Danieli 8

Danieli aboneherwa ekoondi miiku neende embusi ehole

1Mu mwaaka kwohudatu okw'obutuki bwa Bbelisasa, ese Danieli ndanyoola ohuboneherwa, ohuloonda hu huboneherwa hu ndataangira ohunyoola. 2Muhuboneherwa ohwo, ndeecha ndeebona ni ndi mu siko sya Susa, esiri mu situundu sy'Elamu. Mani ndabona ni ndi hu ndulo w'omwaalo kwa Wulaayi. 3Mani nisiingisa emoni aakulu, mani bone, ndabona emiiku niryeemere hu ndulo w'omwaalo. Lyali neende enjika chibiri, haandi enjika choombi chali endeeyi, nae olwiika lulala lwali oluleeyi ohuhiraho oluundi, mani olwiika luhiramo obuleeyi nilwo olwasembayo ohumera. 4Mani nimbona emiiku elyo nilitwoomera emuumbo neende emukulu neende emwaalo. Mani nisibulao esisolo sya anyala ohweema mu moni waalyo. Haandi abulao omuundu onyala ohwaabina oyo yi yali niyidaha ohwiita. Emiiku eyo yaholaanga buli siindu si yadahaanga, mani niyehuduumbasa eyeene.

5Nae nindali nisyehaliirisaanga, bone, ehole yatuumbuha niyitulira emuumbo, niyiichia neende embiro, amakulu kayo nikatoola hu loba. Ehole eyo yali neende olwiika akatikaati w'emoni chayo. 6Mani ehole eyo niyiseeta emiiku lyali neende enjika chibiri, yi ndabona niyeemere hu ndulo w'omwaalo. Mani ehole eyo niyaalaba muno, niyiiruha niyiseeta emiiku elyo. 7Mani niimbona niyiseeta emiiku, niyiri neende obwaalaba buungi, mani niyitwooma emiiku elyo, mani niyibboongola enjika chalyo choombi. Emiiku elyo mani niliwaamo amaani ak'ohwelwaanaho, mani nilikwa aasi, ehole eyo niyiyiseenakirira, mani naabulao oyo yeesi onyala ohwaabina ekoondi emiiku elyomu bunyala bw'ehole. 8Ao mani ehole eyo niyemeeda muno ohweniinia; nae niyali niyisyeniinia ohweekesa amaani kayo, olwiika lw'amaani olwo mani nilubboongoha. Mani mu mu bweyaango bwalwo nibumeramo enjika chiindi ehoongo ch'amakana chine echeemere; buli lwiika nilutingaalire mu nyaande choosi.

9Mani hu buli lwiika, nihumeraho olwiika ludiidi, olweehola olw'amaani muno, mani obunyala bwaalwo nibwemeeda nibuchiira emwaalo, neende ebukwe, neende mu syaalo sy'oluyaali. 10#Hubwi 12:4.Olwiika olwo lwahula mani niluba olw'amaani muno, niluseeta kata eye lyo muukulu. Haandi niluseeta eye ly'eng'ining'ini chiindi, mani nilichisukuna aasi hu syaalo, mani niluchisenakirira. 11Mani ni lweniinia elyeene, ni lweekeraania neende Omuhuluundu w'Eye lyo muukulu, mani nilumalao esiyaanwa sisaambwa sya buli ludaalo esyayaanirwaanga Omuhuluundu w'Eye, haandi yaaba omukwoobo Enyuumba ya Nasaae. 12Mani nilubereswa eye alala neende engeri yohuwaayo esiyaanwa sisaambwa esikabuhaaneho neende esyabechaangao buli ludaalo. Mani olwiika olwo nilumalao ediini yadyeeri, niluhola bulai buli siindu si lwadahaanga. 13Ao mani nimbulira omwoolerefu mulala naalomaloma; haandi omwoolerefu wuundi naalomaloma neende owali n'alomaloome n'ateeba ati: “Esyo esiimboneheere esidiira hu esiyaanwa sisaambwa buli ludaalo, syahabeeo ohwoola liina? Haandi esyonoono sinyaasa esyaliwo ohutula hale, syahabeeo ohwoola liina? Haandi ekulu neende Onyuumba ya Nasaae, byahaseenakirwe ohwoola liina?” 14Mani n'amukobolamo ati: “Byahabeeo ohumala ebiha byoola engoloobe neende echuli elifu chibiri neende emia chidatu (2,300). Abuundu woolerefu n'akoboswa mu luyaali lwaayo lwalichiingiwo hale.”

