GÉNESIS 49
49
Churinkunapaq Jacobpa profetizasqan
1Jacobmi churinkunata waqyaspa nirqan:
—Huñukuychis, qhepa p'unchaykunapi imaynachus kanaykichistan sut'inchasqaykichis:
2—Huñukuychis, hinaspa uyariychis, Jacobpa churinkuna,
uyariychis taytaykichis Israelta.
3Rubén, qanmi phiwiy kanki,
kallpay, churiyay qallarisqay,
allinnin manchana, allinnin atiyniyoq.
4Unu hina mana hark'achikuq,
manan qollanachu kapunki,
taytaykiq tiyaqmasin warmiwan puñukusqaykirayku,
chaypachan pisichawarqanki.
5Simeonwan Leviwanqa wawqentinmi kanku,
mana chanin arman armankuqa.
6Ama paykunawanqa rimanakusaqchu,
amataq paykunawanqa huñunakusaqchu.
Phiñakuspankun runata wañurqarichirqanku,
yanqa qasitaq torokunaq hank'unta kuchurarqanku.
7Ñakasqa kachun millayllaña k'arak phiñakuyninku.
ñakasqa kachun sinchillaña phiñakuyninku.
Ñoqan Jacobpa miraynin ukhupi paykunata rakirasaq,
Israel llaqtapitaq paykunata ch'eqeykachisaq.
8Judá, wawqeykikunan yupaychasunki,
makiykiqa awqaykikunaq much'unpin,
wawqeykikunan k'umuykamusunki.
9Uña león hinan Judaqa,
mikhusqaykimanta kutimuspaykin, churíy,
k'umuykurqanki, león hina thallaykurqanki,
china león hina.
¿Pitaq qanta rikch'arichisunkiman?
10Manan kamachikuy varaqa Judamanta chinkanqachu,
manallataq hap'isqan varaqa chinkanqachu, varayoq hamunankama,
paytataqmi runakuna kasunqaku.
11Uvas yuraman malta asnota wataspa,
sumaq uvas tulluman china asnonpa uñanta wataspa,
p'achanta vinopi t'aqsarqan,
uvas unupi p'achanta t'aqsarqan.
12Ñawinqa vinowan pukayachisqan,
kiruntaq lechewan yuraqyachisqa.
13Zabulonqa mama qocha patapin tiyanqa,
barcokunaq chayananmi kanqa,
qorpantaq Sidonkama kanqa.
14Isakarqa kallpasapa asnon,
uywa kancha ukhupi samakuq.
15Rikurqanmi samanaqa allin kasqanta,
hallp'apas sumaq kasqanta,
chaymi q'epiykachikullarqan,
hukpaqmi llank'arqan.
16Danqa llaqtantan kamachinqa
Israel huknin ayllu hina.
17Danmi kanqa ñan pata mach'aqway,
ñan pata katari,
caballoq chakinta k'utuq,
hinaspa sillaykusqata qhepaman urmachiq.
18¡Qespichiwanaykitan suyakuni, Señor Diosnilláy!
19Gadtaqa qechuqkunan llat'ananqa,
chaypas paymi paykunataqa qhepata llat'ananqa.
20Aserpa t'antanqa sumaqllañan kanqa,
paymi rey mikhunata hina haywanqa.
21Neftaliqa china taruka hina purikuqllan,
munay tarukachakunata wachaq.
22Joseqa llanllashaq sach'a hinan,
pukyu patapi rururashaq sach'a hinan,
k'allmankunan perqa pataman mast'arikun.
23Paytaqa wach'iqkunan cheqnikurqanku,
wach'irqanku, qatiykachashallarqanku,
24chaypas wach'inanqa qaqatan sayarqan,
makintapas Jacobpa kallpayoq Diosninmi kallpacharqan,
payqa Israelpa Michiqninmi, Waqaychaqninmi.
25Taytaykiq Diosninmi yanapasunki,
Tukuy-atiyniyoq Diosmi saminchasunki
hanaq pacha saminchakunawan,
mama qocha ukhu saminchakunawan,
askha wawakunawanpas.
26Taytaykiq saminchankunaqa
wiñay-wiñay orqokunamantapas aswanraqmi,
wiñay-wiñay orqokunaq qhapaq kaqninkunamantapas aswanraqmi,
chaykuna Josepaq kachun,
wawqenkunamanta t'aqasqapaq kachun.
27Benjaminqa qechukuq atoqmi,
tutamanta mikhunqa qechusqanta,
ch'isiyaykuytataq rakinqa qechusqankunata, nispa.
28Chaykunan chunka iskayniyoq Israel ayllu, chaytan taytankuqa sapankata saminchashaspa nirqan.
29Chaymantataq paykunata kamachirqan:
—Wañukapullasaqñan, machulaykunaqpin p'ampapuwankichis, Het runa Efronpa chakranpi kashaq qaqa wasipi, 30Makpela chakrapi kashaq qaqa wasipi. Chaymi Canaán hallp'a Mamreq inti lloqsimuyninpi kashan. Chaytan chay chakratawan kuska Abrahamqa aya p'ampananpaq Het runa Efronmanta rantisqa. 31Chaypin p'amparqanku Abrahamtapas warmin Saratapas, chaypin p'amparqayku Isaactapas warmin Rebecatapas, chaypin Leatapas ñoqa p'amparqani. 32Chakrapas chaypi kaq qaqa wasipas Hetpa churinkunamanta rantisqan, nispa.
33Churinkunata Jacob kamachiyta tukuqtintaq puñunanpi chakinqa k'unkuykurqan, hinaspan wañukapurqan, machulankunamantaq huñukapurqan.
Currently Selected:
GÉNESIS 49: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
