Danieli 7

Danieli akaniaaya hu biindu bi yabona muhuboneherwa

7:1—12:13

Ebisolo bine bi Danieli yabona muhuboneherwa

1Mu mwaaka kutaangira okw'obutuki bw'omutuki Bbelisasa, omutuki wa Bbabbilooni, ese Danieli nindoota esilooto mani ndaaboneherwa mu siro esyo, nindeyaliise mu sitaanda syaange. Mani ninyaandiika esilooto esyo, mani ninganiaaya ebiindu bi ndabona. 2Ndakaniaaya endi: “Muhuboneherwa hwaange esiro, mani bone, ndabona omuyaka nikudiirire enyaande chine echohu kulu nikuyiisa enyaanja hoongo.” 3#Hubwi 13:1; 17:8.Mani ebisolo bine bihoongo nibituumbuha nibitula mu nyaanja, buli situlayo nisitafwaanana neende esyaasye. 4#Hubwi 13:2.Esisolo syataangira syali nisifwaana koti edalang'i, nae syali neende embaya koti ech'eeswi. Nae nindatingaala, mani embaya chaasyo nichimanyulwaho. Mani nisiniiniswa ohutula hu loba mani nisyeema hu makulu kabiri koti omuundu; nisibereswa ebibaaso koti eby'omuundu. 5Nae bone, esisolo siindi, esyali nisifwaanana koti elyaaka. Syali nisyasingiswa hu lwaande lulala. Syali neende embafu chidatu muhanwa wasyo, nichiyaandire mu meeno kasyo. Mani nibasiboolera bati, “Siingira, mani olye enyama nyiingi.”

6Nindali nitingaala, nae bone, nimbona esisolo siindi esifwaana koti eengwe, nae hu mukoongo kwasyo hwaliho embaya chine koti ech'eyoni; haandi esisolo esyo syali neende emitwe kine. Mani esisolo syo nisibereswa obunyala bw'ohutuka. 7#Hubwi 12:3; 13:1.Nae bino nibyaawa, mani muhuboneherwa hwomu siro, nae bone, mani nimbona esisolo syohune, esitiisa muno haandi esyalaba muno haandi esy'amaani maangi muno. Syali neende ameeno mahoongo haandi ak'ebibya. Syalichaanga haandi nisimenena buli siindu sisyabukanaanga. Mani nisisenakiriraanga mu makulu kasyo buli siindi syali nisidoong'ereo. Haandi esisolo sino syali nisitafwaanana neende ebisolo byoosi ebyasitaangirira ohuboneha. Haandi syali neende enjika ehumi. 8#Hubwi 13:5,6.Nae nindali nisitingaalaanga, nae bone, mani nimbona olwiika luundi ludiidi nilumera. Mani niliiyamo enjika chidatu chiindi. Nae bone, mu lwiika luno, mwalimo emoni koti ech'omuundu, neende omunwa kulomaloma ebiindu bihunuufu.

Danieli aboneherwa oyo owaliwo ohutula hale-na-haandi

9 # Hubwi 20:4; Hubwi 1:14. Nindali nisitingaalaanga, mani nimbona

ebisaala by'obutuki nibiteerweo.

Oyo owaliwo ohutula hale-na-haandi mani niyehala hu sisaala silala.

Ebyefwaalo byae bali nibyalafuya koti enyaange,

haandi embuchi chohu mutwe nichalafuya koti epaamba.

Esisaala sy'obutuki syae nisimyeesuha-myeesuha enjeserye ch'omuliro,

haandi emikuruduumu ch'esisaala esyo chali omuliro kwaaduha.

10 # Hubwi 5:11; Hubwi 20:12. Mani omwaalo kw'omuliro nikuhulukusa nikutula yaali.

Mani mu moni wae waliwo abaandu

elifu neende elifu abamuhalaabaniraanga,

haandi elifu ehumi amahabi elifu ehumi nibeemere mu moni wae.

Ao mani omusaango nikuchaaka ohuwulirwa,

mani ebitabo nibikulwao.

11Nindali nisitingaalaanga, mani nimbulira ekono ly'emboosi ch'ohweniinia neende ohwesuunga chi lwiika ludiidi lwali nilulomaloma. Mani nindatingaala, esisolo syohune nisiitwa, mani omulaambo kwasyo nikusihiriswa nikusukunwa mu muliro kusaambwa. 12Nae ebisolo bidoong'ereo, obunyala bwaabyo bwatusibwao, nae nibifukiirirwa ohudoong'a nibiri ebilamu ebiha biheengerweo.

13 # Mat 24:30; 26:64; Mrk 13:26; 14:62; Luk 21:27; Hubwi 1:7,13; 14:14. Muhubonehera hu ndanyoola mu esiro,

ndabona esiindu sifwaana koti omwaana w'omuundu

niyeehera hu bireesi byomu kulu,

mani niyeecha eyiri Oyo Owaliwo ohutula hale-na-haandi,

mani nibamumanyisa mu moni wae.