Malaika Gabburieli yeekesa amahuluundu k'esibonehero

15Nae ese, Danieli, nindamala ohubona ebyaanjekeswa muhuboneherwa huno, ndadaha ohumanya amahuluundu kabyo; mani bone, ndechuhana nimbona esiindu syambonehera koti omuundu niyemere mu moni waange. 16#Luk 1:19,26.Haandi nimbulira ekono ly'omuundu nilitulira akatikaati w'Omwaalo kwa Wulaayi, nililaanga liti: “Gabburieli, yekesa omusaacha oyo amahuluundu k'ebiindu bimuboneheere.” 17Mani n'asuda aambi w'abuundu yi ndali ninyemere. Nae niyeecha, obuti bwandiira mani niingwa aasi mafumaame. Nae niyaamboolera ati: “Ewe omwaana w'omuundu, manya oti, ebihuboneheere bidiira hu ndaalo ch'enjakamo.”

18Nae niyali n'alomalomaanga naange, ndechuhana ningwiire aasi mafumaame nitamanyireho ebiri hu syaalo. Nae yandiraho mani n'asiingisa ninyema. 19Mani n'aboola ati: “Bona, njia ohuhweekesa omanya ebyahabeeo etima lya Nasaae nilikwireo. Ebiindu bi obweene bidiira hu biha byatekehwa ohuba eby'enjakamo. 20Mani emiiku ly'obweene niliri neende enjika chibiri, bano nibo abatuki ba Media neende Perisia. 21Nae ehole, niye omutuki wa Bugiriki; nae olwiika luhoongo oluli akatikaati w'emoni wayo, niye omutuki waamberi owa Bugiriki. 22Nae olwiika lwabboongolwa, mani mu sifwo syalwo nimumeramo enjika chiindi chine, nibwo obutuki bune obwahakabuhanemo mu butuki bwae, nae obutuki obwo haba sibwahabe obw'amaani koti obwae. 23Mani enjakamo y'obutuki bune obwo niyahabe aambi ohwoola, ao abaandu bahabe nibabitiriire ohwonoona. Mani waheechieo omutuki mwaalaba, owalung'uuma mu moni, haandi omumanyirifu mu huhola olukwe. 24Yahabe neende obunyala, nae sibwahabe koti obw'omutuki wataangira ohubaao bane bano nibasisiiri. Omutuki oyo yahaleete ohusihirira hutiisa muno. Yahahole buli siindu sy'adaha, haandi yahasihirise abaandu b'amaani, neende aboolerefu ba Nasaae beene. 25Hulw'obulyaanga bwae, yahahole buli siindu sy'adaha. Yahehuduumbase omweene, mani n'asihirisa abaandu baangi muno. Yahaseete haandi alwaanie Omutuki otuka abatuki boosi. Nae, yahasihiriswe mani abulao omuundu omudiiraho daawe. 26Haandi ohuboneherwa hudiira hu ebiha by'engoloobe neende echuli, hwadyeeri nihwo. Nae ewe, ebiri muhuboneherwa ohwo, biliinde koti eby'engiso muno, olwohuba bidiira hu siha sihoongo syahabiteo, hu bimale byolerere.”

27Ao mani ese Danieli ningobolamo amaani, mani nindwaala ohumala endaalo ediidi, mani luunyuma nisiingira mani ningobolayo ohuhola emirimo ch'omutuki. Nae ndawukaho sa ebiindu byamboneherwa, mani ndahaya ohubimanya.

Currently Selected:

Danieli 8: SAMIA

Highlight

Copy

Compare