ISAÍAS 26
26
Qespikuymanta taki
1Chay p'unchaypin Judá suyupi kay takita takinqaku:
Allin perqasqa llaqtanchisqa qespikunanchispaq kapuwanchis,
ancho perqakunataqa Señor Diospunin sayarichipuwanchis.
2Punkukunata kichariychis
chanin llaqtaq haykumunanpaq,
chanin hunt'aq runaq haykumunanpaq.
3Señor Diosníy, qanqa thakllapipunin waqaychanki
ñawpaqeykipi qaqa sayaq runataqa,
qanmanpuni hap'ipakusqanrayku.
4Suyakullaychispuni Señor Diospiqa,
paypunin Wiñay Qaqaqa.
5Paymi uma hoqariqkunata qaqapachin,
hatunchakuq llaqtatapas k'umuykachin,
pampayachinankaman kumpan.
6Chaytataq alqochasqakuna wakchakunapiwan
chakinkuwan saruykunku, nispa.
7Chaninkunaq ñanninqa cheqanpunin,
qanpunin, Señor Diosníy, paykunapaq “siwk” nisqa ñanta allichanki.
8Señor Diosníy, kamachikuyniykita ruwaspan suyashaykiku,
sonqoykuq munasqanqa qanmanta yuyaymi.
9Tukuy sonqoywanmi tutantin munayki,
tukuy almaywanmi tutamanta maskhayki,
Kay pachata juzgaqtiykin
runakuna yachanku imachus chanin-kay kasqanta.
10Hinaña millay runamanta khuyallikunki chaypas,
paykunaqa manapunin yachankuchu chanin-kayta,
millayllapunin kanku chanin runaq suyunpipas,
manataqmi kaqpaqpas yuyankuchu Señor Diospa hatun-kay-nintaqa.
11Señor Diosníy, muchuchinaykiqa wakichisqañan,
paykunataqmi mana reparaqpas tukunkuchu.
Llaqtaykimanta wañuy atiq kasqaykita rikuchunku
pasaq p'enqasqa kanankupaq,
awqaykipaq wakichisqayki nina paykunata ruphachun.
12Señor Diosníy, qanmi allin-kayta qowankiku,
ima ruwasqaykupas qan yanapallawaqtiykikun ruwasqa.
13Apu Señor Diosniyku,
wak wiraqochakunan ñoqaykuq kamachiqniyku karqan,
qanllatapunin ichaqa Señorniyku reqsikuykiku.
14Paykunaqa wañusqan kashanku, manañataqmi hatarimunqakuchu,
paykunaqa llanthullan kanku, manataqmi sayarimunqakuñachu.
Paykunataqa ñak'arichipurqankiñan thunipurqankiñan,
llapan paymanta yuyarinakunatapas p'uchukapurqankiñan.
15Señor Diosníy, cheqaqtapunin suyukunata hatunyachirqanki,
suyuq llapan qorpankunatan hatunyachirqanki,
chay hawan hatunchasqa karqanki.
16Señor Diosníy, llakikuypin maskharqaykiku,
qan muchuchishawaqtiykikun llakisqa mañakamurqaykiku.
17Señor Diosníy, qayllaykipin kasharqayku
imaynan wiksallisqa warmiqa wachakunan p'unchay chayamuqtin
q'ewiykachakuspa nanaywan qaparin chay hina.
18Wiksallikurqaykun, wachakuy nanaywanmi qaparkacharqayku,
wachakurqaykutaq wayrallata,
manan suyuyku qespichiyta atirqaykuchu,
manan hallp'api tiyaqtachu paqarichirqayku.
19Wañuqniykikunan kawsarinqaku,
ayaykikunan sayarinqaku.
¡Hallp'api puñuqkuna, wakmanta rikch'ariychis,
hinaspa kusikuymanta qaparkachaychis!
Señor Diosníy, sulla hina k'anchayniykitan kachamunki,
chaymi wañusqakuna hallp'amanta paqarimunqaku.
20Phaway, llaqtalláy, wasiykiman haykuy,
ukhumantataq allintapuni wisq'akamunki,
pakarikamuy huk tiempota Señor Diospa phiñakuynin thaninankama.
21Qhawariychis, qhapaq tiyananmantan Señor Diosqa lloqsimushan
huchankumanta kay pachapi tiyaqkunata muchuchinanpaq.
Hallp'a pachaqa manan pakanqachu wañuchisqakunata,
pakallapi runa wañuchisqakunatan llapanta rikhurichimunqa.
Currently Selected:
ISAÍAS 26: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