14 # Hubwi 11:15. Owafwaanana koti omwaana w'omuundu oyo, mani nibamuba obunyala

neende oluyaali, neende obutuki,

hu baandu b'oluyia lwoosi, neende abomu byaalo byoosi, neende ab'enimi choosi

banyale ohumuhalaabanira.

Obunyala bwae, bunyala bw'endaalo choosi,

obutahakame daawe,

haandi obutuki bwae

obwo haba si bwohusihiriswa daawe.

Amahuluundu k'ebiindu bi Danieli yabona muhuboneherwa

15“Mani ese Danieli, nindeyendeherera muno mu mwooyo kwaange, hulw'ebiindu bi ndabona muhuboneherwa, mani ndatya muno.” 16Mani ndasuda aambi neende mulala hu abo abali nibeemere ao, mani nimuteeba esyadyeeri sidiira hu biindu ebyo byoosi. Mani naamboolera, haandi naanjekesa amahuluundu k'ebiindu ebyo. 17Mani n'aboola ati: “Ebisolo bihoongo bine ebyo, nibo abatuki bane abahabeeo hu syaalo. 18#Hubwi 22:5.Nae aboolerefu ba Oyo Ow'Aakulu Muno, bahanyoole obutuki, mani buchia ohuba obwaabwe endaalo choosi.”

19Mani nindekoomba ohumanya obwadyeeri budiira hu sisolo syohune, esyali nisikabuhana neende ebyaasye biindi, haandi esyali nisitiisa muno, ameeno k'esisolo esyo kali ak'ebibya haandi amadete kasyo kali ak'esihomo; syalichaanga haandi syafunaka-funakaangamo buli siindu sisyanyoolaanga, haandi nisisenakira mu makulu kasyo buli siindu syadoongaangao. 20Haandi mani nindaha ohumanya ebidiira hu njika ehumi, echali hu mutwe kwasyo, neende hu lwiika luundi olwamera mani nilubboongolaho enjika chiindi chidatu. Olwo nilwo olwiika lwaliho emoni neende omunwa kwalomalomaanga emboosi huluundu ech'ohweniinia, haandi olwabonehana ohuba olwomiifu ohuhiraho enjika chaasye. 21#Hubwi 13:7. “Nindali nisitingaalaanga, mani olwiika olwo niluchaaka ebiita neende aboolerefu ba Nasaae, mani nilubayiingira, 22#Hubwi 20:4. ohwoola lu Oyo Owaliwo Endaalo choosi yeechia, mani n'aheengera bulai omusaango aboolerefu ba Oyo Ow'Aakulu Muno, mani ebiha nibyoola aboolerefu nibanyoola obutuki.”

23Mani Oyo Owaliwo Endaalo choosi naamboolera amahuluundu kasyo ati: Esisolo syohune,

bwahabeeo obutuki bwohune hu syaalo,

obwahakabuhane hu butuki buundi bwoosi,

haandi bwahalye esyaalo syoosi,

mani bwasiseenakira, haandi bwasifunakafunakamo mu bituundu-tuundu.

24 # Hubwi 17:12. Nae enjika ehumi,

chitula mu butuki buno,

nibo abatuki ehumi abahatuleo,

mani yiritulao omutuki wuundi;

owahakabuhane neende abatuki bamutaangira,

mani yahamaleo abatuki badatu. 25#Hubwi 12:14; 13:5,6. Yahalomalome bubi hu Oyo ow'Aakulu Muno,

haandi yahafwiinyirire aboolerefu ba Oyo ow'Aakulu Muno.

Mani yahateemeho ohukaluuhania ebidyaalo by'endaalo huluundu neende amalako k'ediini.

Mani yahatuke aboolerefu abo

hulw'embaka ndala, hulw'embaka chibiri, neende esituundu sy'embaka.

26Nae esiina syaheehaswe ohuheenga omusaango,

mani obunyala bwae bwahamumalweho,

ohubwao neende ohusihiriswa elalira.

27 # Hubwi 20:4; Hubwi 22:5. Mani Obwaami neende obunyala

neende oluyaali lw'obutuki bwoosi obuli hu syaalo

bwahabereswe aboolerefu b'Oyo ow'Aakulu Muno.

Mani obutuki bwaabwe buliba obw'endaalo choosi,

haandi ab'obunyala boosi bahamuhalaabanire haandi bamuwulira.

28“Ao mani niyo yi mboosi chine chaakama. Nae ese Danieli, ebibaaso byaange byakera ndaatya muno, mani efwaani yaange niyikaluuhana. Nae nimbiiha emboosi echomu mwooyo kwaange.”

Currently Selected:

Danieli 7: SAMIA

Highlight

Copy

Compare