GÉNESIS 50
50
Jacobta wañukapuqtin p'ampasqanku
1Hinaqtinmi Joseqa taytanta oqllaykuspa waqarqan, much'aykurqan. 2Chaymantataq Joseqa kamachirqan hampiq kamachinkunata taytanta hampikunawan ch'arkinankupaq, chaymi hampiqkunaqa Israelta ch'arkirqanku. 3Tawa chunkantin p'unchaymi payta ch'arkirqanku, ahinan hunt'akuq ch'arkisqakunapaq.
Egipto runakunataq qanchis chunka p'unchayta Jacobmanta lutokurqanku. 4Llakikusqan p'unchay qhepatataq Joseqa rimapayarqan Faraonpa wasinpi kaqkunata:
—Sumaqta qhawariwankichis chayqa, valekuykichis Faraonta rimapayapuwaychis: 5Taytaymi jurachiwarqan: Wañukapusaqmi, Canaán suyupi aya p'ampanata ñoqapaq hap'ikurqani, chaypin p'ampawanki, nispan. Valekuyki kunan rispay taytayta p'ampamunaypaq, hinaspataq kutimpusaq, nispa.
6Hinan Faraonqa nirqan:
—Riy, taytaykita p'ampamuy, pay jurachisqasuykiman hina, nispa.
7Josemi rirqan taytanta p'ampamuq, paywan rillarqankutaq Faraonpa llapa oficialninkuna, wasinpi kaq kurak runakuna, Egipto suyupi llapa kurak runakunapiwan, 8Josepa ayllunpiwan, wawqenkunapiwan, taytanpa ayllunpiwan. Gosén hallp'apiqa saqeykurqanku wawakunallatan, ovejankutawan wakankutawan. 9Rillarqantaqmi paywanqa carretakunapas caballopi sillaykusqakunapas, chay hinapin askhallaña runa karqan. 10Hinaspanmi chayarqanku Atad erakama, chaymi kashan Jordán chimpapi, chaypin waqarqanku khuyay sonqo nanayta yupakuspa, Josetaq taytanmanta lutokurqan qanchis p'unchayta.
11Chayneqpi tiyaq Canaán runakunataq Atad erapi waqaqta rikuspa, nirqanku:
—Kayqa Egipto runakunaq sonqo nanayta waqayninmi, nispa. Chaymi chayta suticharqanku Abel-mizraimta#Kay sutin Hebreo rimaypi rikch'akun “Egipto runakunaq waqaynin” niq simiman., chaymi kashan Jordán chimpapi.
12Jacobpa wawankunan paypaq ruwarqanku taytankuq kamachisqanman hina. 13Canaán suyumanmi aparqanku hinaspan Makpela chakra qaqa wasipi p'ampamurqanku, chaytan chay chakratawan kuska Abraham rantisqa Het runa Efronmanta, aya p'ampanapaq, Mamreq inti lloqsimuyninpin kashan. 14Hinaspataqmi p'ampasqanku qhepata Joseqa Egiptoman kutipurqan, paypas, wawqenkunapas, taytanta p'ampamuq paywan llapa riqkunapas.
Josepa wañukapusqan
15Taytanku wañukapusqan qhepatataq Josepa wawqenkunaqa ninakurqanku:
—Joseqa cheqniwasunpaschá, lliw mana chaninta payta ruwasqanchismanta aynitapaschá kutichiwasun, nispa. 16Hinaspanmi Joseman kacharqanku: Taytanchismi manaraq wañukapushaspa kamachikurqan: 17Kay hinata Joseta ninkichis: Valekuyki, wawqeykikunaq mana chanin ruwasqan huchanta pampachanaykipaq, mana allintan rikurqasunkiku riki, nispa. Chayrayku kunan valekuykiku taytanchispa Diosninpa kamachinkunaq mana chanin ruwasqaykuta pampachawanaykikupaq, nispa, nichimunankupaq.
Josetaq waqarqan willaqkuna rimashaqtinku.
18Hamullarqankutaq wawqenkunapas, hinaspa ñawpaqenpi pampakama k'umuykukurqanku, nirqankutaq:
—Kaypin kashayku kamachiyki kanaykupaq, nispa.
19Josetaq ichaqa paykunata nirqan:
—Ama manchapakuychischu, ñoqaqa manan Dioschu kani. 20Qankunaqa mana allinniypaqmi yuyaykurqankichis, Diostaq allinman tukuchirqan kunan rikusqanchista ruwanapaq, askha runata kawsachinapaq. 21Ahinaqa, ama manchapakuychischu, ñoqan uywasqaykichis qankunatapas wawaykichistapas, nispa.
Chay hinatan paykunata sonqocharqan, sumaqtataq rimapayarqanpas.
22Josemi Egiptopi tiyarqan, paypas, taytanpa ayllunpas. Joseqa kawsarqan pachak chunkayoq watatan, 23rikurqantaq Efrainpa wawankunata kinsakaq miraykama, Manasespa churin Makirpa wawankunapas Josepa moqon patapin uywasqa karqanku.
24Chay qhepatataq Joseqa wawqenkunata nirqan:
—Wañukapusaqmi, cheqaqtapunin Diosqa watukamusunkichis, hinaspan kaymanta pusapusunkichis Abrahamman, Isaacman, Jacobmanwan prometesqan hallp'aman, nispa. 25Hinaspan Joseqa Israelpa wawankunata jurachirqan:
Cheqaqtapunin Diosqa watukamusunkichis, chaypachan tulluykunataqa kaymanta apapunkichis, nispa.
26Josemi wañukapurqan pachak chunkayoq watayoq, hinan hampikunawan ch'arkirqanku, Egiptopitaq huk cajonpi churaykusqa karqan.
Currently Selected:
GÉNESIS 50: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
