Danieli 6
6
Danieli mu buko bw'edalang'i
1Dario yaheengao ohudoola bagafana emia ndala neende amahumi kabiri mu bwaami bwae bwoosi. 2Ohumeeda hu abo, yadoola abaandu badatu ohuhulira bagafana abo. Danieli yali mulala hu badatu abo, abahulira bagafana abo, babaleetereenge omusolo, omutuki ahaye ohufwiirwa esiindu syoosi. 3Mani Danieli wuno naahola emirimo bulai muno ohuhiraho abaasye babiri oba bagafana, olwohuba yali neende omwooyo mulai muno; haandi omutuki yali nabasirisa ohumuberesa obuhoongo mu bwaami bwae bwoosi. 4Mani abahuluundu baasye neende bagafana nibateemaho muno ohukoonyeresa esifune sibanafwaambe Danieli engeri y'aholeramo emirimo mu bwaami; nae nibatamunyoolaho esifune syoosi, oba esyonoono syoosi. Olwohuba Danieli yali omweesikwa, n'abulaho esifune syoosi esy'ohumufwaambya. 5Mani abasaacha bano nibaboola bati: “Sibulao esifune sihunafwaambye Danieli, ohutusaho nihumufwaambya ebidiira hu malako ka Nasaae wae.”
6Mani abahuluundu baasye abo neende bagafana nibeecha eyiri omutuki nibafukirisaanie mani nibaboolera omutuki bati: “Ewe omutuki Dario, yiindira endaalo choosi!” 7Abahuluundu badatu mu bwaami, neende abaloondereraho, neende bagafana, neende abakeraki b'amakesi bateesere mani baaba silala bati, ewe omutuki, oteeo elako haandi oteeo esilagiro sy'amaani oti, ohumala embaka y'endaalo amahumi kadatu, omuundu yeesi onekongooyeenge nasaae yeesi oba omuundu yeesi, ohumalaho Ewe omutuki, achia ohusukunwa mu buko bulimo edalang'i. 8Mani bulaanu, Ewe omutuki, taao elako elyo, mani ote omuhono kwao hu syandiiko syalyo, esitanyala ohukaluuhania, koti lu siri mu malako k'Abameedi neende ak'Abaperisia, akatakaluuhanisibwa daawe. 9Mani sakira omutuki yata omuhono hu syandiiko sy'elako elyo.
10Nae Danieli niyamanya ati elako elyo niriteerweho omuhono, yakobolayo mu nyuumba yae. Amadirisa kayo akomu siseenge sy'aakulu, keekulwaangao nikalingaalire Yerusalemu. Danieli yasigamaanga hu mahuumbo kae amahabi kadatu buli ludaalo, niyekongooya haandi niyebasa Nasaae wae, koti lu yaholaanga hale. 11Ao mani abasaacha abo nibeecha nibali alala, mani nibanyoola Danieli naali ohusaba Nasaae wae, koti lu yaholaanga hale. 12Mani nibasuda aambi mani nibateeba omutuki, ebidiira hu teeka bati: “Ewe omutuki, haba siwata omuhono kwao hu lako liboola liti ohumala endaalo amahumi kadatu, oyo yeesi onekongooyeenge nasaae oba omuundu wuundi ohumalaho ewe, Ewe omutuki, wohusukunwa mu buko birimo edalang'i?” Mani omutuki n'akobolamo ati: “Eee, buli siri mu lako elyo syomiiswa koti amalako k'Abameedi oba Abaperisi, akatanyala hukaluuhaniswa daawe.” 13Ao mani nibaboolera omutuki bati: “Danieli, mulala hu baandu banyakwa ohutula mu Buyudaaya, ahulekeeresa, ewe omutuki, oba elako li wataaho omuhono, nae yasaba Nasaae wae amahabi kadatu buli ludaalo.” 14Mani omutuki niyawulira emboosi echo, yeyendeherera muno, mani n'ateemaho koti lu anyala ohuwonia Danieli. Mani n'amala oludaalo lwoosi n'akoonya engeri yohuwoniamo. 15Mani abasaacha abo nibafukirisania haandi nibakobolayo eyiri omutuki mani nibamuboolera bati: “Ewe omutuki, ohoye omanye oti lako ly'Abameedi neende Abaperisi, elako li omutuki ateereo haba silikaluuhaniswa daawe.”
16Mani omutuki n'alagira, mani nibaleeta Danieli, nibamusukuna mu buko bw'edalang'i. Mani omutuki n'aboolera Danieli ati: “Leha Nasaae wao, oyo y'ohalaabanira buli ludaalo, ahuwonie!” 17Mani nibaleeta okukina mani nibakuta hu mulyaango kw'obuko, mani omutuki n'ataaho ahalolero h'omuhuuru kwae neende ahalolero h'abaami bae, yihaye ohubaao esikaluuhanisibwa hu sibonereso sya Danieli. 18Mani omutuki naakobolayo mu dooho lyae. Esiro esyo n'atalyaho esyohulya syoosi. Haandi n'atafukiirira ohumuleetera ebihubbwa byoosi ohumusangaasa, haandi n'ateyalisaho endoolo daawe.
19Mani nibwahya, omutuki yasiingira mani yalaala naachia hu buko bw'edalang'i. 20Nae niyoola aambi neende obuko yi Danieli yi yali, n'ateeba Danieli mu kono ly'engisa ati: “Ewe Danieli, omuhalaabani wa Nasaae mulamu, Nasaae wao, oyo yohalaabaniraanga buli ludaalo anyalire ohuhuwonia eyiri edalang'i?” 21Mani Danieli n'akobola mu mutuki ati: “Ewe omutuki, yiindira endaalo choosi! 22Nasaae waange atumire malaika, mani n'abwiiha eminwa ky'edalang'i, mani nichitaaholaho esyonoono syoosi; olwohuba mu moni wae, sibulao esyonoono si ndahola; haandi mu moni wao, Ewe omutuki, sibulao esyonoono si ndahola.” 23Mani omutuki n'asangaala muno, n'alagira ati batuse Danieli mu buko. Mani nibatusa Danieli mu buko obwo, mani nibanyoola bati sibulao esyonoono syoosi esyamukwaaho, olwohuba yali niyeesika Nasaae wae. 24Mani omutuki n'alagira, mani nibaleeta abasaacha abo abali sitakire Danieli, mani nibabasukuna mu buko bw'edalang'i, abasaacha abo beene, neende abaana baabwe, neende abahasi baabwe. Mani nibaba nibasisiiri ohwoola hu bwaalo bw'obuko, edalang'i chaabakwaaho mani chabafunaka-funaka amakuumba.
25Mani omutuki Dario niyandiikira abaandu b'oluyia lwoosi, neende abomu byaalo byoosi, neende ab'enimi choosi, abali hu syaalo syoosi ati: “Omuleembe kwemeede ohuba naang'we.” 26Ndaao elako endi, mu bwaami bwaange bwoosi, abaandu boosi baticheenge haandi beseenge oluyaali mu Nasaae wa Danieli.
Olwohuba Oyo niye Nasaae mulamu,
oyiindira endaalo choosi;
obwaami bwae haba sibwahasihirirwe daawe,
haandi obunyala bwae haba sibwahakame daawe.
27Awonia haandi yaabina,
ohola ebiwuukisa neende eby'amayia
muukulu neende hu syaalo,
niye owoniisye Danieli
ohwiitwa neende edalang'i.
28Mani Danieli oyo naaba bulai muno mu butuki bwa Dario neende mu mubuki bwa Sairasi Omuperisia.
Currently Selected:
Danieli 6: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
