanqa,
olivos sach'a p'anaspa chhaphchisqa hinachá kanqa,
uvas pallay qhepata qhellapasqa hinachá kanqa.
14Llapan qhapaqkunaqa kusikuymantan qaparinqaku,
inti haykuy suyumantapachan:
¡May hatunmi Señor Diosqa! nimunqaku.
15Chayrayku, qankunapas inti lloqsiy lado suyu runakuna,
Señor Diosta hatunchaychis,
qankuna mama qochaq islanpi tiyaqkunapas
Israelpa Señor Diosninta yupaychaychis.
16Kay pachaq huk cantonmantapachan uyarimuyku:
¡Hatunchasqa kachun Chanin Diosqa! nispa takiqta.
Ñoqataq ichaqa nirqani:
¡Ay! ¡Imaraqmi ñoqamanta!
¡Ikiraqmi ñoqamanta!
¡Q'otukuq runakunan millay mana chaninta yuyanku!
17Kay pachapi tiyaqkunaqa,
salqa animalkuna hina wañuchiqpa qatiykachasqanmi kankichis,
t'oqoman urmaykuq hinan kankichis,
pasaq llaksasqan kankichis.
18Chaykunamanta ayqekuqqa t'oqomanmi urmaykunqa,
t'oqomanta lloqsimuqtaq toqllaq hap'isqan kanqa.
Ati-musphay paran chayamunqa,
kay pachaq teqsinmi chhaphchikunqa.
19Kay hallp'an manchanata t'oqyanqa,
hinan k'aktu-k'aktu ruwakunqa,
manchaytan kuyuykachanqa.
20Machasqa runa hinaraqmi thampiykachanqa,
ch'uklla wasi hinaraqmi kuyuykachanqa,
huchankunaq sinchi llasaykusqanwanmi
thunikuspa manaña sayarinqañachu.
21Chaypachan Señor Diosqa ñak'arichinqa
hanaq pachapi angelkunata,
kay pachapi reykunatapas.
22Huñurqospan wisq'arqonqa watay wasiman
chaypin wisq'arayanqaku,
unay p'unchaymantataq muchuchinqa.
23Tukuy-atiyniyoq Señor Dios
Sión orqopi Jerusalenpipas kamachikuqtinmi,
llaqtanpa kurak runan lliphlli-kayninta rikuqtinmi,
killapas pukamanraq tukunqa,
intipas yanamanraq tukunqa.
Currently Selected:
ISAÍAS 24: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
