ISAÍAS 17
17
Damasco llaqta contra willakuy
1Damasco llaqta contra willakuy.
Tukuy atiyniyoq Señor Diosmi nin:
Damascoqa manañan llaqtachu kanqa,
k'urpa monton hinan kapunqa.
2Siria suyu llaqtakunaqa wiñaypaq purunyachisqan kapunqa,
uywa michinamanmi tukupunqa,
mana piqpa mancharichisqanmi uywakunaqa mikhunqa.
3Israel suyuq pukara llaqtankunaqa thunisqan kanqa,
Damasco llaqtaq atiyninqa p'uchukapunqan,
Siria suyupi qhapaq runakunaqa
Israel runakuna hinallataqmi p'enqaypi rikukunqaku, nispa.
Israelpa muchuchisqa kanan
4Israelpa Diosnin Señormi nin:
Chay p'unchaymi Israelpa mentasqa-kayninqa pisiyarqapunqa,
qhapaq-kayninpas tukurqakapunqa.
5Imaynan ichhuqqa trigota ichhun,
makinwan trigota hap'ispataq
ch'usaqta chakrata saqen,
chay hina saqesqan Israelqa kanqa,
6mana chaytaq Refaim wayq'opi qhellapasqa chakra hina kanqa.
Mana chaytaq olivo sach'a chhaphchisqa hina kanqa,
aswan alto k'allmapin iskay kinsa rurukunallaña qhepanqa,
rurusapa k'allmapitaq tawa phisqa rurukunallaña qhepanqa,
chay hinallañan Israel runakunaqa qhepanqa, nispa.
7Chay p'unchaymi runaqa yanapayta maskhaspa Kamaqenman kutirinqa,
Israelpa Ch'uya Diosninman asuykunqa.
8Runakunaq ruwasqan altarkunamanpas manan rinqakuñachu,
Asera nisqa diosaq rikch'aynintapas manan yupaychanqakuñachu,
altar ruwasqankupipas manan inciensota q'osñichinqakuñachu.
9Chay p'unchaymi perqawan allin hark'achisqa llaqtankuna wikch'usqa kanqa,
imaynan Hiv runakunaq Amor runakunaq llaqtankupas
Israelta manchakuspa wikch'usqa karqan chay hina,
lliwmi purun-purun kanqa.
10Israel llaqta, Qespichiqniyki Diostan qonqapurqanki,
manan yuyarirqankichu payqa pakakunayki Qaqa kasqanta.
Wak'a dioskunata yupaychanaykipaqmi sumaq huertakunata llank'anki,
wak llaqta diospa sutinpin ruruykikunata tarpunki.
11Hinaña tarpusqayki p'unchay allinta llank'anki,
hinaspa chay muhuta phutuchichinki chaypas,
mana hampiy atina millay onqoy hamuqtinmi
lliw chakrayki chiriyapunqa.
12¡Achachaw! ¡Askha llaqtakunan kunununumun!
¡Mama qocha phoqchiqeq hinan qaparimun!
¡Achachaw! ¡Suyukunan qaparin
sinchi askha unuq t'oqyasqanta hina!
13Chaywanpas Dios anyaqtinmi, usqhaylla karuman ayqenku,
imaynan orqokunapi ichhuta wayra apan ahinata,
tutuka wayra ñut'u hallp'ata apan ahinata.
14Paykunaqa ch'isinmi manchanata q'aqchanku,
manaraq illarimuytataq ichaqa ch'usaqyarqapunku.
Llat'anaqninchiskunaqa chay hinallapunin kashanku,
suwaqninchiskunaqa chay hinapin rikukunku.
Currently Selected:
ISAÍAS 17: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
