ISAÍAS 16
16
1Ch'inneqpi kashaq Sela llaqtamanta Moab runakunaqa Jerusalenpi kamachikuqman sumaq sonqota hina borregokunata apachinku. 2Chaykamataq Moab warmikunaqa q'esanmanta mancharichisqa ayqeq pichitanka hina Arnón mayu pasanapi mana maymanpas puririyta atinkuchu.
3Judá runakunatan ninku: Ama hinachu kay, yuyaychawayku, hark'aykuwanaykikupaq yuyaykuychis. Kuskan p'unchaypi qaqa llanthu hina llanthuykichiswan samarichiwayku. Ayqekuqkunatapas pakaykuychis, paykunataqa amapuni hukman hap'iykachiychischu. 4Hinalla pakakuchunku ayqekuq Moab runakuna, muchuchiqmanta paykunata pakaykuychis, nispanku.
Ñaq'arichiqqa tukukapunqan,
payqa manañan thuninqañachu,
sarunchakuqqa suyumantan chinkaripunqa,
5hinamantan Davidpa mirayninmanta huk kamachikuq paqarinqa,
paymi khuyapayaspa hunt'aq kaspa kamachishallanqa.
Juzgaspanqa chaninchaytapunin ruwanqa,
usqhayllataqmi cheqaq-kaytapas ruwanqa.
6Judá runakunan ninku: Moabpa sinchi anchaykachaynintaqa yachanchismi, paykunaqa kanku pay-payman tukuq, uma hoqariq, hatunchakuq ima alabakusqankupas yanqa thawtiyllan. 7Chayrayku llapan Moab runakunaqa suyunkumanta waqachunku, Kir-hareset llaqtapi sumaq mikhuna mikhusqankuta yuyarispa khuyayta waqachunku, nispa.
8Hesbonpi chakrakunan ch'akipun,
Sibnapi uvas chakrakunan naq'epun.
K'allmankunaqa Jazerkaman chayarqan,
ch'inneqmanmi mast'arikurqan,
mama qochakamataq ayparqanpas,
ichaqa suyukunaq kamachikuqninkunan aswan sumaq chakratapas lliwta chaqorqan.
9Chaymi Jazer runakunawan kuska Sibnapi uvas chakrakunamanta waqani,
Hesbonmantawan Elealemantawanmi unuy parata waqani,
cosechamantapas poqosqa ruru hoqariymantapas manañan kusikapunkuñachu,
aswanpas awqankuq chaqosqan hawan ch'inyapunku.
10Chakrakunapi kusikuypas q'ochukuypas tukukapunmi,
uvas chakrakunapipas manan pipas kusikuymanta qaparinchu,
manan pipas takinchu,
manan uvastapas vinota ruwanankupaq sarunkuchu,
Señor Diosmi chay qapariyninkuta p'uchukachipun.
11Chaymi Moabmanta Kir-haresetmantawan llakiy-llaki tocaq arpa hinaraq sonqoy waqashan.
12Moab runakunaqa orqopi yupaychana cheqasta rispapas sayk'uyllatan tarinku,
yupaychana wasita mañakuq haykunku chaypas, yanqapaqmi.
13Unayñan Señor Diosqa Moab contra chhaynata rimasqa, 14kunantaqmi payqa nin: Moabpa hatun-kayninqa kinsa wata hunt'apin p'uchukapunqa, sinchi askha runayoqña kashan chaypas, iskay kinsa pisi kallpa runakunallan qhepanqaku, nispa.
Currently Selected:
ISAÍAS 16: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
