ISAÍAS 18

Etiopía suyumanta willakuy

1Kanmi huk suyu Etiopía mayuq haqayneqninpi,

chaypiqa kurukunaq “wan” nisqanmi uyarikun.

2Nilo mayuntan kachapurikunata kachan,

paykunaqa t'otora balsapin ununta rinku.

Phawaylla phawaq kachapurikuna, riychis

hatunkaray llusk'a uyayoq runakunaq llaqtanta,

tukuy hinantinpi manchana suyuta,

mayukunaq qarpasqan hallp'api tiyaq kallpasapa atiyniyoq llaqtata.

3Qankuna kay pachapi llapan tiyaqkuna,

orqopi huk señal sayariqtinqa, ¡qhawariychis!

Trompeta waqaqtinpas, ¡uyariychis!

4Señor Diosmi niwan:

Hanaq pachamantan qasilla qhawamushasaq,

para thaniy qhepata qanqeq inti hina,

cosecha tiempopi hallp'a q'oñiriy sulla waksi hina.

5Uvas chakrakuna t'ikayta tukuqtinmi,

rurunpas chayraq poqoshaqtinmi,

cosecha tiempopas manaraq chayamushaqtinmi,

k'allmankunata cuchillowan kuchupanqaku,

wit'usqankutataq wikch'upunqaku.

6Chay hinan lliw awqakunaqa wikch'usqa qhepanqa

orqokunapi tiyaq aycha mikhuq phalaq animalkunapaq, salqa animalkunapaqwan,

q'oñi tiempopin phalaq animalkuna chayta mikhunqaku,

chiri tiempopitaq llapan salqa animalkuna chayta mikhunqaku, nispa.

7Chaypachan Tukuy-atiyniyoq Señor Diosman sumaq sonqokunata apamunqaku chay hatunkaray llusk'a uyayoq runakuna, tukuy hinantinpi manchana suyu runakuna, mayukunaq qarpasqan hallp'api tiyaq kallpasapa atiyniyoq runakuna, Sión orqopi kaq Tukuy-atiyniyoq Señor Dios yupaychana wasimanmi sumaq sonqokunata apamunqaku.

Currently Selected:

ISAÍAS 18: QC88

Highlight

Copy

Compare